އާބާދީގެ ތިން ބައިކުޅަ އެއްބައި ދިރިއުޅޭ ވެރިރަށް މާލޭގެ ކުލި ކޮންޓްރޯލް ކުރުމަކީ ހައްލެއް ނޫން ކަމަށާއި އިގްތިސާދީ ގޮތުން ވިސްނައިފި ނަމަ ހައްލެއް ލިބޭނީ ގެދޮރުގެ ސަޕްލައި އިތުރުކޮށްގެން ކަމަށް ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.
ގައުމީ ޔުނިވާސިޓީން އިންތިޒާމްކޮށްގެން ބޭއްވި "ރިޔާސީ ބަހުސް" ގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، މާލޭ ސަރަހައްދުގައި ދިރިއުޅެން ބޭނުންވާ މީހުންނަށް އެ ފުރުސަތު ލިބެންވާނެ ކަމަށެވެ. އަދި މިހާރު ވެސް ގިނަ އަދަދެއްގެ ބަޔަކު މާލޭގައި ދިރިއުޅޭކަން ފާހަގަ ކުރައްވަމުން ރައީސް ޔާމީން ވިދާޅުވީ އާބާދީގެ ބޮޑު ބައެއް މި ސަރަހައްދުގައި ދިރިއުޅުމަކީ މައްސަލައެއް ނޫން ކަމަށެވެ.
"އަޅުގަނޑު ހުށަހަޅާފައި އެ އޮތީ އެއްވެސް ގޮތަކަށް މަޖުބޫރު ކޮށްގެން ރައްޔިތުންގެ ތެރެއިން ބަޔަކު ގްރޭޓާ މާލެ އޭރިއާއަށް އަންނާކަށެއް ނޫން. ގްރޭޓާ މާލެ އަކީ ކޮން ތަނެއްތޯ؟ ގްރޭޓާ މާލޭގައި ތިބި ހުރިހާ އެންމެންނަކީ ގެދޮރު ތިބި މީހުންތޯ؟ މާލޭގައި ތިބި މީހުންގެ ގެދޮރު ނެތިގެން އަޅުގަނޑު ފުރަތަމަ ވާހަކަ ދައްކަމުން ދެންނެވީ އެތައް ބައިވަރު އެޕާޓްމަންޓުތަކެއް ބޮޑު އަގުގައި ހިފައިގެން އެބަ ދިރިއުޅެއޭ. ރަށްރަށުން ވަޑައިގެން ތިއްބެވި އަޅުގަނޑުމެންގެ ގާތް އަހުންނާއި އުހްތުން އެ ތިބީ. އަޅުގަނޑުމެން މާލޭގައި ދިރިއުޅެންޏާ ކީއްވެގެންތޯ އެއިން މީހަކަށް ލާރި ދައްކާ ކަމަށްވާ ނަމަ އެއިން މީހަކަށް މާލޭގައި ދިރިނޫޅެވޭންވީ،" ރައީސް ވިދާޅުވި އެވެ.
މާލޭގެ ގެދޮރުގެ އަގު ބޮޑުވެގެން އެމަނިކުފާނާ އެ ސުވާލު މީގެ ކުރިން ވެސް ކޮށްފައިވާ ކަމަށް ރައީސް ވިދާޅުވި އެވެ. ނަމަވެސް އެ އަގުތައް ތިރި ކުރުމަށްޓަކައި މާލޭގެ ކުލި ގާނޫނަކުން ކޮންޓްރޯލް ކުރުމަކީ ލިބޭނެ ހައްލެއް ނޫން ކަމަށް ވެސް ވިދާޅުވި އެވެ.
"އެ ދިރިއުޅޭ އަގަކީ ބޮޑު އަގެއް ކަމަށް އަޅުގަނޑާ ސުވާލު ކުރެއްވި. އެކަމަކު އަޅުގަނޑު ދެންނެވިން އަޅުގަނޑަކަށް އަގެއް ކުޑައެއް ނުކުރެވޭނެއޭ މީގެ ސަޕްލައި އިތުރުކޮށްގެން ނޫނީ ވިއްޔާ. އެހެން ނޫނީ އިގްތިސާދީ ނަޒަރަކުން މިއެއް ވޯކެއް ނުކުރާނެ. މީހުންތަކެއް ކުށްވެރިވާނީ ގާނޫނެއް ހަދައިގެން މިކަން ކުރަންވެއްޖެއްޔާ،" ރައީސް ޔާމީން ވިދާޅުވި އެވެ.
މާލޭގެ ގެދޮރުގެ އަގުތައް ކޮންޓްރޯލް ކުރެވޭނެ ގޮތަކީ އިގްތިސާދީ ގޮތުން ވިސްނައި، ޑިމާންޑަށް ވުރެ ސަޕްލައި އިތުރުކޮށްގެން ކަމަށް ވެސް ރައީސް ޔާމީން ވިދާޅުވި އެވެ.
"މީގައި އޮތް ހަމައެކަނި ހައްލަކި އިކޮނޮމިކް ސޮލިއުޝަނެއް. އެއީ ޑިމާންޑަށް ވުރެ ބޮޑަށް ސަޕްލައި އިތުރު ކުރުން. އެހެންވީމާ އަޅުގަނޑު ކުރާ މަސައްކަތަކީ މިހާރު ގެދޮރުވެރިކަމުގެ ޑިމާންޑް މާލޭ އޭރިއާގައި މި އުޅުއްވާ ބޭފުޅުން ތަންތަން ކުއްޔަށް ހިފައިން އުޅޭ ޑިމާންޑަށް ވުރެ ބޮޑު ސަޕްލައި އެއް އަޅުގަނޑު މި ކްރިއޭޓް ކުރަނީ ހިޔާ މަޝްރޫއުގެ ދަށުން ގެދޮރުވެރި ކުރުވަން. ކުރުވީމަ މާލޭގައި މިހާރު ކުއްޔަށް ދޭ ތަންތަނުގެ އަގުތައް ވެސް ތިރިވެގެންދާނެ،" އެމަނިކުފާނު ވިދާޅުވި އެވެ.
މީގެ އިތުރުން ރައީސް ވިދާޅުވީ، އެމަނިކުފާނުގެ ސިޔާސަތުގެ ދަށުން ރައްޔިތުންނަށް ދެނީ ކުޑަ އަގެއްގައި މާލޭ ސަރަހައްދުގައި ދިރިއުޅޭނެ ފުރުސަތެއް ކަމަށެވެ.
"އެހެންވީމާ މާލޭގައި ދިރިއުޅޭ ސަރަހައްދުގަ މިހާރު އަގުބޮޑުކޮށް ބޮޑު އަގުގައި ކުއްޔަށް އުޅޭ މީހުންނަށް އަޅުގަނޑު ހޯދައިދޭ ޗޮއިސްއެއް މިއީ. އެހެންވީމާ އެމީހުންގެ ޗޮއިސްއެއް ބޮޑު އަގުގައި މާލޭގައި ތިބޭނީތޯ ނޫނީ ރައީސް ޔާމީންގެ ޑްރީމަށް ހުޅުމާލެ އަށް އަންނާނީތޯ،" ރައީސް ވިދާޅުވި އެވެ.
