ޖަލު ހުކުމް ތަންފީޒުކުރާ މީހުންގެ އަދަދު ގިނަވެ، ޖަލުތައް ފުރޭ މައްސަލަ ހައްލު ކުރުމަށްޓަކައި ގާނޫނުލް އުގޫބާތުގެ ދަށުން އަދަބުގެ ބާވަތް ބަދަލު ކުރެވޭތޯ މަސައްކަތް ކުރަމުން ގެންދަވާ ކަމަށް ޕްރޮސެކިއުޓާ ޖެނެރަލް ހުސައިން ޝަމީމް މިއަދު ވިދާޅުވެއްޖެ އެވެ.
ޖަލުގެ ޖާގައަށް ވުރެ ގައިދީންގެ އަދަދު ގިނަވުމުން ކަރެކްޝަންސް އިން މިހާރު ވަނީ ޖަލަށް ގެންދަންޖެހޭ މީހުންނާ ހަވާލުވުމަށް ދެކޮޅު ހަދައިފަ އެވެ. އެހެންވެ، ކަރެކްޝަންސްގެ ބެލުމުގެ ދަށުން ޝަރީއަތް ނިމެންދެން ބަންދު ކޮށްފައި ތިބެންޖެހޭ ބައެއް މީހުން ވެސް މިހާރު ތިބީ ފުލުހުންގެ ބެލުމުގެ ދަށުގައި ދޫނިދޫގަ އެވެ.
އެކަމާ ގުޅިގެން ޕްރޮސެކިއުޓާ ޖެނެރަލް ޝަމީމް ކުރެއްވި ޓްވީޓެއްގައި ވަނީ ގާނޫނުލް އުގޫބާތުގެ ދަށުން ޖަލު ހުކުމް އަދަބު އެހެން ބާވަތުގެ އަދަބަކަށް ބަދަލު ކުރުމުގެ ފުރުސަތު ބައެއް މައްސަލަތަކުގައި އޮންނަ ކަމަށާއި އެކަމާ ގުޅޭގޮތުން ބަންޑާރަ ނައިބުގެ އޮފީހާއި ހޯމް މިނިސްޓްރީއާ އެކު ޕްރޮސެކިއުޓާ ޖެނެރަލްގެ އޮފީހުން މަސައްކަތް ކުރަމުންދާ ކަމަށް ޝަމީމް ވިދާޅުވި އެވެ. އަދި ހުރިހާ މުއައްސަސާތަކެއް ގުޅިގެން ޖަލުތައް ފުރޭ މައްސަލައަށް ހައްލު ހޯދަންޖެހޭ ކަމަށް އޭނާ ވިދާޅުވި އެވެ.
ގާނޫނުލް އުގޫބާތު ބުނާގޮތުން ޖަލު ހުކުމުގެ އަދަބު ގޭ ބަންދަށް ނުވަތަ ޖޫރިމަނާ އަށް ނުވަތަ މުޖްތަމައަށް ޚިދުމަތް ކުރުން ފަދަ އަދަބަކަށް ބަދަލު ކުރެވިދާނެ އެވެ. އަދަބުގެ ބާވަތް ބަދަލު ކުރާ ނަމަ، އެކަން ކުރެވޭނެ މުއްދަތުތަކާއި ޖޫރިމަނާގެ އަދަދުތައް ވެސް ގާނޫނުލް އުގޫބާތުގައި ހިމަނާފައިވެ އެވެ.
އެކަމަކު ނުރައްކާތެރި ކުށްތަކުގައި ނުވަތަ ކުށްވެރިޔާ ބަންދު ކުރުން ކޮންމެހެން ބޭނުންތެރި ނަމަ އަދި މީހުން މެރުން ފަދަ ބޮޑެތި ކުށްތަކުގައި އެ މީހެއްގެ އަދަބުގެ މަދުވެގެން ހަތަރު ބައި ކުޅަ އެއް ބައި ވާން ޖެހޭނީ ޖަލަށްލުން ކަމަށް ގާނޫނު އުގޫބާތުގައިވެ އެވެ.
މީގެ ކުރިން ވެސް ބައެއް މައްސަލަތަކުގައި ޖަލު ހުކުމުގެ އަދަބު ގޭ ބަންދަށް ނުވަތަ ޖޫރިމަނާ އަށް ބަދަލު ކޮށްފައިވެ އެވެ.
