އަންނަ ސެޕްޓެމްބަރު 23 ވަނަ ދުވަހު ރާއްޖޭގައި ބާއްވާ ރިޔާސީ އިންތިހާބުގައި ވޯޓު ލުމުގެ ހައްގު ލިބިފައިވާ މީހުންގެ ވަގުތީ ލިސްޓަށް ހުށަހެޅި ޝަކުވާތައް އިސްލާހުކޮށް އާ ލިސްޓް މިއަދު އާއްމުކޮށްފި އެވެ.
އެ ލިސްޓަށް ޝަކުވާ ހުށަހެޅުމުގެ މުއްދަތު މިދިޔަ މަހު ހަމަވި އިރު 1،700 އަށް ވުރެ ގިނަ ޝަކުވާ ހުށަހަޅާފައި ވެ އެވެ. ވޯޓާސް ލިސްޓް މިއަދު އާއްމުކުރީ 734 އިސްލާހަކާ އެކު އެވެ.
އިލެކްޝަންސް ކޮމިޝަން (އީސީ)ގެ މެމްބަރު އަހުމަދު އަކްރަމް ވިދާޅުވީ މިއަދު އާންމުކުރި ލިސްޓަށް ވެސް، މާދަމާ އިން ފެށިގެން އަންނަ ހަފުތާގެ ބުރާސްފަތި ދުވަހާ ހަމަ އަށް ޝަކުވާ ހުށަހެޅޭނެ ކަމަށް ވިދާޅުވި އެވެ.
ޝަކުވާތައް އިސްލާހުކޮށް އާ ލިސްޓް ނެރުނު އިރު، ރަށްވެހިވެފައިވާ ރަށް ނޫން އެހެން ރަށެއްގައި ވޯޓުލުމަށް ރީ ރަޖިސްޓްރީވުމުގެ ފުރުސަތު ވެސް މި މަހު ހުޅުވައިލާނެ އެވެ.
ވޯޓުލާ މީހުންގެ ވަގުތީ ލިސްޓަށް ޝަކުވާ ހުށަހެޅުމުގެ މުއްދަތު މިދިޔަ ހަފުތާގައި ހަމަވި އިރު މައިގަނޑު ގޮތެއްގައި ހުށަހަޅާފައިވަނީ މަރުވެފައިވާ މީހުންނާއި 18 އަހަރުން ދަށުގެ ކުދިންގެ ނަންތައް ވޯޓުލުމުގެ ހައްގު ލިބިފައިވާ މީހުންގެ ލިސްޓުގައި ހުރުމުގެ މައްސަލަ އެވެ.
އެ ލިސްޓަށް އިދިކޮޅު އެންމެ ބޮޑު ޕާޓީ، އެމްޑީޕީން ވެސް 800 އަށް ވުރެ ގިނަ ޝަކުވާ ހުށަހެޅި އެވެ. އެމްޑީޕީގެ އިތުރުން އެހެން ޕާޓީތަކުން ވެސް ވޯޓާސް ލިސްޓަށް ޝަކުވާ ހުށަހަޅާފައި ވެ އެވެ.
އިލެކްޝަންސް އިން އާއްމުކޮށްފައިވާ ވޯޓާސް ލިސްޓުގައިވާ ގޮތުން، ސެޕްޓެމްބަރު 23 ގައި އޮންނަ ރިޔާސީ އިންތިހާބުގައި ވޯޓު ލުމުގެ ހައްގު 263،000 މީހުންނަށް ލިިބިގެންވެ އެވެ.
