ކުޑަކުދިންނަށް ޖިންސީ ގޯނާކުރާ ކައުންސިލަރަކަށް ފިޔަވަޅު ނޭޅި މައްސަލަ ބޮޑުވެއްޖެ!

ކުޑަ ފިރިހެން ކުދިންނާ އެއް ޖިންސުން ގުޅުން ހިންގާ ކަމަށް ތުހުމަތު ކުރެވޭ ފިރިހެން ކައުންސިލަރަކާ މެދު ފިޔަވަޅު ނޭޅި އިތުރު ކުދިން ނުރައްކަލެއްގެ ތެރެއަށް ހުށަހެޅިފައިވާ މައްސަލަ ރައްޔިތުންގެ މަޖިލީހުގެ ޖެންޑާ އެންޑް ހިއުމަން ރައިޓްސް ކޮމިޝަން އިން ބަލަން ފަށައިފި އެވެ.

އޭނާ އަށް ފިޔަވަޅު ނޭޅި ލަސްވާ މައްސަލައިގައި އެ ކޮމިޓީން އިއްޔެ ވަނީ ބައްދަލުވުމެއް ވެސް ބާއްވައިފަ އެވެ.

ރަށު ކައުންސިލެއްގެ ނައިބު ރައީސްކަން ކުރާ އެ މީހާގެ ވަނަވަރު "މިހާރު" އަށް އެނގުނު ނަމަވެސް މި މައްސަލައިގައި ހިމެނޭ ކުޑަކުދިންގެ ރައްކާތެރިކަމަށްޓަކައި އެ މީހާގެ ނަން ނުހިމެނީ އެވެ. ކުޑަކުދިންގެ އުމުރާ ނުގުޅޭ، ޖިންސީ ވާހަކަ ދައްކައި ކުދިންތަކަކަށް އޭނާ ފޯނުން ފޮނުވާފައިވާ މެސެޖްތަކެއްގެ ކޮޕީ ވެސް "މިހާރު" އަށް ލިބިފައިވެ އެވެ.

ކުޑަކުދިންނާ ގުޅުން ހުރި ގިނަ މައްސަލަތަކެއްގައި ހައްލު ހޯދައިދޭން މަސައްކަތް ކުރަމުން އަންނަ ޖެންޑާ ކޮމިޓީގެ މުގައްރިރު، ހިންނަވަރު ދާއިރާގެ މެމްބަރު ޖީހާން މަހްމޫދު ވިދާޅުވީ ކުޑަކުދިންނަށް ޖިންސީ ގޯނާކުރާ ކަމުގެ ތުހުމަތުގައި ދައުވާ ކުރަން ފޮނުވާފައިވާ މީހަކު ކައުންސިލެއްގެ ނުފޫޒު ގަދަ މަގާމެއްގައި ހުރުމަކީ ކޮމިޓީގެ ކަންބޮޑުވުމެއް ކަމަށެވެ. އެފަދަ މައްސަލައެއްގައި، ތުހުމަތުކޮށް ދައުވާ އުފުލިއްޖެ ނަމަ މަގާމުގެ މަސްއޫލިއްޔަތުން ދުރުކުރެވޭނެ ކޮންމެވެސް ގޮތެއް އޮންނަން ޖެހޭނެ ކަމަށް އޭނާ ވިދާޅުވި އެވެ.

އެކަމަކު، ނިޒާމުގެ ތެރެއިން އޭނާ އަށް ފިޔަވަޅު އެޅޭނެ ގޮތެއް ނެތި ހުރީ ދޫވެފަ އެވެ. މިއީ، ކޮމިޓީގެ އިތުރުން، އެ ކައުންސިލަރު ނިސްބަތްވާ ރަށުގެ ގިނަ އާއިލާތަކެއްގެ ވެސް ކަންބޮޑުވުމެއް ކަމަށް ޖީހާން ވިދާޅުވި އެވެ. އެ މައްސަލަ ކޮމިޓީއާ ހިއްސާކުރީ ވެސް އެ ކައުންސިލަރު ނިސްބަތްވާ ރަށުންނެވެ.

"ކުޑަކުދިންގެ ހިމާޔަތާއި ރައްކާތެރިކަމަށް ނުރައްކާ އޮތް މިފަދަ މީހުންގެ މައްސަލަތައް ނުބަލައި އާދައިގެ ކަމެއްގެ ގޮތުގައި، ދޫކޮށްލަން ކޮމިޓީން ބޭނުމެއް ނުވޭ،" ޖީހާން ވިދާޅުވި އެވެ.

ކޮމިޓީން ބަލަމުން އަންނަ މި މައްސަލަ ވަނީ ފުލުހުން ހިމެނޭ ގޮތުން ކަމާބެހޭ އިދާރާތަކުގެ ސަމާލުކަމަށް ގެނެސްފަ އެވެ.

އެނގިފައިވާ ގޮތުގައި ކުޑަކުދިންނަށް ޖިންސީގޯނާކުރާ މި ކައުންސިލަރުގެ މައްސަލަ ލޯކަލް ގަވަމެންޓް އޮތޯރިޓީ (އެލްޖީއޭ) އިން ވެސް ބެލި އެވެ. އެކަމަކު، ކައުންސިލަރަކު މަގާމުން ސަސްޕެންޑްކުރުން ނުވަތަ އެ ނޫން ފިޔަވަޅެއް އެޅުމުގެ ބާރު އެ އިދާރާ އަށް ނޯންނާތީ، އެޓާނީ ޖެނެރަލްގެ ލަފާ ހޯދިކަން ވެސް އެނގިފައިވެ އެވެ.

ކުޑަކުދިންތަކަކަށް ޖިންސީގޯނާކުރާ ކައުންސިލަރެއްގެ މައްސަލަ ކޮމިޓީން ބަލަމުން އަންނަ އިރު، ކައިވެނީގެ ނަމުގައި 13 އަހަރުގެ ކުއްޖަކު ރޭޕްކުރި މައްސަލައެއް ވެސް ޖެންޑާ އެންޑް ހިއުމަން ރައިޓްސް ކޮމިޓީން އަންނަނީ ބަލަމުންނެވެ. އެ މައްސަލައިގައި، ކަމާބެހޭ އިދާރާތަކުން ވަގުތުން ފިޔަވަޅު އަޅަން އެންގުމުން، އެ އަންހެން ކުއްޖާ ވިހެއި ދަރިފުޅާ އެކު އެ އާއިލާގެ ޖުމްލަ ހަތް ކުދިން ވަނީ ދައުލަތުގެ ބެލުމުގެ ދަށަށް ނަގައިފަ އެވެ.