ރާއްޖޭގައިި ފިލްމާއި ޑޮކިއުމަންޓްރީ ހަދަން ޝައުގުވެރިވާ މީހުންނަށް އަމާޒުކޮށްގެން ތަމްރީނު ޕްރޮގްރާމްތަކެއް ކުރިއަށް ގެންދަން ނިންމައިފި އެވެ.
ހޮޓެލް ޖެންގައި އިއްޔެ އޮތް އިވެންޓެއްގައި އިކޮނޮމިކް މިނިސްޓަރު މުހައްމަދު ސައީދު ވިދާޅުވީ ފިލްމާއި ޑޮކިއުމެންޓްރީ އުފައްދާނެ ބަޔަކު، ފަންޑުކޮށްގެން ވަރަށް އަވަހަށް ނެރެން ނިންމާފައިވާ ކަމަށެވެ. ''އިރާދަކުރެއްވިއްޔާ އެ އިންޑަސްޓްރީއަކީ ދިވެހި ޒުވާން ޓެލެންޓް ނެރެވޭނެ އިންޑަސްޓްރީއެއްކަމުގައި ގެރެންޓީޑް ފަންޑެއްގެ ގޮތުގައި ޕަބްލިކް ސާވިސާސް މީޑިއާއާ އެކު އަޅުގަނޑުމެން ވާނީ ސޮއި ވެސް ކޮށްފައި،" މިނިސްޓަރު ވިދާޅުވި އެވެ.
ނަމަވެސް ފިލްމާއި ޑޮކިއުމަންޓްރީ ހަދަން ޝައުގުވެރިވާ މީހުންނަށް ހާއްސަ ކުރާ ޓްރޭނިން ޕްރޮގްރާމްތައް ކުރިއަށް ގެންދާނެ ގޮތުގެ މާ ބޮޑު ތަފުސީލެއް މިނިސްޓަރު ނުދެއްވަ އެވެ.
އޭނާ ވިދާޅުވި ގޮތުގައި ޒުވާނުންނަށް އިތުރުު ފުރުސަތުތައް ހޯދައި ދިނުމުގެ ގޮތުން މިހާރު ބައެއް އިންޑަސްޓްރީތައް ހަމައެކަނި ދިވެހިންނަށް މަސައްކަތް ކުރެވޭ ދާއިރާތަކެއްގެ ގޮތުގައި ވަނީ ހަމަޖައްސައިފަ އެވެ. އެގޮތުން ފޮޓޯގްރަފީ ދާއިރާ ފާހަގަ ކުރި އެވެ.
ފިލްމީ ދާއިރާ އަށް މީހުން ބިނާ ކުރުމުގެ އިތުރަށް އިނޮމިކް މިނިސްޓްރީން ވަނީ ފިލްމީ މަސައްކަތްތަކަށް ލުއި ލޯނު ދޫކުރެވޭނެ އިންތިޒާމުތަކެއް ވެސް ހަމަޖައްސައި ދޭނެ ކަމުގެ ޔަގީންކަން މިދިޔަ އެޕްރީލް މަހުގެ ތެރޭގައި ދީފަ އެވެ. މިކަމަކީ ވެސް ޕީއެސްއެމް މެދުވެރިކޮށް ހުޅުވައިދޭ ފުރުސަތެކެވެ.
ރާއްޖޭގެ ފިލްމީ ދާއިރާގައި މަސައްކަތް ކުރާ ގިނަ މީހުންނަކީ މި ދާއިރާގެ ޕްރޮފެޝަލް ތަމްރީނު ނެތި، އަމިއްލަ އަށް ކަންކަން ދަސްކޮށްގެން މަސައްކަތް ކުރާ ބައެކެވެ.
ދާފި ފަހުން ޑާކް ރެއިން އެންޓަޓައިންމަންޓުން ވެސް "ޕްރޮޖެކްޓް ޖަމްޕް" ގެ ނަމުގައި ފިލްމީ ދާއިރާ އަށް މީހުންނ ބިނާ ކުރުމުގެ މަސައްކަތްތަކެއް ކުރިއަށް ގެންދަން ނިންމާފައިވާކަން އިއުލާންކޮށްފަ އެވެ.
މީގެ ކުރިން ވެސް މި ދާއިރާގެ ބައެއް މީހުން ފިލްމީ ދާއިރާ އަށް މީހުން ތަމްރީނު ޕްރޮގްރާމްތަކެއް ހިންގައިފައިވެ އެވެ.