އަފްރާޝީމްގެ މަރުގެ ތުހުމަތު ކުރެވޭ ޝާން އަދިވެސް ސަރުކާރުގައި

ދީނީ އިލްމުވެރިޔާ އަދި ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު ޑރ. އަފްރާޝީމް އަލީ އަވަހާރަކޮށްލި ހަމަލާދިނުމުގައި އަމަލީގޮތުން އުޅުނު ކަމަށް ރިޔާސީ ކޮމިޝަންގެ ތަހުގީގުގައި ހާމަވި، ހ. ހިކޯސްޓް އަލީ ޝާން (ސަޓޯ) ސަރުކާރުގެ ކުންފުންޏެއްގެ މަގާމެއްގައި ހުރި ނަމަވެސް އޭނާއާ މެދު އެއްވެސް ފިޔަވަޅެއް އަދިވެސް ނާޅަ އެވެ.

ވެރިކަން ކުރާ ކޯލިޝަން މައި ޕާޓީ، އެމްޑީޕީގެ އިސް އެކްޓްވިސްޓަކަށް މިހާރު އުޅޭ ޝާން އަކީ ގްރޭޓާ މާލޭ އިންޑަސްޓްރިއަލް ޒޯން ލިމިޑެޓް (ޖީއެމްއައިޒެޑް) ގެ ސުޕަވައިޒަރަކަށެވެ. އަދި އޭނާ އަކީ މިހާރުގެ ސިޔާސީ ބައެއް އިސްބޭފުޅުންގެ ގާތް އެކުވެރިއެކެވެ.

އެނގިފައިވާ ގޮތުގައި ޝާން އަށް ޖީއެމްއައިޒެޑުން އިސް މަގާމެއް ދީފައި ވަނީ ކުށުގެ ރެކޯޑަށް ވެސް ބެލުމެއް ނެތި އެވެ.

ޝާން އަކީ އަފްރާޝީމް އަވަހާރަކޮށްލުމުގައި ހ. ލޮބީ ހުސެއިން ހުމާމާ އެކު އަމަލީ ގޮތުން ބައިވެރިވެފައިވާ ކަމަށް ތުހުމަތުކުރެވުނު މީހެކެވެ. އެ މައްސަލައިގައި އެ ދުވަސްވަރު އޭނާ އަށް ދައުވާކޮށް ޝަރީއަތް ވެސް ހިންގި އެވެ. ނަމަވެސް އެކަށީގެންވާ ހެކި ނެތުމުން 2016 ވަނަ އަހަރު އޭނާގެ މައްޗަށް ކުށް ސާބިތުނުވެ ވަނީ މިނިވަން ކޮށްފަ އެވެ. އެ މައްސަލަ ފަހުން އިސްތިއުނާފެއް ވެސް ނުުރެ އެވެ.

ކުރީގެ ހޯމް މިނިސްޓަރު އުމަރު ނަސީރު ކުރިން ވިދާޅުވެފައި ވަނީ ޝާންގެ މައްޗަށް ކުށް ސާބިތު ނުވި ނަމަވެސް އަފްރާޝީމް އަވަހާރަ ކޮށްލުމުގައި ޝާން ބައިވެރިވިކަން ހާމަކުރެވޭ ވަރުގެ ހެކި ފުލުހުންގެ އަތުގައި އެބަހުރި ކަމަށެވެ.

އަފްރާޝީމް އަވަހާރަކޮށްލި މައްސަލަ ޝާންގެ މައްޗަށް ސާބިތުނުވެ، ދޫކޮށްލުމުން ފަހުން ގޭންގް މާރާމާރީއެއްގެ މައްސަލައެއްގައި ޝާންގެ ފައިގައި ކުރީގެ ރައީސް އަބްދުﷲ ޔާމީންގެ ސަރުކާރުގައި ޓެގް ވެސް އެޅުވި އެވެ.

ގެއްލުވާލާފައިވާ މީހުންނާއި ގޮތް ނޭނގޭ މަރުތަކުގެ މައްސަލަތައް ބަލާ ރިޔާސީ ކޮމިޝަންގެ ތަހުގީގުން ހާމަވެފައިވާ ގޮތުގައި އަފްރާޝީމް އަވަހާރަކޮށްލުމުގައި ހުމާމާ އެކު ޝާން ވެސް ބައިވެރިވެފައިވެ އެވެ. ޝާން އާއި ހުމާމްގެ އިތުރުން އޭރު އުމުރުން 18 ނުފުރޭ ކުއްޖަކަށް ވެސް ދައުވާކުރި އެވެ. އޭނާގެ ބައިވެރިވެރިވުން ވެސް ވަރަށް ބޮޑަށް އޮތްކަން ވަނީ ހާމަވެފަ އެވެ.

ޝާންއާ މެދު ފިޔަވަޅު ނާޅާ ސަބަބު ސާފު ކުރުމަށް ރައީސް އޮފީހާއި ގްރޭޓާ މާލޭ އިންޑަސްޓްރިއަލް ޒޯނަށް ގުޅުމުން އަދި ވަނީ ޖަވާބެއް ނުލިބިފަ އެވެ.

ރައީސް އިބްރާހިމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދާ އެކު، ޝާން ނަގާފައިވާ ފޮޓޯއެއް ޖަހާފައިވާ ޚަބަރެއް ޓްވީޓް ކުރައްވައި ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވި ގޮތުގައި، އަފްރާޝީމް މަރާ ގުޅޭގޮތުން އާ މައުލޫމާތެއް ކޮމިޝަންގެ ރިޕޯޓުން ހާމަނުވި ކަމަށެވެ. ހާމަވި ކަމަކީ އެ މަރާ ގުޅުވައިގެން ރައީސް ޔާމީން ބަދުނާމު ކުރީ ސިޔާސީ ބޭނުމަކަށް ކަމަށް ވިދާޅުވި އެވެ.

އޮކްޓޯބަރު 2، 2012 ގައި އަފްރާޝީމް އަވަހާރަކޮށްލި މައްސަލައިގެ ތަހުގީގު ނިންމައި، މިހާރު ވަނީ ކަމާ ގުޅުން ހުރި އިދާރާތަކަށް ފޮނުވައިފަ އެވެ.

އަފްރާޝީމްގެ މަރާ ގުޅިގެން މިހާތަނަށް ކުށް ސާބިތުވެފައިވަނީ ހުމާމްގެ މައްޗަށެވެ. އޭނާގެ މައްޗަށް އިއްވި މަރުގެ ހުކުމް ސުޕްރީމް ކޯޓުން ވެސް ވަނީ ދަމަހައްޓައިފަ އެވެ.

އަފްރާޝީމް އަލީ އަވަހާރަކޮށްލި ހަމަލާ ރޭވީ މާލޭގައި ކުށުގެ އަމަލުތައް ހިންގަމުން ދިޔަ އަޒްލިފް ރައޫފް ކަމަށާއި އޭނާއާ އެކަން ހަވާލުކުރީ ދީނީ ގޮތުން އަފްރާޝީމާ ޚިޔާލު ތަފާތުވާ ބަޔަކުކަން، ވެސް ކޮމިޝަންގެ ރިޕޯޓުން އެނގެ އެވެ.

އަފްރާޝީމްގެ މަރުގެ މައްސަލާގައި އަޒްލީފުގެ މައްސަލަ ފަހުން ތަހުގީގުކުރަމުން ދަނިކޮށް އޭނާ ވަނީ 2015 ވަނަ އަހަރު ފުރައިގެން ރާއްޖޭން ބޭރަށް ގޮސްފަ އެވެ. ފަހުން ޚަބަރު ފެތުރުނު ގޮތުގައި އޭނާ ވަނީ ސީރިއާ ހަނގުރާމާގައި މަރުވެފަ އެވެ. ނަމަވެސް އެކަން ރަސްމީ ގޮތެއްގައި ކަށަވަރުވެފައެއް ނުވެ އެވެ.