ރިޔާސީ އިންތިހާބުގައި ވާދަކުރަން ރާއްޖޭގައި މިހާތަނަށް ބޭއްވި ކޮންމެ ޕްރައިމަރީއަކަށް ފަހު ވެސް ފެނުނީ ބަލިވާ ބަޔަކު ހިތްހަމަނުޖެހުންތަކާ އެކު ފެޔަށް ޖެހުނު ތަނެވެ.
އެމްޑީޕީން 2008 ގައި ބޭއްވި ރިޔާސީ ޕްރައިމަރީގައި އޭރުގެ ކެންޑިޑޭޓް އަދި ފަހުން ރައީސް މުހައްމަދު ނަޝީދު ކާމިޔާބު ކުރެއްވުމުން ޑރ. މުހައްމަދު މުނައްވަރު އެމްޑީޕީއާ ދުރަށް ވަޑައިގަތެވެ. އޭގެ ފަހުން 2013 ގައި ޕީޕީއެމުން ބޭއްވި ވާދަވެރި ޕްރައިމަރީގައި މިހާރުގެ ރައީސް އަބްދުﷲ ޔާމީން މޮޅުވުމުން، އުމަރު ނަސީރު، ވަރަށް ބޮޑެތި ތުހުމަތުތައް ކުރެއްވުމަށް ފަހު، ފެޔަށް ޖެހިވަޑައިގަތީ އެވެ. (ފަހުން ދެ ވަނަ ބުރުގައި ރައީސް ޔާމީނާ އެއް ފަޅިއަކަށް އަރާވަޑައިގަތެވެ.)
މި ތަޖުރިބާތަކާ އެކު މި އަހަރުގެ ރިޔާސީ އިންތިޚާބާ ކުރިމަތިލިއިރު، ފެނުނީ ތަފާތު މަންޒަރެކެވެ. އިންތިޚާބުގެ ފުރަތަމަ ބުރަށް ވެސް އިދިކޮޅުން ބޮޑު ކޯލިޝަނެއް ހަދައި، ކެންޑިޑޭޓާއި ރަނިން މޭޓު ކަނޑައެޅުމުގައި ވެސް ވާދަވެރިކަން އޮތް މިންވަރެވެ. އާ ގާނޫނުއަސާސީ އަށް ފަހު ބޭއްވި ދެ އިންތިޚާބުގައި ވެސް ބޮޑު ކޯލިޝަނަކާ އެކު އިންތިޚާބަށް ކުރިމަތިލަނީ ދެ ވަނަ ބުރުގަ އެވެ.
އެކަމަކު މި އިންތިޚާބުގެ ފުރަތަމަ ބުރަށް އިދިކޮޅު އެމްޑީޕީ އާއި ޖުމްހޫރީ ޕާޓީ އާއި އަދާލަތު ޕާޓީގެ އިތުރުން ކުރީގެ ރައީސް މައުމޫނަށް ތާއީދުކުރާ މީހުން އިއްތިހާދުވެފައިވާއިރު، ރިޔާސީ ކެންޑިޑޭޓު ކަނޑައެޅުނީ ޚިޔާލުތަފާތުވުންތަކާ އެކު ވަރުގަދަ ބަހުގެ ހަމަލާތަކަކުންނެވެ. އިންތިޚާބުގައި ވާދަކުރައްވާނެ ކަމަށް ވިދާޅުވި ނަމަވެސް ގާނޫނީ ގޮތުން ފުރުސަތު ބަންދުވެފައިވާ ކުރީގެ ރައީސް ނަޝީދާއި ޖުމްހޫރީ ޕާޓީގެ ލިޑަރު ގާސިމް އިބްރާހިމް ފަހުވަގުތު ދޫ ދެއްވީ އެވެ.
މި ފަހަރު މި ފެނުނީ ރިޔާސީ ކެންޑިޑޭޓްގެ ޕްރައިމަރީއަކަށް ވުރެ ރަނިން މޭޓްގެ އިންތިހާބެއްގެ ވާދަވެރިކަން ބޮޑުވި ތަނެވެ. އިދިކޮޅު ހަރަކާތުން އެއް ކެންޑިޑޭޓަކު ނެރެން ނިންމައި، ރިޔާސީ ކެންޑިޑޭޓްގެ ފުރުސަތު އެމްޑީޕީ އަށް ދީ އަދި ރަނިން މޭޓަކަށް ބޭފުޅަކު ހޮވުން ޖޭޕީއަށް ދޫކޮށްލުމުން، ޒުވާން ބޭފުޅުންކޮޅެއް ވަނީ ވަރުގަދަ ވާދައެއް ކުރައްވައިފަ އެވެ.
ސީދާ ބޮޑު ޕްރައިމަރީއަކަށް ނުވި ނަމަވެސް، ޖޭޕީގެ ކައުންސިލްގެ ވޯޓު ކާމިޔާބުކުރައްވަން، ޒުވާން ދެ މެމްބަރުން ކަމަށްވާ ކެންދޫ ދާއިރާގެ އަލީ ހުސެން އާއި ކާށިދޫ ދާއިރާގެ ފައިސަލް ނަސީމް، ސޯޝަލް މީޑިއާގައި ވަރުގަދަ ކެމްޕެއިންއެއް ކުރެއްވި އެވެ. އަދި ރޭ އެންމެ ވޯޓަކަށް ބަލިވެވަޑައިގަތް ނަމަވެސް މިއަދު ހެނދުނު އަލީ ހުސެން އެ ދެއްކެވީ، ރާއްޖޭގެ ޑިމޮކްރަސީއަށް، ރީތި ނަމޫނާއެކެވެ. ބަލި ގަބޫލުކުރައްވައި، ފައިސަލްގެ ފަހަތަށް އަރާވަޑައިގަތީ އެވެ.
މި ވަގުތު އައްޑޫގައި ހުންނެވި އިދިކޮޅު ކެންޑިޑޭޓް އިބޫއާ ގުޅިވަޑައިގަތުމަށް ފައިސަލްއާ އެކު އަލީ ވެސް، "އަޅުގަނޑުގެ ހިތްވަރަށް އެއްވެސް ބަދަލެއް ނާންނަކަމަށް ވިދާޅުވަމުން" ފުރާވަޑައިގަތުމެވެ.
ވަރަށް ވަރުގަދަ ކެމްޕޭނެއް ސޯޝަލް މީޑިއާގައި ވެސް ފެނުނު އަލީ ހުސެން ބަލިވެވަޑައިގަތީ އެންމެ ވޯޓެއްގެ ތަފާތުންނެވެ. ރަނިން މޭޓްކަން ކާމިޔާބުކުރެއްވި ކާށިދޫ ދާއިރާގެ ފައިސަލް ނަސީމަށް 15 ވޯޓު ލިބިވަޑައިގެންނެވި އިރު އަލީ ހުސެންގެ ޖުމްލައަކީ 14 އެވެ.
މި ދެ ބޭފުޅުންގެ އިތުރުން ދެން ވާދަކުރެއްވި ރައީސް އޮފީހުގެ ކުރީގެ މިނިސްޓަރު އަބްދުﷲ އަމީނަށް ނުވަ ވޯޓު އަދި ޑރ. ހުސެން ރަޝީދު ހަސަނަށް ދެ ވޯޓު ލިބިވަޑައިގަތެވެ.
އެތައް ބަޔަކު އިންތިޒާރު ކުރަމުން އައި ވޯޓުގެ ނަތީޖާ އިއުލާންކުރުމާ އެކު އަލީ ހުސެއިން ވަނީ ފައިސަލް އަށް މަރުހަބާ ވިދާޅުވެ، އިދިކޮޅު ޕާޓީތަކުން އިންސާފަށް ފެށި ދަތުރު ކާމިޔާބު ވަންދެން އިބޫ އާއި ފައިސަލްއާ އެންމެ ގާތުން މަސައްކަތް ކޮށްދެއްވާނެ ކަމުގެ ޔަގީންކަން ދެއްވައިފަ އެވެ.
އަލީ ވިދާޅުވީ ޖުމްހޫރީ ޕާޓީގެ ކައުންސިލުން ރަނިން މޭޓަކު ކަނޑައެޅުމުގައި އަމަލުކުރި ގޮތަކީ ޑިމޮކްރަސީގެ ރީތި ނަމޫނާއެއް ކަމަށެވެ. އެކަން ބަލައިގަންނަ ކަމަށް ވެސް ވިދާޅުވި އެވެ.
"ހަގީގަތުގައި އެތެރޭގެ ޑިމޮކްރަސީ ޖުމްހޫރީ ޕާޓީގައި އޮތް މިންވަރު ފެނިގެން އެ ދިޔައީ. އެ ނަތީޖާ އަށް އަޅުގަނޑު ވަރަށް އިހްތިރާމްކުރަން،" އަލީ ވިދާޅުވި އެވެ.
އެއާ އެކު މިއަދު ހެނދު ފައިސަލްއާ އެކު އައްޑު އާއި ފުވައްމުލަކަށް ފުރާވަޑައިގެން، އަލީ އެ ގެންދަވަނީ ކެމްޕޭން ކުރައްވަމުންނެވެ. އިދިކޮޅުގެ ކެމްޕޭންގައި އިބޫ އާއި ފައިސަލްއާ އެންމެ ގާތުގައި ހުންނެވި އެއްބޭފުޅަކީ ވެސް އަލީ އެވެ.
"އަޅުގަނޑުމެން މިތިބީ ވަރަށް އެކުގައި، ބަދަހިކޮށް. މި އިންތިޚާބުގައި އަޅުގަނޑުމެންގެ އަމާޒަކީ ރައީސް އަބްދުﷲ ޔާމީން ބަލިކުރުން. އެކަން އަޅުގަނޑުމެން ކާމިޔާބު ކުރާނަން،" އަލީ ހުސެއިން ވިދާޅުވި އެވެ.
ފައިސަލްއާ އެކު ކެމްޕޭނަށް ފުރާވަޑައިގަތުމަކީ، ރަނިން މޭޓަކަށް އޭނާ ނުހޮވުމުން މާޔޫސްވެފައި ތިބި ސަޕޯޓަރުންނަށް ވެސް ލިބުނު ހިތްހަމަޖެހުމެކެވެ. އަދި ކޯލިޝަނަށް ވެސް ލިބުނު ބަދަހި ކަމެކެވެ.
އިންތިޚާބުގައި ބަލި ގަބޫލުކުރުމަކީ ޑިމޮކްރަސީގެ ރީތި މިސާލެވެ؛ އަލީ ހުސެއިން މުޅި ގައުމަށް އެ ދައްކުވައިދެއްވީ އެ ނަމޫނާ އެވެ.
