ކޮމިޓީތަކުން ވަކިން ބަޔާން ނެރުމުން ނިޒާމް އޮޅި ގެއްލުންވާނެ: އިދިކޮޅު

ކްރިމިނަލް ކޯޓުގެ އިސް ގާޒީ އަހްމަދު ހައިލަމް، މެސެޖަކާ އެކު ވައިބާ ގްރޫޕަކަށް ފޮނުއްވި ކުރެހުމަކީ އިންސާނީ ކަރާމާތަށް އަރައިގަތުމުގެ އަމަލެއް ކަމަށް ބުނެ ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން ބަޔާން ނެރުނު މައްސަލައިގައި ރައްޔިތުންގެ މަޖިލީހުގެ އިދިކޮޅު މެމްބަރުން މިއަދު ފާޑުވިދާޅުވެއްޖެ އެވެ.

ހިއުމަން ރައިޓްސް އެންޑް ޖެންޑާ ކޮމިޓީން ބަޔާން ނެރުނީ، ރައީސް އިބްރާހިމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކަރުގައި ޗޭނު ޖަހާފައިވާ ކުރެހުމުގެ މައްސަލައިގަ އެވެ. ނަސްރުގެ ތަހުނިޔާ ވިދާޅުވެ ވައިބާ ގްރޫޕަކަށް އެ ކުރެހުން ޝެއާކުރެއްވުމުން ޖޭއެސްސީން ވަނީ ހައިލަމް ސަސްޕެންޑްކޮށްފަ އެވެ.

އޭނާއާ މެދު ޖޭއެސްސީން ފިޔަވަޅު އެޅީ، ކުރީގެ ރައީސް އަބްދުﷲ ޔާމީނަށް އިއްވާފައިވާ މަނީ ލޯންޑްރިންގެ ދައުވާގެ ހުކުމް އިއްވުން ޝެޑިއުލްކޮށްފައި އޮތް ދުވަހެވެ.

އިދިކޮޅު މެމްބަރުން ދެކެވަޑައިގަންނަވާ ގޮތުގައި ޝަރުއީ ނިޒާމްއާ ގުޅުން ހުރި މިފަދަ މައްސަލަ މަޖިލީހުގެ ވަކިވަކި ކޮމިޓީތަކުން ބަލައި ބަޔާން ނެރޭކަށް ނުޖެހެ އެވެ.

ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އަދި ކުރީގެ ޑިފެންސް މިނިސްޓަރު އާދަމް ޝަރީފް "މިހާރު" އަށް މިއަދު ވިދާޅުވީ ކޮމިޓީ ތަކުން ވަކި ވަކިން ބަޔާން ނެރުމުން މަޖިލީހުގެ ނިޒާމު އޮޅި، ބޮޑެތި ގެއްލުންތައް ވާނެ ކަމަށެވެ. އޭނާ ސިފަކުރެއްވީ، އެއީ ކޮމިޓީން ކުރި ދެކޮޅު ނުޖެހޭ ކަމެއްގެ ގޮތުގަ އެވެ.

"އެއީ އާއްމު އުސޫލެއް ވެސް ނޫން. އެކަހަލަ ދެކޮޅު ނުޖެހޭ ކަންތައްތައް ކުރީމާ މަޖިލީހުގެ މުޅިން އޮޅި ގަޑުބަޑު ވާނީ" އިދިކޮޅު ޕީއެންސީއަށް ނިސްބަތްވާ އާދަމް ޝަރީފް ވިދާޅުވި އެވެ.

މާވަށު ދާއިރާގެ މެމްބަރު މުހައްމަދު ސައީދު ކުރެއްވި ޓްވީޓެއްގައި ވިދާޅުވީ މަޖިލީސް ކޮމިޓީތައް ވެސް އާއިލީ ވެރިކަމުގެ 'ސިއްކަ' ޖެހި ނިމިއްޖެ ކަމަށެވެ. ހައިލަމް ކުރެއްވި ތުހުމަތުތައް ތަހުގީގުކުރުމުގެ ބަދަލުގައި އޭނާ އިތުރަށް ކުށްވެެރިކޮށް މުޅި ނިޒާމަށްް އަތްބާނަން ކުރާ މަސައްކަތުން ރައީސް ޔާމީންގެ ޝަރީއަތަށް ނުފޫޒް އޮތް މިންވަރު އެ ބަޔާން ނެރުމުން ހާމަވާ ކަމަށް ވެސް އޭނާ ވިދާޅުވި އެވެ.

"މަޖިލީސް ކޮމިޓީތައް ވެސް އާއިލީވެރިކަމުގެ 'ސިއްކަ' ޖެހި ނިމިއްޖެ. ތުހުމަތުތައް ތަހުގީގުކުރުމުގެ ބަދަލުގައި ގާޒީ އިތުރަށް ކުށްވެެރިކޮށް މުޅި ނިޒާމަށްް އަތްބާނަން ކުރާ މަސައްކަތުން ރައީސް ޔާމީންގެ ޝަރީއަތަށް ނުފޫޒް އޮތް މިންވަރު ހާމަވޭ" ސައީދުގެ ޓްވީޓްގައި ވެ އެވެ.

ނަސްރުގެ ދުވަހުގެ ތަހުނިޔާ ފޮނުވުމުގެ ގޮތުން ކުރެހުމެއް ފޮނުއްވުނީ، ބަލަންވާ ވަރަށް ނުބެލި ކަމަށް ވިދާޅުވެ ހައިލަމް ވަނީ މައާފަށް ވެސް އެދިވަޑައިގެންފަ އެވެ.

މަޖިލީހުގެ ހިއުމަން ރައިޓްސް އެންޑް ޖެންޑާ ކޮމެޓީން ރޭ ނެރުނު ބަޔާނެއްގައިވަނީ ލާ އިންސާނީ މަންޒަރުތަކެއް ސިފަކޮށް ދޭ ކުރެހުމެއް ހައިލަމް ފޮނުއްވުމަކީ އެ ކޮމެޓީން ކުށްވެރިކުރާ ކަމެއް ކަމަށާއި ރާއްޖެ ބައިވެރިވެފައިވާ ބައިނަލްއަގްވާމީ މުއާހަދާތަކާއި އެންޓި ޓޯޗާ ގާނޫނުގެ ދަށުން ވެސް އެފަދަ ކަންކަމަށް ހިތްވަރު ދިނުމަކީ ވެސް މަނާ ކަމެއް ކަމަށެވެ.

އަދި ދައުލަތުގެ މަގާމެއްގައި ހުރި މީހަކު އެފަދަ އަމަލެއް ހިންގައިފި ނަމަ، އެ ކަންކަން ތަކުރާރުވިޔަ ނުދިނުމަށްޓަކައި ފިޔަވަޅު އެޅުމަކީ ދައުލަތުގެ މުއައްސަސާތަކުން ކުރަންޖެހޭ ކަމެއް ކަމަށް ވެސް އެ ބަޔާނުގައިވެ އެވެ.