ރާއްޖޭގެ އަމާންކަން ނަގާލަން ބަޔަކު ރާވަމުންދާ ކަމަށް ޑިފެންސް މިނިސްޓަރު އާދަމް ޝަރީފް ވިދާޅުވީ އަންނަ މަހު ބާއްވާ ރިޔާސީ އިންތިހާބު ފަސްކުރަން ކަމަށް އިދިކޮޅު ކޯލިޝަންގެ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) މިއަދު، ތ. ގާދިއްފުށީގައި ވިދާޅުވެއްޖެ އެވެ.
ގާދިއްފުއްޓަށް ކުރެއްވި ކެމްޕެއިން ދަތުރުގައި ރަށު ރައްޔިތުންނާ ބައްދަލުކުރައްވައި އިބޫ ވިދާޅުވީ ގައުމީ ސަލާމަތަށް ނުރައްކަލެއް އޮތްކަން ޑިފެންސް މިނިސްޓަރުގެ ފޭސްބުކް ސްޓޭޓަސް އިން ހާމަކުރެއްވުމަކީ "ޖޯކެއް" ކަމަށެވެ.
"އަޅުގަނޑުމެން ގަބޫލުކުރަނީ މިއީ އިންތިހާބު ފަސްކުރުމަށާއި ވޯޓު އޮޅުވާލުމާއި ވޯޓުލާން ތިއްބެވި ބޭފުޅުންނަށް ބިރުދެއްކުމަށް ކުރާ ކަމެއްގެ ގޮތުގައި،" އިބޫ ވިދާޅުވި އެވެ.
އެކަމަކު އޭނާ ވިދާޅުވީ ސަރުކާރުން ދައްކާ ބިރަކަށް ޖެހިލުން ނުވާނެ ކަމަށެވެ. އަދި ގައުމަށް ނުރައްކަލެއް ކުރިމަތިވާ ނަމަ ދިފާއުގައި ފުރަތަމަ ނިކުންނަވާނީ ކޯލިޝަންގެ ބޭފުޅުން ކަމަށް ވެސް ވިދާޅުވި އެވެ.
"ޑިފެންސް މިނިސްޓަރަށް ވުރެ ކުރިން ނިކުމެ ތިބޭނީ އަޅުގަނޑުމެން ކޯލިޝަންގެ ބޭފުޅުން،" އިބޫ ވިދާޅުވި އެވެ.
ޑިފެންސް މިނިސްޓަރު، ފޭސްބުކްގައި ކުރެއްވި ޕޯސްޓެއްގައި ރޭ ވިދާޅުވީ، ކުރިއަށް އޮތް ދުވަސްތަކުގައި ގައުމު ހަލަބޮލިކޮށް، އަމަންއަމާންކަން ނަގާލަން ބަޔަކު ރާވަމުންދާ ކަމުގެ މައުލޫމާތު ލިބިފައިވާތީ، އެ ކަންކަން އެމްއެންޑީއެފާއި ފުލުހުން ގުޅިގެން ވަރަށް ގާތުން ބަލަމުން އަންނަ ކަމަށެވެ.