ހުޅުމާލޭގައި ހައުސިން މަޝްރޫއުތަކެއް ހިންގަން ހަވާލުވި ސީ ލައިފުން މަކަރާއި ހީލަތް ހެދި މައްސަލަ، އެންޓި ކޮރަޕްޝަން ކޮމިޝަން (އޭސީސީ) އިން ނުބަލާ ކަމަށް ބުނެ ރިޔާސީ ކޮމިޝަނަށް މިއަދު އެ މައްސަލަ ހުށަހަޅައިފި އެވެ.
ބުކިން ފީ އާއި އެޕާޓްމަންޓްތަކުގެ އެޑްވާންސްގެ ގޮތުގައި އެތަައް ބައެއްގެ އަަތުން ފައިސާ ނެގުމަށް ފަހު ސީ ލައިފް ވަނީ "ގެއްލިފަ" އެވެ. އެ ޓަވަރުގެ ފައުންޑޭޝަން ނޫން އެހެން މަސައްކަތެއް ކޮށްފައެއް ނުވެ އެވެ. އެހެންކަމުން އެ ފައިސާ ހޯދަން އޭގެ ތެރެއިން 200 އަށް ވުރެ ގިނަ މީހުން ވަނީ ކޯޓަށާއި ފުލުހުންނަށް މައްސަލަ ހުށައަޅައިފަ އެވެ.
ކުރިން ދިވެހި ބައެއް ލަވަތައް ޕްރޮޑިއުސްކޮށް، އަދި ބައެއް ލަވަތަކުގައި އެކްޓްކޮށްފައިވާ އަހުމަދު މޫސާ (އަންމަޓީ) މެނޭޖިން ޑިރެކްޓަރަކަށް ހުރި ކުންފުނިން އަނބުރާ ދޭން ޖެހޭ ފައިސާގެ އަދަދު 20 މިލިއަން ރުފިޔާއަށް ވުރެ ބޮޑުވާނެ ކަމަށް ބެލެވެ އެވެ.
އޭނާ މިހާރު ދިރިއުޅެނީ ސްރީ ލަންކާގައި ކަމަށް ވެ އެވެ.
ސީ ލައިފްގެ މައްސަލަ މިދިޔަ އޮކްޓޫބަރު މަހު އޭސީސީއަށް ހުށަހެޅީ އެ ޕްރޮޖެކްޓް ދިނުމުގައި އެޗްޑީސީން ކޮރަޕްޝަންގެ އަމަލެއް ހިންގާފައިވޭތޯ ބަލައި ދިނުމަށް އެދި އެވެ. މައްސަލަ ހުށަހެޅީ އެ ޕްރޮޖެކްޓުން ފްލެޓު ގަތުމަށް ކުރިއާލާ ފައިސާ ދެއްކި މީހުންގެ ތެރެއިން 201 މީހަކު ތަމްސީލުކުރާ ގާނޫނީ ވަކީލް މަރިޔަމް ޝުނާނާ އެވެ.
ޝުނާނާ މިއަދު ވަނީ ކޮރަޕްޝަންގެ މައްސަލަތައް ބަލަން ދާދި ފަހުން ރައީސް އިބްރާހިމް މުހައްމަދު ސޯލިހު އުފެއްދެވި ރިޔާސީ ކޮމިޝަނަށް އެ މައްސަލަ ހުށަހަޅައިފަ އެވެ.
ޝުނާނާ ވިދާޅުވީ ރިޔާސީ ކޮމިޝަނަށް މައްސަލަ ހުށަހެޅީ އެ މައްސަލައާ ބެހޭ ގޮތުން މިހާތަނަށް ބަޔާނެއް ވެސް ނަގަން ގުޅާފައިނުވާތީ މިހާ ދުވަސް ވީއިރު ވެސް އޭސީސީން އެކަން ބަލާކަމަށް ނުފެންނާތީ ކަމަށެވެ.
"އޭސީސީން މި މައްސަލަ ބަލާފައިނުވަނީ އެ ކޮރަޕްޝަންގެ އަމަލުގައި އެ ކޮމިޝަންގެ އިސް ވެރިން ބައިވެރިވެފައިވާތީ ކަމަށް ތުހުމަތުކުރެވޭތީ ރިޔާސީ ކޮމިޝަނުން އެ މައްސަލަ ބަލައިދިނުމަށް އެދުނީ،" ޝުނާނާ ވިދާޅުވި އެވެ.
އެސެޓް ރިކަވަރީ ކޮމިޝަންގެ ރައީސް އަހުމަދު އައްސަދަށް ފޮނުވި ސިޓީއާ އެކު، ސީ ލައިފަށް ފައިސާ ދެއްކި 201 މީހުންގެ ލިޔެކިޔުންތައް ވެސް ވަނީ ހުށަހަޅައިފަ އެވެ.
މި ކަމާ ބެހޭ ގޮތުން އޭސީސީގެ ބަހެއް ލިބޭ ގޮތެއް ނުވި އެވެ.
ސީ ލައިފްގެ މަކަރާއި ހީލަތުގެ މައްސަލަ ފުލުހުން ވެސް މިހާރު އަންނަނީ ތަހުގީގުކުރަމުންނެވެ. އެގޮތުން ފުލުހުން ވަނީ އެ މައްސަލާގައި ގެއްލުމެއް ލިބިފައިވާ އިތުރު ބަޔަކު ތިބި ނަމަ އޭގެ ލިޔެކިޔުންތައް ހުށަހަޅަން އިއުލާން ވެސް ކޮށްފަ އެވެ.
ފުރަތަމަ ފިޔަވަހީގައި ސީ ލައިފުން 300 އެޕާޓްމަންޓް ހަދަން ހުޅުވައިލުމުން 280 އަށް ވުރެ ގިނަ މީހުން ރަޖިސްޓްރޭޝަން ފީގެ ގޮތުގައި 50،000ރ ވަނީ ދައްކައިފަ އެވެ. އޭގެ އިތުރުން ބައެއް މީހުން ޑައުންޕޭމަންޓްގެ ގޮތުގައި 20 ޕަސެންޓަށް ވާ ފައިސާ ވެސް ދައްކާފައިވާ ކަމަށްވެ އެވެ. މިހާތަނަށް އެނގިފައިވާ ގޮތުގައި ސީ ލައިފުން އަނބުރާ ދައްކަން ޖެހޭ ފައިސާގެ މިންވަރު 20 މިލިއަން ރުފިޔާއަށް ވުރެ މަތިވާނެ އެވެ. މަސައްކަތް ކުރިއަށް ނުދާތީ ބައެއް ކަސްޓަމަރުން ސީ ލައިފްގެ ވެރިންގެ ފަހަތުން ދުވެގެން ފައިސާ ހޯދާފައިވެ އެވެ. އެ ކުންފުނީގެ އޮފީހެއް ވެސް މިހާރު ނުހުރެ އެވެ.