އިންޑިއާ އިން ދިން އެހީގައި ހިމެނެނީ ބަޖެޓް ސަޕޯޓަށް 200 މިލިއަން ޑޮލަރާއި ސަރުކާރުން ބޭނުންވާ މަޝްރޫއުތަކަށް ދިން 800 މިލިއަން ޑޮލަރު އަދި ކަރެންސީ ސްވެޕްގެ ގޮތުގައި ހަމަޖައްސައިދިން 400 މިލިއަން ޑޮލަރު ކަމަށް ފިނޭންސް މިނިސްޓަ އިބްރާހިމް އަމީރު ވިދާޅުވެއްޖެ އެވެ.
ފިނޭންސް މިނިސްޓަރު އަމީރު "މިހާރަ"ށް މިއަދު ވިދާޅުވީ އިންޑިއާ އިން ދިން 1.4 ބިލިއަން ޑޮލަރު ނުވަތަ 21 ބިލިއަން ރުފިޔާގެ ތެރޭގައި ސަރުކާރުގެ ބަޖެޓް ސަޕޯޓަށް ބޭނުންވާ 200 މިލިއަން ޑޮލަރު ހިމެނޭ ކަމަށެވެ. ބަޖެޓް ސަޕޯޓަށް ލިބޭ 200 މިލިއަންގެ ތެރެއިން 50 މިލިއަން ޑޮލަރަކީ ހިލޭ އެހީ އެވެ. އަދި ބާކީ 150 މިލިއަން ޑޮލަރަކީ ޓްރެޝަރީ ބޮންޑެވެ. ހިލޭ އެހީގެ ގޮތުގައި ލިބޭ ފައިސާ އަންނަ ޖެނުއަރީ މަހު ލިބޭނެ ކަމަށް މިނިސްޓަރު ވިދާޅުވި އެވެ. މީގެ އިތުރުން 2019 އަހަރު ޓީބިލް ވިއްކައިގެން ލިބޭ ފައިސާ ހޯދާނީ ތިން ބަޔަށް ބަހާލައިގެން ކަމަށް އޭނާ ވިދާޅުވި އެވެ.
މަޝްރޫއުތަކަށް ދިން 800 މިލިއަން ޑޮލަރު ހިމެނެނީ ލައިން އޮފް ކްރެޑިޓްގެ ގޮތުގައި ކަމަށް މިނިސްޓަރު ވިދާޅުވި އެވެ. އިންޑިޔާގެ އެގްޒިމް ބޭންކުން ލިބޭ މި ލައިން އޮފް ކްރެޑިޓުގެ ތެރެއިން ނަގާ ލޯނުގެ އިންޓަރެސްޓް ރޭޓަކީ 1.5 ޕަސެންޓް ކަމަށް ވެސް މިނިސްޓަރު ވިދާޅުވި އެވެ. މީގެ އިތުރުން 400 މިލިއަން ޑޮލަރަކީ ކަރެންސީ ސްވެޕްގެ ގޮތުގައި ފައިސާ ނަގަން ޖެހިއްޖެ ހާލަތެއްގައި އެމްއެމްއޭ އަށް ބޭނުން ކުރެވޭނެ އިންސްޓްރްމެންޓެއް ކަމަށް މިނިސްޓަ ވިދާޅުވި އެވެ.
ކުރީ ސަރުކާރާ ހިލާފަށް މި ސަރުކާރުން ދަނީ އިންޑިއާއާ އެކު ގާތްގުޅުމެއް ބާއްވަމުންނެވެ. މިގޮތުން މިދިޔަ ހަފްތާގައި ވެސް ވަނީ ބަޖެޓް ސަޕޯޓަށް އިންޑިއާ އިން 25 މިލިއަން ޑޮލަރު ނުވަތަ 385.5 މިލިއަން ރުފިޔާ ހިލޭ އެހީގެ ގޮތުގައި ސަރުކާރަށް ދީފަ އެވެ. މިއީ 1.4 ބިލިއަން ޑޮލަރުގެ ތެރޭގައި ހިމެނޭ ފައިސާއެއް ނޫނެވެ.
އަމީރު ވިދާޅުވީ، ލޯނާއި ކްރެޑިޓް ފެސިލިޓީ ބޭނުން ކުރުމުގައި އަމަލުކުރާނީ ސަރުކާރުގެ ދަރަނި ބޮޑު ނުވާނެ ގޮތަކަށް ބަލައިގެން ކަމަށެވެ. އެގޮތުން ޓްރެޝަރީ ބޮންޑުގެ ގޮތުގައި ނަގާ 150 ޑޮލަރު ކުރިއަށް އޮތް ދެ އަހަރުގެ ތެރޭގައި ދައްކަން ޖެހޭ އިރު އެއީ ވެސް ހިލޭ އެހީއަށް ބަދަލުވެގެންދާނެ ފައިސާ ކަމަށް ގަބޫލު ކުރައްވާ ކަމަށް ވިދާޅުވި އެވެ.