އައްޑޫ ހިތަދޫގައި އިމާރާތްކޮށްފައިވާ ފްލެޓްތަކަށް ކުރިމަތިލި މީހުންގެ ތެރެއިން ޝަރުތު ހަމަވެގެން ޕޮއިންޓް ލިބުނު މީހުންގެ ލިސްޓް އާންމުކޮށް، ޕޮއިންޓް ލިބުނު ގޮތާ ދޭތެރޭ އެއްވެސް ޝަކުވާއެއްވާ ނަމަ އެކަމަށް އައްޑޫ ސިޓީ ކައުންސިލުން މިއަދު ފުރުސަތު ހުޅުވާލައިފި އެވެ.
ސަރުކާރުގެ ބޯހިޔާވަހިކަމުގެ ޕްރޮގްރާމްގެ ދަށުން ކުރީގެ ރައީސް އަބްދުﷲ ޔާމީންގެ ވެރިކަމުގައި ހިތަދޫގައި އެޅި 264 ފްލެޓަށް ޖުމްލަ 577 މީހުން ކުރިމަތިލި ނަމަވެސް ޝަރުތު ހަމަވެގެން ލިސްޓްގައި ހިމަނާފައި ވަނީ 414 މީހުންނެވެ.
އެ ފްލެޓްތަކަށް ކުރިމަތިލާން ހުޅުވައިލީ މީގެ ތިން އަހަރު ކުރިން 2016 ގަ އެވެ.
ކައުންސިލުން ބުނި ގޮތުގައި ހިތަދޫ ފްލެޓްތަކުގެ ތެރެއިން އެ އަވަށު ރައްޔިތުންނަށް ހާއްސަކޮށްފައިވާ 150 ފްލެޓަށް ޖުމްލަ 446 މީހުން، މަރަދޫ/ މަރަދޫފޭދޫ އަދި ފޭދޫ ރައްޔިތުންނަށް ހާއްސަ ކުރި 30 ފްލެޓަށް ޖުމްލަ 54 މީހުން އަދި ހިތަދު އަށް ދިރިއުޅުން ބަދަލު ކުރަން ބޭނުންވާ އެހެން ރައްޔިތުންނަށް ހާއްސަ ކުރި 50 ފްލެޓަށް 70 މީހަކު ކުރިމަތިލާފައިވެ އެވެ.
ފްލެޓްތަކަށް ކުރިމަތިލި މީހުންގެ ޕޮއިންޓް ލިސްޓަށް ޝަކުވާ ހުށަހެޅުމުގެ ފުރުސަތާއި ޕޮއިންޓް ލިބުނު ގޮތާ ދޭތެރޭ އެއްވެސް ކަމެއް ސާފުކުރަން ބޭނުންވާ ނަމަ އެ ފުރުސަތު މި މަހުގެ 25 ވަނަ ދުވަހާ ހަމައަށް ވަނީ ހުޅުވާލައިފަ އެވެ.
ކައުންސިލުން ބުނި ގޮތުގައި ފްލެޓްތައް ލިބޭ މީހުންގެ ފައިނަލް ލިސްޓް އާންމު ކުރާނީ ހުށަހަޅާ ޝަކުވާތަކާ ގުޅިގެން ނުވަތަ ސާފު ކުރެވޭ އިތުރު މައުލޫމާތާއި ލިސްޓަށް ގެންނަން ޖެހޭ އުނިއިތުރެއްވާ ނަމަ، އެ އުނިއިތުރެއް ގެނައުމަށް ފަހު އެވެ.
ރައީސް ޔާމީންގެ ސަރުކާރުން އައްޑޫގައި ކުރިއަށް ގެންދިޔަ ބޯހިޔާވަހިކަމުގެ ޕްރޮގްރާމްގެ ދަށުން ހުޅުދޫގައި ވެސް ވަނީ 48 ފްލެޓް އަޅައިފަ އެވެ. އެ ފްލެޓްތަކަށް ކުރިމަތިލި މީހުންގެ ލިސްޓް މިދިޔަ ހަފުތާގައި އާންމުކޮށް ބުރާސްފަތި ދުވަހާ ހަމައަށް ވަނީ ޝަކުވާ ހުށަހެޅުމުގެ ފުރުސަތު ހުޅުވާލައިފަ އެވެ.
ކުރީގެ ރައީސް މުހައްމަދު ނަޝީދުގެ ވެރިކަމުގައި ފޭދޫގައި ވެސް 25 ހައުސިން ޔުނިޓް އަޅައި އެތަންތަނުގައި މީހުން އަންނަނީ ދިރިއުޅެމުންނެވެ. މި ސަރުކާރުން ވެސް އައްޑޫގައި އިތުރު 1،500 ހައުސިން ޔުނިޓް އަޅަން ވަނީ ނިންމައިފަ އެވެ.