އިންތިހާބަށް ހުރަސް އަޅަން ނުރައްކާތެރި ހަމަނުޖެހުން ހިންގަން އެބައުޅޭ: ފުލުހުން

މިމަހު 23ގައި، ބާއްވާ ރިޔާސީ އިންތިހާބަށް ހުރަސް އެޅުމަށް ގައުމުގައި ނުރައްކާތެރި ހަމަނުޖެހުންތަކެއް ހިންގަން އުޅޭ ކަމުގެ މައުލޫމާތު ލިބިފައިވާ ކަމަށް ފުލުހުން މިއަދު ބުނެފި އެވެ.

އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ފުލުހުންގެ ތަރުޖަމާނު އަހުމަދު ޝިފާން ވިދާޅުވީ ގައުމު ހަލަބޮލިކޮށް ހަމަނުޖެހުން ހިންގަން އުޅެނީ އިންތިހާބު އިންސާފުވެރި ނޫން ކަމަށް ބޭރުގެ ގައުމުތަކަށް ދެއްކުމަށް ކަމަށެވެ.

"ސެޕްޓެމްބަރު، 23ގައި، ބާއްވާ އިންތިހާބަކީ އިންސާފުވެރި އިންތިހާބެއް ނޫން ކަމަށް ބޭރުގެ ބައެއް ފަރާތްތަކަށް ދެއްކުމުގެ ގޮތުން ނުރައްކާތެރި ބައެއް އަމަލުތައް ރާވަމުންދާ ކަމުގެ މައުލޫމާތު ފުލުހުންގެ އިންޓެލިޖެންސަށް ވަނީ ލިބިފައި،" ޝިފާން ވިދާޅުވި އެވެ. "ފުލުހުން ހިންގާ ބައެއް ތަހުގީގުތަކަށް މިކަމުގެ މައުލޫމާތު ލިބިފައިވާކަން ވެސް ދަންނަވާލަން."

މި މައްސަލައިގެ މައުލޫމާތު ފުލުހުންނަށް ލިބިފައިވީ ނަމަވެސް މިކަމުގައި މީހަކު ހައްޔަރުކޮށްފައިވާކަމަކަށް ފުލުހުން ނުބުނެ އެވެ.

ހަމަނުޖެހުން ހިންގަން އުޅޭ ފަރާތްތަކުން ރާވަމުން ދަނީ ފެބްރުއަރީ، 8، 2012ގައި ހިނގައިދިޔަ ފަދަ ބޮޑެތި ހަމަނުޖެހުން ހިންގުމަށް ކަމަށް ޝިފާން ވިދާޅުވި އެވެ.

"އެނގިވަޑައިގަންނަވާނެ ފަދައިން 2012 ވަނަ އަހަަރުގެ ފެބްރުއަރީ އަށް ވަނަ ދުވަހު ދައުލަތާއި ފުލުހުންނާއި އާންމު ބައެއް ފަރާތްތަކުގެ އަގު ބޮޑެތި މުދާ ރޯކޮށް އެ ފަރާތްތަކުގެ މުދަލަށް ވަނީ ވަރަށް ބޮޑެތި ގެއްލުންތަކެއް ދީފައި. މިފަދަ އަމަލުތަކެއް ތަކުރާރުކޮށް ރިޔާސީ އިންތިހާބަކީ މިނިވަން އަދި އިންސާފުވެރި އިންތިހާބެއް ނޫންކަން ބޭރުގެ ބައެއް ފަރާތްތަކަށް ދެއްކުމަށްޓަކައި މިފަދަ އަމަލުތައް ތަކުރާރު ކުރުމަށް ބައެއް ފަރާތްތަކުން ރާވައި އަދި މިކަން ކުރުމުގެ ބައެއް މަސައްކަތްތައް ކުރެވެމުންދާ ވާހަކަ ދަންނަވާލަން،" އޭނާ ވިދާޅުވި އެވެ.

ގައުމުގައި ހަމަނުޖެހުން އުފައްދަން އުޅެނީ ސީދާ ރިޔާސީ އިންތިހާބަށް ހުރަސް އެޅުމަށް ކަމަށް ފުލުހުން ގަބޫލު ކުރާ ކަމަށް ވެސް ޝިފާން ވިދާޅުވި އެވެ.

"މިކަމަކީ ސީދާ ރިޔާސީ އިންތިހާބަށް ހުރަސް އެޅުމުގެ ގޮތުން ކުރާ ކަމެއްކަން އަޅުގަނޑުމެން ގަބޫލު ކުރަން. އަދި ރިޔާސީ އިންތިހާބަކީ މިނިވަން އަދި އިންސާފުވެރި އިންތިހާބެއް ކަމާއި މިކަމާ ބެހޭ ގޮތުން ސުވާލު އުފައްދައި ދިވެހިރާއްޖޭގެ ހަމަޖެހުމާއި އަމާންކަމަސް ބުރޫ އެރުވުމުގެ ގޮތުން ބައެއް ފަރާތްތަކުން ކުރާ އަމަލުތަކެއް ކަމުގައި ފުލުހުން ދެކެން،" އޭނާ ވިދާޅުވި އެވެ.

ރިޔާސީ އިންތިހާބުގެ ނަތީޖާ ނިކުންނަ ގޮތަކުން ވެސް ހަމަނުޖެހުން ހިންގަން މަސައްކަތް ކުރަމުން އަންނަ ކަމަށް ފުލުހުން ބުންޏެވެ.

"އަދި މީގެ އިތުރުން މި އިންތިހާބުގެ ނަތީޖާ ނިކުންނަ ގޮތަކުން ނުރައްކާތެރި ބައެއް އަމަލުތައް ހިންގަން ތައްޔާރުވަމުންދާ ކަމުގެ މައުލޫމާތު ވެސް ފުލުހުންނަށް ވަނީ ލިބިފައި،" ޝިފާން ވިދާޅުވި އެވެ.

މީގެ އިތުރުން ޝިފާން ވިދާޅުވީ ނުރައްކާތެރި އެއްވެސް އަމަލެއް ހިންގާ ފަރާތްތައް ހޯދައި ގާނޫނީ އެންމެ ހަރުކަށި އަދަބު ދޭނެ ކަމަށެވެ.

"މިފަދަ އެއްވެސް އަމަލެއް ކުރުމުގެ ފުރުސަތު ފުލުހުން ނުދޭނެ ވާހަކަ ދަންނަވާލަން. އަދި މިފަދަ އެއްވެސް ކަމެއް ނުކުރުމަށް، މިފަދަ އެއްވެސް ކަމެއް ރާވައި ކުރުމުގެ ވިސްނުން ހުރި ފަރާތްތަކަށް ދަންނަވާލަން. އަދި މިފަދަ އެއްވެސް އަމަލެއް ހިންގައިފި ނަމަ އެކަމުގައި ޝާމިލްވާ ފަރާތްތަކާއި އެކަންކަމަށް ހިތްވަރުދޭ ފަރާތްތައް ހޯދައި އެމީހުންނާމެދު ގާނޫނީ އެންމެ ހަރުކަށި ފިޔަވަޅު އަޅާނެ ވާހަކަ ވެސް ދަންނަވަން،" އޭނާ ވިދާޅުވި އެވެ.