ރައީސް ޔާމީން އިންތިޚާބު ކާމިޔާބު ކުރައްވާނީ 52 ޕަސެންޓުން: ނިހާން

ސެޕްޓެމްބަރު، 23 ގައި އޮންނަ ރިޔާސީ އިންތިޚާބު ރައީސް އަބްދުﷲ ޔާމީން ކާމިޔާބު ކުރައްވާނީ ރައްޔިތުންގެ 52 ޕަސެންޓު ވޯޓުން ކަމަށް ޕީޕީއެމްގެ ޕާލަމެންޓްރީ ގްރޫޕްގެ ލީޑަރު އަހްމަދު ނިހާން މިއަދު ވިދާޅުވެއްޖެ އެވެ.

އެމްޑީޕީގެ ރިޔާސީ ކެންޑިޑޭޓަކާއި ޖުމްހޫރީ ޕާޓީގެ ރަނިންމޭޓަކު ނެރެގެން އިންތިޚާބުގައި ރައީސް ޔާމީން ބަލިކުރަން އިދިކޮޅު ކޯލިޝަނުން އެއްބަސްވުމާ ގުޅިގެން ނިހާން ކުރެއްވި ޓުވީޓެއްގައި ވިދާޅުވީ އިންތިޚާބަށް ހިސާބު ޖަހާނެ ގޮތަކަށް ޖަހަންވީ ކަމަށެވެ. ނެރެވުނު އަދަދަކަށް ކެންޑިޑޭޓުންނާއި ރަނިންމޭޓުން ދެއްކިއަސް ތަރައްގީ އަށް ދިވެހި ރައްޔިތުން ދެން ނޫނެކޭ ނުބުނާނެ ކަމަށެވެ.

ރައްޔިތުންގެ އަޣުލަބިއްޔަތު ވޯޓާ އެކު ދެ ވަނަ ދައުރަކަށް، ރިޔާސީ އިންތިޚާބު ރައީސް ޔާމީން ކާމިޔާބު ކުރައްވާނެ ކަމަށް ނިހާން ވިދާޅުވި އެވެ.

ޕީޕީއެމްގެ ރިޔާސީ ކެންޑިޑޭޓަކީ ރައީސް ޔާމީން ކަމަށް އެ ޕާޓީގެ ކައުންސިލުން ނިންމައި، އެމަނިކުފާނުގެ ކެމްޕޭން ހަރަކާތްތައް ވަނީ ފަށައިފަ އެވެ.

އެ ކެމްޕޭންގައި ވެސް އިސްކޮށް އުޅުއްވަމުން ގެންދަވާ ނިހާން ވިދާޅުވީ ޑިމޮކްރަސީގެ ނަމުގައި ވޭތުވެދިޔަ 13 އަހަރު އެމްޑީޕީން ރައްޔިތުންނަށް ގެނެސްދިނީ ގެއްލުމާ ހަލާކު ކަމަށެވެ. އެކަމަކު ފާއިތުވި ފަސް އަހަރުގެ ތެރޭގައި ރައީސް ޔާމީން ގައުމަށް ތަރައްގީ ގެންނެވި މިންވަރު ރައްޔިތުންނަށް ސާފު ކަމަށް ވެސް ވިދާޅުވި އެވެ.

ރައީސް ޔާމީން 52 ޕަސެންޓުން އިންތިޚާބު ކާމިޔާބު ކުރައްވާނެ ކަމަށް ނިހާން ވިދާޅުވިއިރު، އެމަނިކުފާނާ ވާދަކުރަން އެމްޑީޕީން ނެރޭނެ ކަމަށް ލަފާކުރެވެނީ އެ ޕާޓީގެ ޕާލަމެންޓްރީ ގްރޫޕުގެ ލީޑަރު އިބްރާހިމް މުހައްމަދު ސޯލިހް (އިބޫ) އެވެ. އުކުޅަހުގައި މިއަދު ކުރިއަށްދާ އެމްޑީޕީގެ ކޮންގްރެސްގައި އެ ނިންމުން ނިންމާނެ ކަމަށް ބެލެވެ އެވެ. ޖޭޕީން ރަނިންމޭޓަކަށް ނެރޭނެ ބޭފުޅަކު އަދި ކަނޑައެއް ނާޅަ އެވެ.

އިދިކޮޅު ޕާޓީތަކުން އެއްބަސްވެފައި ވަނީ އެއް ކެންޑިޑޭޓަކު ނެރެ، އިންތިޚާބުގެ ފުރަތަމަ ބުރުން ރައީސް ޔާމީން ބަލިކުރުމަށެވެ.