ރައީސް އަބްދުﷲ ޔާމީންގެ ވެރިކަމުގެ ދައުރު އަންނަ ހޮނިހިރު ދުވަހަށް ހަމަވާތީ، އެމަނިކުފާނުގެ އާއިލާ ސަރުކާރުގެ ރަސްމީ ގެކޮޅު ހިލާލީގެ އިން އަމިއްލަ ގެކޮޅަށް މާދަމާ ބަދަލުވެވަޑައިގަންނަވާ ގޮތަށް ނިންމަވައިފި އެވެ.
ރައީސް ޔާމީން ބަދަލުވެވަޑައިގަންނަވަނީ އެނގިފައިވާ ގޮތުގައި، އަމިއްލަ ގެކޮޅު، ހ. ދޫވެއްސަށެވެ. ބޮޑުތަކުރުފާނު މަގުގައި، އިމާރާތް ކުރަމުން އަންނަ އެ ގެކޮޅުގެ ފުރަތަމަ ދެ ފްލޯ މިހާރު ވަނީ ނިންމައިފަ އެވެ. މިހާރު ކުރަނީ އެ ދެ ފްލޯގެ އެންމެ ފަހުގެ މަސައްކަތްތަކެވެ.
ރައީސް ޔާމީން، ހިލާލީ ގެއިން ބަދަލުވެވަޑައިގަތުމާ ގުޅޭ ގޮތުން، ރައީސް އޮފީހުގެ ތަރުޖަމާން އިބްރާހިމް މުއާޒް އަލީ ވާހަކައެއް ނުދެއްކެވި އެވެ. އެމަނިކުފާނުގެ ރިޔާސީ ދައުރު ނިމި، އިންތިޚާބީ ރައީސް އިބްރާހިމް މުހައްމަދު ސޯލިހް (އިބޫ) އާއި ނައިބު ރައީސް ފައިސަލް ނަސީމް އަންނަ ހޮނިހިރުދުވަހު ހުވާކުރައްވައި މަގާމާ ހަވާލުވެވަޑައިގަންނަވާނެ އެވެ.
އިބޫ، ދިރިއުޅުއްވާނީ މި ވެރިކަމުގައި ރައީސް ޔާމީންގެ އަނބިކަނބަލުން ފަސްޓް ލޭޑީ ފާތުމަތު އިބްރާހީމްގެ އޮފީހެއްގެ ގޮތުގައި ބޭނުން ކުރެއްވި މުލިއާގޭގަ އެވެ. ފައިސަލް ދިރިއުޅުއްވާނީ، މިހާތަނަށް ލިބުނު މައުލޫމާތުން އެނގޭ ގޮތުގައި، ހިލާލީގޭގަ އެވެ.
ރައީސާއި ނައިބު ރައީސުން ދިރިއުޅުއްވާނެ ގެކޮޅާ އެކު ހިމާޔަތާއި ރައްކާތެރިކަން ދޭން ގާނޫނުން އޮތީ ލާޒިމްކޮށްފަ އެވެ.
ރައީސް ޔާމީން ވެރިކަމާ ހަވާލުވެވަޑައިގެން ފުރަތަމަ ދިރިއުޅުއްވީ އަމިއްލަ ގެކޮޅު ގ. ދޫވެހީގަ އެވެ. ރައީސަކު ދިރިއުޅުއްވަން އެކަށީގެންވާ މިންވަރަށް އެތަނުގައި ސަލާމަތާއި ރައްކާތެރިކަން ގާއިމްކުރަން، އެތަން މަރާމާތުކުރަން ދައުލަތުގެ ބަޖެޓުން ބޮޑު ހޭދައެއް ވެސް ކުރި އެވެ. އެކަމަކު އެ ގެކޮޅު ވިއްކާލައްވައި، ހެންވޭރުން ބިމެއް ބައްލަވައިގެން، އެ ބިން ދޫވެހީގެ ނަމުގައި އިމާރާތް ކުރައްވަން ފެއްޓެވީ އެވެ.
ރައީސް ޔާމީން ހިލާލީގެއަށް ބަދަލުވެވަޑައިގަތީ، ބޮޑުތަކުރުފާނުމަގުގައި ހުންނަ ހ. ނޫފަރުގެ އާއި ދޫވެހި ބަދަލުކުރުމުގެ ދުވަސްކޮޅެއް ކުރިންނެވެ. އެ މުއާމަލާތް ހިންގި ގޮތާ މެދު ވަރަށް ބޮޑަށް ފާޑުކިއުން އަމާޒުވި އެވެ. އަދި، ރައީސަކަށް ހުންނަވައި، މާލޭގައި އިމާރާތް ކުރުމުގެ ހުއްދަ ދީފައިވާ އެންމެ އުހަށް އަމިއްލަ ގެކޮޅު ހައްދަވަން ފެއްޓެވެމުން ވެސް ރައީސް ޔާމީނަށް ތުހުމަތުތަކެއް ކުރި އެވެ.
އެ ގެކޮޅު އިމާރާތް ކުރެއްވުމުގައި ދައުލަތުގެ ފައިސާ ހިމެނޭނެ ކަމަށް ކުރި ތުހުމަތުތައް، ރައީސް ޔާމީން ވަނީ ދޮގުކުރައްވައިފަ އެވެ.
އެމަނިކުފާނު ދިރިއުޅުއްވި ރަސްމީ ގެކޮޅު، ހިލާލީގޭގެ ޚަރަދަށް މި އަހަރު 37 މިލިއަނަށްވުރެ ގިނަ ރުފިޔާ ޚަރަދު ވާނެ ކަމަށް ލަފާކުރެވޭ ކަމަށް، އަންނަ އަހަރަށް ލަފާކުރާ ދައުލަތުގެ ބަޖެޓުގައި ބުނެފައިވެ އެވެ.