އޯޕެކް ފަންޑް ފޯ އިންޓަނޭޝަނަލް ޑިވެލޮޕްމެންޓް (އޮޕިޑް) އިން ރާއްޖެއަށް 50 މިލިޔަން ޑޮލަރު (771 މިލިއަން ރުފިޔާ) ލޯނެއް ދީފި އެވެ.
ހޮޓެލް ޖެންގައި މިއަދު އޮތް ރަސްމިއްޔާތެއްގައި އެ ލޯނު އެެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު އިބްރާހީމް އަމީނެވެ. އޮޕިޑްގެ ފަރާތުން ސޮއިކުރެއްވީ ޑިރެކްޓަރު ޖެނެރަލް ޑރ. އަބްދުލްް ހާމިދު އަލް ޚަލީފާ އެވެ.
އޭގެ ފަހުން އޮތް ނޫސްކޮންފަރެންސްގައި އަމީރު ވިދާޅުވީ މިއީ ހަތަރު ޕަސެންޓްގެ އިންޓަރެސްޓް ރޭޓަކާ އެކު 20 އަހަރު ދުވަހުން ދައްކާ ގޮތަށް ނެގި ލޯނެއް ކަމަށެވެ. ލޯން ދައްކަން ފަށަން ޖެހޭނީ ފަސް އަހަރު ފަހުންނެވެ.
އަމީރު ވިދާޅުވި ގޮތުގައި މި ލޯނުން ހަދަރުކުރާނީ އަށް ރަށެއްގެ ފެނާއި ނަރުދަމާ އާއި ފަސް ރަށެއްގެ ބަނދަރު މަރާމާތު ކުރާށެވެ. އެގޮތުން ފެނާއި ނަރުދަމާ އަޅާނީ ހދ. ނެއްލައިދޫ، ނޭކުރެންދޫ، މަކުނުދޫ، ށ. ފޭދޫ، ބ. ކެންދޫ، ދަރަވަންދޫ، ގދ. ވާދޫ އަދި އެ އަތޮޅު ފިޔޯރީގަ އެވެ.
ބަނދަރު މަރާމާތު ކުރަން ހަމަޖެހިފައި ވަނީ ބ. ކުޑަރިކިލު، ދޮންފަނު، ކިހާދޫ، ގއ. ކޮލަމާފުށި އަދި ގދ. ހޯޑެއްދޫގަ އެވެ.
އަމީރު ވިދާޅުވީ އެ މަޝްރޫއުގެ ފައިދާ 20،000 އަށް ވުރެ ގިނަ މީހުންނަށް ކުރާނެ ކަމަށެވެ.
އޭނާ ވިދާޅުވި ގޮތުގައި ލޯނު ބޭނުންކުރަނީ މި އަހަރުގެ ބަޖެޓްގައި ހިމަނާފައިވާ މަޝްރޫއުތަކަކަށް ކަމަށާއި އެ މަސައްކަތްތައް ބީލަމަށް ހުޅުވާލުމުގެ މަސައްކަތް ފަށާފައިވާ ކަމަށެވެ.
"އަޅުގަނޑުމެން މިހާރު ވަނީ ޓެންޑަރިން ޕްރޮސެސް ފަށާފައި. އެއީ މި ހުރިހާ ކަމެއް ވެސް މިއީ ބަޖެޓްގައި ހިމަނާފައި ހުރި ކަންތައްތައް ވީމާ. އަޅުގަނޑުުމެން ތިބީ ލޯނު ލިބެންދެން. އެހެންވީމާ މި މަޝްރޫއުގެ އަމަލީ މަސައްކަތްތައް ވަރަށް އަވަހަށް ފެށޭނެ،" މިނިސްޓަރު ވިދާޅުވި އެވެ.
