މި އަހަރުގެ ހައްޖުގެ އަޅުކަން އަދާކުރަން ދުނިޔޭގެ އެކި ގައުމުތަކުން މައްކާއަށް ދިޔަ ގާތްގަނޑަކަށް 2 މިލިއަނެއްހާ ހައްޖުވެރިން އަަރަފާތު ބިމަށް މިއަދު ޖަމާވެއްޖެ އެވެ.
ހައްޖުގެ އެންމެ މުހިންމު ފަރުލު ކަމަށްވާ އަރަފާތު ދުވަހު، އަރަފާތު ބިމުގައި، އަޅުކަމުގަޔާއި ގުރުއާން ކިޔެވުމާއި ދުއާ ކުރުމުގައި މުޅި ދުވަސް ހޭދަކުރެ އެވެ. މިއީ ކޮންމެ އަހަރެއް ވެސް އެންމެ ދުވަހަކު އިންސާނުން އަރާ ފުރާލާ ބިމެވެ.
ދިވެހި 2،000 ހައްޖުވެރިންގެ ތެރެއިން އަލްހައިރު ގްރޫޕްގައި ދިޔަ މީހުން ނޫނީ އެހެން އެންމެން މިހާރު ތިބީ އަރަފާތު ބިމުގަ އެވެ. އެ އެންމެންގެ ހާލު ވެސް ރަނގަޅެވެ.
"އަލްހައިރު ގްރޫޕް މީހުންނަށް އަދި ނުފޯރާ، ޓްރެފިކާ ހެދި. އެ މީހުން މިނާ އިން ފުރީ މިއަދު ހެނދުނު،" އަރަފާތުގައި ހުރި ދިވެހި ހައްޖުވެރިޔަކު ބުންޏެވެ.
އެއް ހައްޖުވެރިޔަކަށް ދިމާވި ހިތުގެ މައްސަލައެއްގައި މީގެ ހަފުތާއެއްހާ ދުވަސް ކުރިން ފެށިގެން އަންނަނީ ކިންގް ފައިސަލް ހޮސްޕިޓަލްގެ އައިސީޔޫގައި ފަރުވާ ދެމުންނެވެ. އެކަަމަކު އޭނާ ވެސް ހޮސްޕިޓަލްގެ ފަރާތުން އަރަފާތު ބިމަށް މިއަދު ގެންނާނެ ކަމަށްވެ އެވެ.
ދިވެހި ހައްޖު ކޯޕަރޭޝަންގެ ހަވާލުގައި ދިޔަ 1000 ހައްޖުވެރިންގެ ތެރެއިން 600 މީހުން އަަރަފާތު ބިމުގައި ތިބީ 62 ނަންބަރު ޓެންޓް އޭރިޔާގަ އެވެ. އަނެއް 400 ހައްޖުވެރިން މިއަދު ހޭދަކުރާނީ 101 ނަންބަރު ޓެންޓް އޭރިޔާގަ އެވެ.
އަމިއްލަ ފަސް ކުންފުނީގެ ބެލުމުގެ ދަށުން ދިޔަ 1000 ހައްޖުވެރިން ތިބީ 102 ނަންބަރު ޓެންޓް އޭރިޔާގަ އެވެ.
މިއިން ކޮންމެ ޓެންޓް ސަރަހައްދެއް ވެސް ހުންނަނީ ދުރުދުރުގަ އެވެ.
"އެއް ބަޔަކު އަނެއް ބަޔަކަށް ފެންނަ ވަރަށް ވުރެ ދުރު،" ދިވެހި ހައްޖުވެރިޔަކު ބުންޏެވެ.
ހައްޖުވެރިން އިއްޔެ ހޭދަކުރީ މިނާގަ އެވެ. ކުރިއަށް އޮތް ތިން ދުވަސް ވެސް، ހުރިހާ ހައްޖުވެރިން ތިބޭނީ މިނާގެ ފޭލިގެތަކުގަ އެވެ. "ހުދު ފޭލިގެ ސިޓީ"ގެ ގޮތުން ސިފަކުރެވޭ މިނާގައި، ހައްޖުވެރިންނަށް ތައްޔާރުކޮށްފައި ވަނީ ސަލާމަތީ ގޮތުން ވަރުގަދަ ފޭލިގެތަކެކެވެ.
ދުނިޔޭގެ 150 ގައުމަކުން މި އަހަރު ހައްޖުގެ އަޅުކަމަށް މައްކާ އަށް މީހުން ޒިޔާރަތްކުރި އެވެ. މައްކާއާ 8 ކިލޯމީޓަރު ދުރުގައި އޮންނަ މިނާ އަށް އެ ހުރިހާ ހައްޖުވެރިން ދަތުރު ފެށީ އިއްޔެ އެވެ. ދެން އެނބުރި ދާނީ މާދަމާ އިން ފެށިގެން ތިން ދުވަހު ޖަމްރާތަކަށް ހިލަ އުކުމަށް ފަހު އެވެ.
މިއަދުގެ އިރު އޮއްސުމާ އެކު އަރަފާތު ބިމުން ހައްޖުވެރިން ފައިބާނެ އެވެ. މާދަމާ ހެނދުނުން ފެށިގެން ޖަމްރާ އަށް ހިލަ އުކުން އޮންނާނެ އެވެ. އިހުރާމް ކަނޑާނީ އޭގެ ފަހުންނެވެ.
މިދިއަ އަހަރު ހިލަ އުކުމުގެ ތެރޭގައި ހިނގި ހިތާމަވެރި ހާދިސާގައި 2،000 ހައްޖުވެރިޔަކު މަރުވެފައިވާ ކަމަށް ރިޕޯޓްތައް ބުނެ އެވެ. އޭގެ ތެރޭގައި ގިނައީ އީރާނުގެ ހައްޖުވެރިންނެވެ.
ސައުދީ އަރަބިއްޔާ އާއި އީރާނާ ދެމެދު އޭގެ ފަހުން ޖެހުނު މައްސަލަތައް ހައްލުނުވެ، މި އަހަރު އީރާނުން އެއްވެސް ހައްޖުވެރިޔަކު ނުފޮނުވަ އެވެ.
ސައުދީން ވަނީ ހައްޖުވެރިންގެ ސަލާމަތާއި ރައްކާތެރިކަމަށް ވަރަށް ގިނަ ފިޔަވަޅުތައް އަޅާފަ އެވެ.