އަންނަ މަހު 23ގައި ބާއްވާ ރިޔާސީ އިންތިހާބަށް ވޯޓު ލުމަށް ރެޖިސްޓްރީވެފައި ހުރީ ކޮން ތަނެއްކަން ބެލުމަށް ހަމަޖައްސާފައިވާ "1414"އިގެ ހިދުމަތް މެދުކެނޑިއްޖެ ކަމަށް އިލެކްޝަންސް ކޮމިޝަނުން (އީސީ) ބުނެފި އެވެ.
މި ހިދުމަތް މެދުކެނޑުނީ އީސީގެ އިންޓަނެޓް ހިދުމަތް ރޭގެ ވަގުތެއްގައި ކެނޑިފައިވުމުން ކަމަށާއި، މި ހިދުމަތް ބޭނުން ކުރާ ފަރާތްތަކަށް ކުރިމަތިވާ ދަތިތަކާ މެދު އެ ކޮމިޝަނުން ވަނީ މައާފަށް އެދިފަ އެވެ. މީގެ އިތުރުން މި ނިޒާމްގެ ހިދުމަތް އަލުން ދިނުމަށް މަސައްކަތް ކުރަމުން އަންނަ ކަމަށް ވެސް އީސީ އިން ބުންޏެވެ.
ރިޔާސީ އިންތިހާބަށް ކުޑަ ދުވަސްކޮޅަކަށް ވެފައިވާ އިރު އަދިވެސް ރީ-ރަޖިސްޓްރީކުރުމުގެ މަސައްކަތް ނިމިފައެއް ނުވެއެވެ. ރީ-ރަޖިސްޓްރީކުރުމުން ހުށަހެޅި ފޯމުތަކުގެ ތެރެއިން ބާތިލްވި 5626 ފޯމު އަލުން ރީ-ރަޖިސްޓްރީ ކުރުމަށާއި، ވޯޓާސް ލިސްޓުގައި ހުރި މައްސަލަތަކާ މެދު ޝަކުވާ ހުށަހެޅުމަށް ހަމަޖެހިފައިވާ އެންމެ ފަހު ވަގުތަކީ މިއަދު ހަވީރު 6:00 އެވެ.
