އަންނަ އެޕްރީލް މަހުގެ ހަތަރެއް ގައި ބާއްވާ ލޯކަލް ކައުންސިލްތަކުގެ އިންތިޚާބުގައި ވޯޓުލާން ޖެހޭ ގޮތަށް ބަދަލު ގެނެސް ވޯޓު ކަރުދާހުގެ އަދަދު މަދުކޮށްފައިވާ ކަމަށް އިލެކްޝަންސް ކޮމިޝަންސް (އީސީ) އިން މިއަދު ބުނެފި އެވެ.
ލާމަރުކަޒީ ގާނޫނުގެ ދަށުން މިހާތަނަށް ބޭއްވި އިންތިޚާބުތަކުގައި ރަށު ކައުންސިލްތަކާއި އަތޮޅު ކައުންސިލްތަކަށް މެމްބަރުން ހޮވަން ފާހަގަލަނީ ވަކި ދެ ކަރުދާސްކޮޅަކުންނެވެ. އޭގެ ބަދަލުގައި މި އިންތިޚާބުގައި އަތޮޅު ކައުންސިލަރުން އިންތިޚާބުގައި ވަކި ކަރުދާހެއް ބޭނުމެއް ނުކުރާނެ އެވެ.
ސިޓީތަކުގެ އިންތިޚާބުގައި މޭޔަރުންނާއި ކައުންސިލަރުންގެ ވޯޓަށް ބޭނުންކުރާނީ އެއް ކަރުދާސްކޮޅެވެ. ރަށު ކައުންސިލްތަކުގައި ވެސް ކައުންސިލްތަކުގެ ރައީސުންނާއި އަތޮޅު ކައުންސިލަރުންނާއި ކައުންސިލަރުން އަދި އަންހެނުންނަށް ޚާއްސަކުރާ ގޮނޑިތަކަށް ބޭނުންކުރާނީ އެއް ކަރުދާސްކޮޅެވެ. ދެން އޮންނަނީ އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ މެމްބަރުން ހޮވަން ވޯޓު ނަގާ ކަރުދާސްކޮޅެކެވެ.
އިލެކްޝަންސް ކޮމިޝަންގެ ނައިބު ރައީސް އަހްމަދު އަކްރަމް މިއަދު ވިދާޅުވީ މި ބަދަލު ގެނައީ ރައްޔިތުންނަށް ވީހާ ވެސް ފަސޭހަވާނެ ގޮތަކަށް ވޯޓުގެ ކަންކަން ނިންމާލަން ކަމަށެވެ. ކައުންސިލަރުންނާއި އަތޮޅު ކައުންސިލް އަދި އަންހެން ކައުންސިލަރުންނަށް ވަކިވަކިން ވޯޓު ނަގާ ނަމަ ވަރަށް ގިނަ ވަގުތު ހޭދަވާނެ ކަމަށް އޭނާ ވިދާޅުވި އެވެ.
"ވޯޓުލާން އަންނަ މީހުންނަށް ފަސޭހަވުމުގެ އިތުރުން ނަތީޖާ ގުނަން ހޭދަވާ ވަގުތު ވެސް މަދުވާނެ،" އަކްރަމް ވިދާޅުވި އެވެ.
މި އިންތިޚާބުގައި ކުރިއެކޭ އެއްގޮތަށް ވޯޓުލުން ކުރިއަށް ގެންދާ ނަމަ ޗާޕްކުރަން ޖެހޭ ވޯޓު ކަރުދާހުގެ އަދަދު މިލިއަނަކަށް ވުރެން ގިނަ އެވެ. އެކަމަކު މި އިންތިޚާބުގައި ގެނައި ބަދަލާ އެކު ވޯޓު ކަރުދާސް ޗާޕްކުރާނީ 500،000-600،000 ދެމެދުގެ އަދަދެއް ކަމަށް އިލެކްޝަންސް ކޮމިޝަނުން ބުންޏެވެ.
ކައުންސިލް އިންތިޚާބު:
- އިންތިހާބަށް ކުރިމަތިލާން ހުޅުވާލާނީ އަންނަ މަހުގެ ފުރަތަމަ ހަފްތާގައި.
- ލާމަރުކަޒީ ގާނޫނަށް ގެނެސްފައިވާ އިސްލާހާ އެކު ޖުމްލަ 980 ކައުންސިލަރުން އިންތިޚާބު ކުރާނެ.
- ރަށު ކައުންސިލްތަކަށް 372 އަންހެން ކައުންސިލަރުން އިންތިޚާބުކުރާނެ.
- މާލެ އާއި އައްޑު އާއި ފުވައްމުލަކުގެ އިތުރުން ކުޅުދުއްފުށީގައި މޭޔަރުން އިންތިޚާބުކުރާނެ.
- ރަށު ކައުންސިލްތަކުގެ ރައީސުންގެ ގޮތުގައި 179 މީހަކު އިންތިޚާބުކުރާނެ.
- އަތޮޅު ކައުންސިލަރުންގެ ގޮތުގައި އިންތިޚާބުކުރާނީ 18 މީހަކު.
- އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް 929 މެމްބަރުން އިންތިހާބު ކުރާނެ.
މީގެ ކުރީގެ އިންތިޚާބުތަކާ ހިލާފަށް މި އިންތިޚާބުގައި ވޯޓުލާނީ ފޮއްޓަކަށް އެންމެ ގިނަވެގެން 700 މީހުންނެވެ. އެހެންކަމުން މި ފަހަރުގެ އިންތިޚާބުގައި ވޯޓު ފޮށީގެ އިތުރުން އޮފިޝަލުންގެ އަދަދު ވެސް އިތުރުވާނެ އެވެ.
އިލެކްޝަންސް ކޮމިޝަނުން ވަނީ މަދުވެގެން 150 މީހުން ރަޖިސްޓަރީ ވެފައިވާ ގައުމުތަކުގައި ވޯޓުފޮށި ބަހައްޓަން ނިންމައިފަ އެވެ. ރިސޯޓުތަކުން ވެސް މަދުވެގެން 50 މީހުން ރީ-ރަޖިސްޓްރީ ވެއްޖެ ނަމަ އެ ރިސޯޓެއްގައި ވޯޓުފޮށި ބަހައްޓާނެ އެވެ.
ގާނޫނަށް ގެނައި އިސްލާހާ އެކު އަންހެނުންނަށް ޚާއްސަ ކުރި ސިޓީ ކައުންސިލްތަކުގައި އަންހެނުންނަށް ޚާއްސަ ކުރި ގޮނޑިތައް އިލެކްޝަންސް ކޮމިޝަނުން ވަނީ އިއުލާންކޮށްފަ އެވެ. މި ގޮނޑިތަކުގެ އިތުރުން ކައުންސިލްތަކުގެ ރައީސުންގެ ގޮތުގައި ވެސް އަންހެނުންނަށް ވާދަކުރެވޭނެ އެވެ.
