އައްޑޫގައި ހިންގި މާރާމާރީއާ ގުޅިގެން ދެ މީހަކު ހައްޔަރުކޮށްފި

އައްޑޫ ހިތަދޫގައި މިދިޔަ ހުކުރު ދުވަހުގެރޭ ހިންގި މާރާމާރީއާ ގުޅިގެން ފުލުހުން ރޭ ދެ މީހަކު ހައްޔަރުކޮށްފި އެވެ.


ފުލުހުންގެ ވެބްސައިޓުގައި ބުނެފައިވާ ގޮތުގައި މާރާމާރީއާ ގުޅިގެން ހައްޔަރުކޮށްފައިވަނީ އުމުރުން 22 އަހަރުގެ ދެ ފިރިހެނެކެވެ. އެމީހުންގެ ބަންދަށް ހިތަދޫ މެޖިސްޓްރޭޓް ކޯޓުން ވަނީ 15 ދުވަސް ޖަހައިފަ އެވެ.

މި މާރާމާރީގައި ފަސް މީހަކު އަނިޔާވި އެވެ. ނަމަވެސް އެއިން އެއްވެސް މީހަކަށް ސީރިއަސް ޒަހަމެއް ނުލިބޭ ކަމަށް ހިތަދޫ ރީޖަނަލް ހޮސްޕިޓަލްގެ އޮފިޝަލަކު ވިދާޅުވި އެވެ.

ފުލުހުން އަންނަނީ މި މައްސަލަ އިތުރަށް ތަހުގީގު ކުރަމުންނެވެ.