މަސައްކަތުގެ ދާއިރާގެ ތެރޭގައި ވަކި މީހެއްގެ މަސްލަހަތެއް އަދި ނުފޫޒެއް ވެސް އޭނާއަށް ނުފޯރާނެ ކަމަށް އާ ޕޮލިސް ކޮމިޝަނަރު ހަމްދޫން ރަޝީދު މިއަދު ވިދާޅުވެއްޖެ އެވެ.
މިދިޔަ މަހުގެ 23 ގައި ބޭއްވި ރިޔާސީ އިންތިޚާބާ ގުޅޭ އޮޕަރޭޝަންގައި ފުލުހުންގެ އިސް ކޮމާންޑަރެއްގެ ގޮތުގައި ހުންނެވި ހަމްދޫނަށް ޕޮލިސް ކޮމިޝަނަރުކަން، ރައީސް އަބްދުﷲ ޔާމީން މިއަދު ދެއްވުމާ ގުޅިގެން "މިހާރު" އަށް އޭނާ ވިދާޅުވީ ވަކި މީހެއްގެ މަސްލަހަތުގައި މަސައްކަތް ނުކުރައްވާނެ ކަމަށާއި އެފަދަ ނުފޫޒެއްވެސް ނެތް ކަމަށެވެ.
އިންތިޚާބީ ރައީސް އިބްރާހިމް މުހައްމަދު ސޯލިހް (އިބޫ) ވެރިކަމާ ހަވާލުވެވަޑައިގަންވަން ދޮޅު މަހެއްހާ ދުވަހަށް ވެފައި ވަނިކޮށް ރައީސް ޔާމީން، ހަމްދޫނަށް ޕޮލިސް ކޮމިޝަނަރުކަން ދެއްވުމުން ތަފާތު ވާހަކަތައް ދަނީ ދެކެވެމުންނެވެ.
އަލަށް އުފެދޭ، އިދިކޮޅު ކޯލިޝަންގެ ސަރުކާރަށް އެއްބާރުލުން ދެއްވާނެތޯ ދެންނެވުމުން ސީޕީ ހަމްދޫން ވިދާޅުވީ، ގާނޫނު ތަންފީޒު ކުރައްވާނީ ވަކި ސަރުކާރެއް އޮވެގެން ނޫން ކަމަށެވެ.
"ފުލުހުން އަމަލު ކުރަންވީ ގޮތް ގާނޫނުގައި އެބަވޭ. އަޅުގަނޑުމެންނަކީ އަމަންއަމާންކަން ބަލަހައްޓާ ފަރާތްތައް. ފުލުހުން މަސައްކަތް ކުރާނީ އެގޮތުގެ މަތިން. ވަކި ބޭފުޅެއްގެ މަސްލަހަތު [އަޅުގަނޑަށް] މުހިންމެއް ނޫން. މުހިންމީ ރައްޔިތުންގެ ރައްކާތެރިކަމާއި މަސްލަހަތު،" ހަމްދޫން ވިދާޅުވި އެވެ.
ހަމްދޫން ވިދާޅުވިގޮތުގައި، އޭނާއަށް ކުރާ ބައެއް ތުހުމަތުތަކަކީ ސޯޝަލް މީޑިއާގައި ދައުރުވާ އަސާސެއް ނެތް ވާހަކަތަކެކެވެ. އެހެންވެ، އެ ކަންކަމަށް ވަކި ޖަވާބެއް ދެއްވަން ބޭނުން ނުވާ ކަމަށް ވިދާޅުވި އެވެ.
އެކްޓިން ކޮމިޝަނާ އޮފް ޕޮލިސްގެ މަގާމުގައި މިހާތަނަށް ހުންނެވި ޑެޕިއުޓީ ކޮމިޝަނަރު އަބްދުﷲ ނަވާޒް، ވަނީ އެންވަޔަރުމެންޓް މިނިސްޓްރީގެ ޑެޕިއުޓީ މިނިސްޓަރަކަށް މިއަދު އައްޔަން ކުރައްވައިފަ އެވެ.