ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ން އެންގި އެންގުމާ އެއްގޮތަށް، ހުޅުމާލޭގެ ބީޗު ސަރަހައްދުން މޭޒާއި ގޮނޑި ނަގައި އެ ތަންތަން ހުސްކުރި ފަރާތްތަކަށް އެ ސަރަހައްދު އަލުން ބޭނުން ކުރުމުގެ ވަގުތީ ހުއްދައެއް އެ ކުންފުނިން ދީފި އެވެ. އެކަމަކު، އެޗްޑީސީގެ އެންގުމަށް ކިޔަމަން ނުވި ފަރާތްތަކަށް މިހާތަނަށް އެއްވެސް ފިޔަވަޅެއް ނާޅަ އެވެ.
އެޗްޑީސީގެ މެނޭޖިން ޑިރެކްޓަރު ސުހެއިލް އަހުމަދު މިއަދު ވިދާޅުވީ، މިދިޔަ ޖެނުއަރީ މަހުގެ ނިޔަލަށް ހުޅުމާލެ ބީޗު ސަރަހައްދު ހުސްކުރި ފަރާތްތަކަށް އާންމުންނަށް އުނދަގޫ ނުވާ ގޮތަށް އެތަންތަން އަލުން ބޭނުންކުރުމުގެ ފުރުސަތު ދީފައިވާ ކަމަށެވެ.
އެކަމަކު، އެޗްޑީސީގެ އެންގުމަށް ތަބާވި މީހުން ހުޅުމާލޭގެ ބީޗް ސަރަހައްދު އަލުން ބޭނުންކުރުމުގެ ހުއްދަ ދިން އިރު ވެސް އެއްވެސް ފީއެއް އެ ކުންފުންޏަށް ދައްކާކަށް ނުޖެހެ އެވެ. އެއީ، ކުރިން ވެސް އެތައް ބައެއްގެ ކަންބޮޑުވުމެކެވެ.
ސުހައިލް ވިދާޅުވީ، ބީޗު ސަރަހައްދުގައި ގޮނޑި ޖަހައިގެން ރެސްޓޯރެންޓްތަކުން ބޭނުން ކުރުމަށް ވަގުތީ ހުއްދަ ދިން ނަމަވެސް ހުޅުމާލޭ ދެވަނަ ފިޔަވަހީގެ ފެނާއި ނަރުދަމާގެ މަސައްކަތްތައް ކުރުމަށް ބޭނުންވާ ހޮޅިތައް ވަޅުލާން ފެށުމުން އެ ސަރަހައްދު ހުސް ކުރަންޖެހޭނެ ކަމަށެވެ. އެ މަސައްކަތް މި އަހަރުގެ ތެރޭގައި ފަށާނެ އެވެ.
އެއްވެސް ފީއެއް ދެއްކުމަކާ ނުލަަަައި ހުޅުމާލޭ ގެސްޓްހައުސްތަކުންނާއި ރެސްޓޯރެންޓްތަކުން ވިޔަފާރީގެ ބޭނުންތަކަށް ބީޗު ސަރަހައްދު ބޭނުންކުރާ މައްސަލައިގައި އާންމުން ވަނީ ކަންބޮޑުވުން ފާޅުކޮށްފަ އެވެ.
ފާޑުކިޔާ މީހުން ބުނަނީ ބީޗް ސަރަހައްދު މިހާރު ވަނީ ކެފޭތަކާއި ރެސްޓޯރެންޓްތަކުން ހިސޯރުކޮށްފައި ކަމަށާއި އެކަމަކު އެއީ އެންމެންނަށް އެއް ހަމައެއްގައި ބޭނުންކުރެވޭ ތަނަކަށް ހަދަން ޖެހޭ ކަމަށެވެ. އަދި ޓެކްސް ދެއްކުމަކާ ނުލައި ދައުލަތުގެ ބިން ބޭނުންކޮށްގެން ވިޔަފާރި ކުރުމަށް ހުއްދަ ދިނުމަކީ ބަލައިގަނެވޭނެ ކަމެއް ނޫން ކަމަށް އެތައް ބަޔަކު އަންނަނީ ބުނަމުންނެވެ.