"ފިނިފެންމާ" ލޯންޗުކޮޅު ގޮއްވާލި މައްސަލާގައި ކުރީގެ ނައިބު ރައީސް އަހުމަދު އަދީބު އޭނާ ކައިރީ ދެއްކެވި ވާހަކަތައް ގަބޫލުކުރެއްވޭ ކަމަށް ކުރީގެ ފިޝަރީޒް މިނިސްޓަރު ޑރ. މުހައްމަދު ޝައިނީ މިއަދު ވިދާޅުވެއްޖެ އެވެ.
މިހާރު ގޭ ބަންދުގައި ހުންނެވި އަދީބާ ބައްދަލުކުރެއްވުމަށް ފަހު ކުރެއްވި ޓްވީޓެއްގައި "ފިނިފެންމާ" ލޯންޗުކޮޅުގެ ނަން ޝައިނީ ގެންނަވާފައެއް ނުވެ އެވެ. އޭގެ ބަދަލުގައި އޭނާ ލިއުއްވީ "ލޯންޗުގެ ގޮވުމުގައި އަހަރެން މަރާލަން މަސައްކަތްކުރީ ކާކުތޯ ސާފުކޮށްދޭތޯ" އަދީބާ އޭނާ ބައްދަލުކުރެއްވި ކަމަށެވެ.
"އެކަމުގައި އޭނާ ދެއްކެވި ވާހަކަ ވަރަށް ބޮޑަށް ގަބޫލުކުރެވެ އެވެ،" ޝައިނީ ލިއުއްވި އެވެ.
އެކަމަކު އޭރުގެ ރައީސް އަބްދުﷲ ޔާމީންގެ ދެމަފިރިކަނބަލުން ދަތުރުކުރެއްވި "ފިނިފެންމާ" ލޯންޗުކޮޅު ގޮއްވާލުމާ ބެހޭ ގޮތުން އަދީބު ދެއްކެވި ވާހަކަ ޝައިނީ އާންމެއް ނުކުރައްވަ އެވެ. އިތުރު މައުލޫމާތެއް ހޯދަން "މިހާރު"ން ސުވާލު ދެންނެވުމުން ހަމައެކަނި ވިދާޅުވީ "އެކަށީގެންވާ ހެކި ނެތި އެއްވެސް މީހެއްގެ ބޮލުގައި ތުހުމަތެއް އަޅުވަން ބޭނުން ނުވާ" ކަމަށެވެ.
ލޯންޗުކޮޅު ގޮވި އިރު އޭގައި ޝައިނީ ވެސް ދަތުރުކުރެއްވި އެވެ. އެހެންކަމުން އަދީބާ ބައްދަލުކުރެއްވުމުގެ މަގުސަދެއް ކަމަށް އޭނާ އާންމުންނަށް ދައްކަވާފައި އެވަނީ އޭނާ އަވަހާރަކޮށްލަން މަސައްކަތްކުރީ ކާކުތޯ ސާފުކުރުމެވެ.
އެ ގޮވުމުގައި ޝައިނީއަށް އެއްވެސް އަނިޔާއެއް ލިބިވަޑައެއް ނުގަންނަވަ އެވެ.
އޭނާ އަރިހުގައި އަދީބު ދެއްކެވީ ކޮންމެ ކަހަލަ ވާހަކައެއް ނަމަވެސް، "ފިނިފެންމާ" ލޯންޗު ގޮއްވާލުމުގައި ބައިވެރިވުމުގެ ކުށް ސާބިތުވެ އަދީބަށް ވަނީ ކްރިމިނަލް ކޯޓުން 15 އަހަރުގެ ޖަލު ހުކުމެއް އިއްވައިފަ އެވެ.
އެ މައްސަލާގެ އިސްތިއުނާފުގެ އަޑު އެހުންތައް މިހާރު ހައި ކޯޓުގައި ވަނީ ފަށައިފަ އެވެ.
ޔާމީނާ ދެކޮޅަށް އަދީބު ނުކުންނެވުމުގެ ކުރިން އޭނާ އާއި ޝައިނީ އަކީ ވަރަށް ކައިރިން މަސައްކަތް ކުރެއްވި ދެ ބޭފުޅުންނެވެ. އަދީބު އިސްވެ ހުންނެވި ގިނަ ހަރަކާތްތަކެއްގައި އޭނާ ބައިވެރިވެވަޑައިގަތެވެ.
ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި ހެންވޭރު އުތުރު ދާއިރާއަށް ވާދަކުރައްވަން ޕީޕީއެމްގެ ޓިކެޓް ޝައިނީއަށް ރޭ ވަނީ ދީފަ އެވެ. އެހެންކަމުން މިހާރު އުފެދޭ ސުވާލަކީ އަދީބާ އޭނާ ބައްދަލުކުރެއްވީ ޕީޕީއެމްގެ ރައީސް ޔާމީނަށް އެނގިވަޑައިގެންތޯ ނުވަތަ ނޫންތޯ އެވެ.
"ފިނިފެންމާ" ލޯންޗުގެ ގޮވުމަކީ އަދީބު ސީދާ އެމަނިކުފާނަށް އަމާޒުކުރެއްވި ހަމަލާއެއް ކަމަށް އެތައް ފަހަރު ޔާމީން ވަނީ ވިދާޅުވެފަ އެވެ. އޭގެ އިތުރުން ސްރީ ލަންކާގެ ސްނައިޕަރެއް ބޭނުންކުރަން ވެސް އަދީބު މަސައްކަތްކުރެއްވި ކަމަށް ވިދާޅުވި އެވެ.
ހައްޖުގެ އަޅުކަމަށް ފަހު ހުޅުލެއިން މާލެ ވަޑައިގެންނެވި ދަތުރުފުޅުގައި ސެޕްޓެމްބަރު 28، 2015 ގައި ލޯންޗުކޮޅު ގޮއްވާލި ފަހުން އަދީބު ވީ ޔާމީންގެ އެންމެ ބޮޑު ދުޝްމަނަށެވެ. އެހެންކަމުން ޕީޕީއެމްގެ ޓިކެޓް ވެސް ލިބިވަޑައިގެންފައި ވަނިކޮށް އަދީބާ ކުއްލި ގޮތަކަށް ޝައިނީ ބައްދަލުކުރެއްވި ކުރުމާ މެދު ސުވާލު އުފެދެ އެވެ.