ޖަރުމަނު ވިލާތުން ސިޔާސީ ހިމާޔަތް ހޯދަވައިގެން އުޅުއްވާ ޖުމްހޫރީ ޕާޓީގެ ވެރިޔާ ގާސިމް އިބްރާހީމާ އެކު މި އަހަަރު ރާއްޖެ ވަޑައިގެން ޖުމްހޫރީ ޕާޓީ ކުރިއަރުވައި ބޮޑު ޕާޓީއަކަށް ހައްދަވާނެ ކަމަށް އެޕާޓީގެ ރައީސް ކަމަށް ރޭ އިންތިހާބުވި ވެވަޑައިގެންނެވި އަލީ ވަހީދު މިއަދު ވިދާޅުވެއްޖެ އެވެ.
އެމްޑީޕީން ވަކިވެ ޖުމްހޫރީ ޕާޓީއާ ގުޅިވަޑައިގެންތާ އެންމެ 26 ދުވަހުގެ ތެރޭގައި ރައީސްގެ މަގާމަށް އިންތިހާބުވެ ވަޑައިގެން އަލީ ވަހީދު ލަންޑަންގައި ހުންނަވައި ވީޑިއޯ މެދުވެރިކޮށް ވިދާޅުވީ ރާއްޖެ އައިސް ޖޭޕީއަކީ މިހާރަށްވުރެ ބޮޑު ޕާޓީއަކަށް ހަދާނެ ކަމަށެވެ.
"އަޅުގަނޑު ގަބޫލް ކުރާ ގޮތުގައި އަދިވެސް ޖޭޕީގެ ލީޑަރަކީ މާފަންނު ވިލާ ގާސިމް އިބްރާހިމް. އަޅުގަނޑުމެން އައިސް ތަފާތު ދައްކާނަން،" މިހާރު ޕެރަޑައިސްގައި ކުރިއަށް ދާ ޖޭޕީގެ ކޮންގްރެސްގެ ނިންމުމުގެ ރަސްމިއްޔާތުގައި ވާހަކަ ދައްކަވަމުން، އަލީ ވަހީދު ވިދާޅުވި އެވެ.
ޑީއާރްޕީން މީގެ ނުވަ އަހަރު ކުރިން ސިޔާސީ ދާއިރާ އަށް ނުކުންނެވި، އަލީ ވަހީދު ޖޭޕީގެ ރައީސްގެ މަގާމަށް ގެނައުމާ މެދު ޕާޓީގެ ތެރޭގައި ހިޔާލު ތަފާތުވުންތަކެއް އުފެދިފައިވަނިކޮށް އިންތިހާބު ކާމިޔާބު ކުރެއްވި އަލީ ވިދާޅުވީ އޭނާއަކީ "ކަޅު އެންދެރިގަނޑަކަށް" ނޫނީ "މާވަހަރަކަށް" ހެދުމަށް ލިބުނު ފުރުސަތުގައި މާވަހަރަކަށް ހެދީތީ އެކަމުގެ ބަދަލުގައި އިހުލާސްތެރި ބަދަލުތަކެއް ގެންނާނެ ކަމަށެވެ.
ޖޭޕީއާ ގުޅިވަޑައިގެންނެވި "ސިއްރު" ހާމަ ކުރައްވަމުން އަލީ ވަހީދު ވިދާޅުވީ އޭނާ ޑީއާރްޕީގެ ޓިކެޓުގައި ތޮއްޑޫ ދާއިރާގެ މެމްބަރަކަށް ކުރިމަތިލެއްވި އިރު އެ ގޮނޑި ކާމިޔާބު ކުރެވުނީ ގާސިމްގެ ތާއީދުގެ ސަބަބުން ކަމަށެވެ.
"އެ ދުވަހު ގާސިމް ވިދާޅުވި އަލީ މި ޕާޓީ އަށް އަންނާކަށް މުހިންމެއް ނޫނޭ. ކޮންމެވެސް ދުވަހަކުން ތިމަންނަ ލުބޯ ހުތްގަނޑެއްހެން ފެލާލާނޭ އެ ދުވަހު އަންނާށޭ. އެހެންވެ މި އައީ،" މަޖިލިސް ކާމިޔާބު ކުރެއްވުމަށް ފަހު އެމްޑީޕީއާ ގުޅިވަޑައިގެންނެވި އަލީ ވަހީދު ވިދާޅުވި އެވެ.
ރާއްޖޭގެ ސިޔާސީ މަސްރަހަށް އަލިއަޅުވައިލައްވަމުން އަލީ ވަހީދު ވިދާޅުވީ އެ ނުރައްކާތެރިކަން ގެގޭގައި ތިބި އަނބިދަރިންނާ ހިސާބަށް ގޮސްފައިވާ ކަމަށެވެ. އެހެންވެ މިއީ "އޯގާތެރި ގާސިމް" ވެރިކަމަށް ގެންނަންވީ ވަގުތު ކަމަށް އޭނާ ވިދާޅުވި އެވެ.
ޖޭޕީއަކީ ނުވަތަ ގާސިމަކީ ކަމެއް ބޭނުންވީމަ އަރާ "ހަރުގަނޑަކަށް" ނުހެދުމަށް އަލީ ގޮވާލެއްވި އެވެ.
"އަނބިދަރިން ނުކުމެ މިހާ ހިސާބަށް އަންނަން ޖެހުނީ މިހާ ހިސާބަށް އައީމަ. އެ މީހުންގެ ގައިގަ އަތްލީމަ،" ގާސިމްގެ ދަރިކަލުން ޝިޔާދު ގާސިމް ހައްޔަރު ކޮށްފައިވާކަން ފާހަގަކުރައްވައި އަލީ ވަހީދު ވިދާޅުވި އެވެ.
އަލީ ވިދާޅުވީ ސިޔާސީ ޕާޓީތަކުން ގުޅިގެން މަސައްކަތް ކުރަން ޖެހޭ ކަމަށެވެ. އެކަމަށް ޖޭޕީ ތައްޔާރު ކަމަށް ވިދާޅުވި އެވެ. އަދި ސޯޝަލް މީޑިއާ ދޫކޮށް ހަގީގީ މަޝްވަރާ އަށް ނުކުތުމަށް ވެސް ގޮވައިލެއްވި އެވެ.