ރައްޔިތުން ނިންމާ ވެރިކަމުގެ ނިޒާމަކަށް ތާއީދު ކުރާނަން: ނަޝީދު

ރާއްޖޭގައި އޮންނާނެ ވެރިިކަމުގެ ނިޒާމާ ގުޅޭގޮތުން ރައްޔިތުން ނިންމާ ކޮންމެ ގޮތަކަށް އިހުތިރާމު ކުރައްވައި އެގޮތަށް އަމަލު ކުރައްވާނެ ކަމަށް ކުރީގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.

މަޖިލިސް އިންތިޚާބުގައި ނަޝީދު ވާދަ ކުރައްވަން ނިންމެވުމާ އެކު އެމަނިކުފާނާއި އެމްޑީޕީން މަސައްކަތް ކުރަނީ ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރަން ކަމަށް ބައެއް ފަރާތްތަކުން ތުހުމަތުކުރެ އެވެ. އެކަމަކު ރައްޔިތުންގެ ފެންނަ ނުފެންނަ ވޯޓަކުން ނިންމާފައިވާ ވެރިކަމުގެ ނިޒާމު ބަދަލު ނުކުރެވޭނެ ކަމަށް އިދިކޮޅު ސިޔާސީ ބޭފުޅުން ގެންދަވަނީ ވިދާޅުވަމުންނެވެ.

މަޖިލީހަށް ވާދަ ކުރައްވާ މެމްބަރުންގެ މެދުގައި ޓީވީއެމުން ބާއްވާ ބަހުސްގައި، މައްޗަންގޯޅި މެދު ދާއިރާ އަށް ވާދަ ކުރައްވާ ނަޝީދު ވިދާޅުވީ ރާއްޖޭގައި އޮންނަންވީ ވެރިކަމުގެ ނިޒާމް ކަނޑައަޅަން ބޭއްވި އިންތިޚާބަކީ، ވޯޓުލެވޭ މީހުންނަށް ވުރެ ގިނަ މީހުން ވޯޓު ލީ ކަމަށް އިއުލާން ކުރި އިންތިޚާބެއް ކަމަށެވެ.

ކުރިއަށް އޮތްތަނުގައި ވެސް އެމަނިކުފާނު ގަބޫލު ކުރައްވާނީ ރައްޔިތުން ނިންމާ ނިންމުމެއް ކަމަށް ނަޝީދު ވިދާޅުވި އެވެ.

"ޖެހޭނީ ރައްޔިތުންގެ ވޯޓަކަށް ދާން. ދިވެހިރާއްޖޭގެ ރައްޔިތުން ރާއްޖޭގައި އޮންނަން ފެންނަނީ ރިޔާސީ ނިޒާމެއް ކަމަށް ކަނޑައަޅައިފި ނަމަ އެގޮތަށް އަމަލު ކުރަން އަޅުގަނޑު މިހިރީ ވަރަށް ބޮޑަށް ތައްޔާރަށް. އަދި އެހެން ގޮތަކަށް ރައްޔިތުން ނިންމިޔަސް އަޅުގަނޑު މިހުރީ ވަރަށް ބޮޑަށް ތައްޔާރަށް،" ނަޝީދު ވިދާޅުވި އެވެ.

އެމަނިކުފާނު ވިދާޅުވީ މިހާރު އަމަލު ކުރަމުން އަންނަ ގާނޫނުއަސާސީ އަކީ ގިނަ ދުވަސްވީ ހުތުމުހުތާރު ވެރިކަމަކާ ދެކޮޅަށް ކުރި މަސައްކަތްތަކެއްގެ ތެރެއިން ލިބިގެން ދިޔަ ގާނޫނުއަސާސީއެއް ކަމަށެވެ. އޭގެ ސަބަބުން އެ ގާނޫނުއަސާސީގައި ރައްޔިތުން މަޖިލީހުގެ ބާރު ވަރަށް ބޮޑު ކަމަށް ވެސް ނަޝީދު ވިދާޅުވި އެވެ.

ޝަރުއީ ނިޒާމު އިސްލާހު ކުރުމާ ގުޅޭގޮތުން ސުވާލު ކުރުމުން ނަޝީދު ވިދާޅުވީ ފަނޑިޔާރުންނަކީ އުމުރަށް މަގާމުގައި ތިބެވޭނެ ބޭފުޅުން ކަމާއި މުސާރަ އާއި އިނާއަތްތައް އިތުރު ކުރުމުން ވެސް ރައްޔިތުން އެދޭ ނަތީޖާ ނުފެންނަ ކަމަށެވެ. އެހެންކަމުން ޖުޑީޝަލް ސާވިސް ކޮމިޝަން (ޖޭއެސްސީ) އިސްލާހުކޮށް އެތަން އެކުލަވާލާފައިވާ ގޮތް ބަދަލު ކުރަން ޖެހޭ ކަމަށް ނަޝީދު ވިދާޅުވި އެވެ. އަދި ޖުޑީޝަލް އެޑްމިނިސްޓްރޭޝަން، ޖުޑީޝިއަރީގެ ތެރެއިން ބަދަލު ކުރަން ޖެހޭ ކަމަށް ނަޝީދު ވިދާޅުވި އެވެ.

ނަޝީދު ވިދާޅުވީ މަޖިލީހަކީ އެ ގައުމެއްގެ މޫނު ބަލާ ލޯގަނޑު ކަމަށެވެ. އެހެންކަމުން އެ ކަމެއް އެ މަޖިލީހެއްގައި ވެސް ކުރިއަށް ދާނެ ކަމަށް ވިދާޅުވި އެވެ. މަޖިލީހުގެ ތެރޭގައި ފައިސާ ގޯނިގޯނީގެ ވާހަކަ ލަދެއް ނެތި ދެއްކުމާއި ވޯޓު ވިއްކުމުގެ އިތުރުން ޕާޓީ ބަދަލު ކުރުން ހުއްޓުވަން ޖެހޭ ކަމަށް ނަޝީދު ވިދާޅުވި އެވެ. ކުރިއަށް އޮތް މަޖިލީހަކީ ރައްޔިތުން އުއްމީދު ކުރާ މަޖިލީހުގެ ގޮތުގައި ހަދައި ނަޒާހާތްތެރި ތަނަކަށް މަޖިލިސް ހަދާނެ ކަމަށް ނަޝީދު ވިދާޅުވި އެވެ.

އިންތިޚާބުގައި ނަޝީދާ ވާދަ ކުރައްވާ، އަދި ސަލަފު ޖަމިއްޔާގައި އުޅުއްވާ އަމިއްލަ ކެންޑިޑޭޓް، އިބްރާހިމް މުހައްމަދު، ނަޝީދަށް އިޝާރާތް ކުރައްވައި ވަނީ ވޭތުވެދިޔަ ތަނުގައި ޒިންމާއެއް ހަވާލު ކުރެއްވުމުން އިސްތިއުފާ ދެއްވައި ވަޑައިގެންނެވި ބޭފުޅުންނަށް ދެން ފުރުސަތު ނުދިނުމަށް ގޮވާލްއްވައިފަ އެވެ.

އެކަމަށް ރައްދު ދެއްވައި ނަޝީދު ވިދާޅުވީ ދީނުގެ ނަމުގައި ދިވެހި ރައްޔިތުންގެ މެދުގައި ހިލާފު އުފެއްދުމުގެ ފުރުސަތު ނުދެއްވާނެ ކަމަށެވެ. ވޯޓު ލުމަކީ ދީނާ ދުރުކަމެއް ކަމަށް ވާހަކަ ދައްކާފައި މިހާރު ވޯޓު ދިނުމަށް އެދުމަކީ ހުތުރު އަމަލެއް ކަމަށް ވިދާޅުވެ އިބްރާހިމަށް ނަޝީދު ރައްދުދެއްވި އެވެ. ނަޝީދު ވިދާޅުވީ ރާއްޖޭގައި އިތުރު ބަގާވާތެއް ކުރުމުގެ ފުރުސަތު ދެން ނުދެއްވާނެ ކަމަށެވެ.

"ފްލެޓް ދޮންބެ"ގެ ނަމުން ވާދަވެރިން މީގެ ކުރިން ކިޔަމުން އައިކަން ފާހަގަ ކުރައްވައި ނަޝީދު ވިދާޅުވީ އެމްޑީޕީ އަށް ވޯޓް ދީފި ނަމަ މައްޗަންގޯޅީ ރައްޔިތުންނަށާއި ރާއްޖޭގެ ހުރިހާ ރައްޔިތުންނަށް ބޯހިޔާވަހިކަމާއި ވަޒީފާގެ ފުރުސަތުތައް ހޯއްދަވައި ދެއްވާނެ ކަމަށެވެ. އެމަނިކުފާނު ނުކުންނަވާ ހުންނެވީ ޖުމުލަ ހައްލަކާ އެކުގައި ކަމަށް ވެސް ވިދާޅުވި އެވެ.