ރައީސް އިބްރާހިމް ސޯލިހާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކަރުގައި ވާ ޖަހާފައިވާ ކުރެހުމެއް ހިމެނޭ ފޮޓޯއެއް ކްރިމިނަލް ކޯޓުގެ އިސް ގާޒީ އަހުމަދު ހައިލަމް ވައިބާ ގްރޫޕަކަށް ފޮނުއްވުމަކީ އިންސާނީ ކަރާމާތަށް އަރައިގަތުމުގެ އަމަލެއް ކަމަށް ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމެޓީން ބުނެފި އެވެ.
ނަސްރުގެ ދުވަހުގެ ތަހުނިޔާ ފޮނުވުމުގެ ގޮތުން އިސް ގާޒީ ހައިލަމް ކްރިމިނަލް ކޯޓުގެ ވައިބާ ގްރޫޕަކަށް ފޮނުއްވި ފޮޓޯގައި ރައީސާއި މަޖިލީހުގެ ރައީސް ނަޝީދުގެ އިތުރުން އިތުރު ބައެއް މީހުންގެ ކަރުގައި ވާ ޖަހާފައި ހުރި ކުރެހުމެއް ހުއްޓެވެ. އެކަމާ ގުޅިގެން ހައިލަމް ސަސްޕެންޑް ކޮށްފައިވާއިރު، އޭނާ ވަނީ އެއީ ބަލަންވާ ވަރަށް ނުބެލި ފޮނުވުނު ފޮޓޯއެއް ކަމަށް ވިދާޅުވެ، އެކަމަށް މައާފަށް ވެސް އެދިވަޑައިގެންފަ އެވެ.
މަޖިލީހުގެ ހިއުމަން ރައިޓްސް އެންޑް ޖެންޑާ ކޮމެޓީން މިރޭ ނެރުނު ބަޔާނެއްގައިވަނީ ލާ އިންސާނީ މަންޒަރުތަކެއް ސިފަކޮށް ދޭ ކުރެހުމެއް ހައިލަމް ފޮނުއްވުމަކީ އެ ކޮމެޓީން ކުށްވެރިކުރާ ކަމެއް ކަމަށާއި ރާއްޖެ ބައިވެރިވެފައިވާ ބައިނަލްއަގްވާމީ މުއާހަދާތަކާއި އެންޓި ޓޯޗާ ގާނޫނުގެ ދަށުން ވެސް އެފަދަ ކަންކަމަށް ހިތްވަރު ދިނުމަކީ ވެސް މަނާ ކަމެއް ކަމަށެވެ. އަދި ދައުލަތުގެ މަގާމެއްގައި ހުރި މީހަކު ވެސް އެފަދަ އަމަލެއް ހިންގައިފި ނަމަ، އެކަންކަން ތަކުރާރުވިޔަ ނުދިނުމަށްޓަކައި ފިޔަވަޅު އެޅުމަކީ ދައުލަތުގެ މުއައްސަސާތަކުން ކުރަންޖެހޭ ކަމެއް ކަމަށް ވެސް އެ ބަޔާނުގައިވެ އެވެ.
އެ ބަޔާނުގައިވާ ގޮތުން ހައިލަމް އެ ފޮޓޯ ފޮނުއްވުމަކީ އިންސާނީ ކަރާމާތާ ޚިލާފް އަމަލެއް ކަމަށް އެ ކޮމެޓީއަށް އިއްތިފާގުވެވޭ ކަމަށެވެ.
ފޮޓޯ ފޮނުއްވި މައްސަލާގައި އިސް ގާޒީ ހައިލަމް ސަސްޕެންޑްކުރީ ކުރީގެ ރައީސް އަބްދުﷲ ޔާމީންގެ މައްޗަށް ކުރާ ދައުވާގެ ހުކުމް އިއްވަން ހަމަޖެހިފައި އޮތް ދުވަހު އެވެ. އޭނާ ބައްލަވާ އެ މައްސަލާގައި އޭނާ ސަސްޕެންޑް ކުރުމާ އެކު، ހުކުމް ކުރުން ވަނީ ފަސްކޮށްފަ އެވެ.
އިސް ގާޒީ ހައިލަމް ސަސްޕެންޑް ކުރުމުގެ އިތުރުން އޭނާއާ ގުޅޭ އިތުރު މައްސަލައެއް ވެސް ޖުޑީޝަލް ސާވިސް ކޮމިޝަން (ޖޭއެސްސީ) އިން ދަނީ ބަލަމުންނެވެ. އެކަމާ ގުޅިގެން ހައިލަމް ނެރުއްވި ބަޔާނެއްގައިވަނީ ޔާމީން ޖަލަށްލާން ކަމުގެ ޔަގީން ކަން ހޯދަން ސަރުކާރުގެ އެކި ފަރާތްތަކުން އޭނާއަށް ނުފޫޒު ފޯރުވި ކަމަށެވެ.
