ހިމަބިހި ވެކްސިން ނުޖަހާ ތިބި މީހުންގެ އަދަދު ބަލައިފި

ރާއްޖޭގައި ހިމަބިހީގެ ވެކްސިންް ނުދެވި ތިބި މީހުންގެ އަަދަދު ގާތްގަނޑަކަށް ދެނެގަނެވިފައިވާ ކަމަށް ހެލްތު މިނިސްޓަރު އަބްދުﷲ އަމީން މިއަދު ވިދާޅުވެއްޖެ އެވެ.

ހެލްތު މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި އަމީން ވިދާޅުވީ ހިމަބިހި އަލުން ފެތުރެން ފެށުމުން، ވެކްސިން ދިނުމަަށް ފެށި ޕްރޮގްރާމްގައި ގިނަ މައުލޫމާތުތަކެއް މިހާރު އެއްކޮށްފަައިވާ ކަމަށެވެ. އެގޮތުން ވެކްސިން ނުޖަހާ މީހުންގެ އަދަދު ގާތްގަނޑަކަށް ދެނެގަނެވިފައި ވިޔަސް އެ މައުލޫމާތު އަދި އިތުރަށް ކަށަވަރުކުރަން ޖެހޭ ކަމަށާއި އަދަދު ހާމަކުރައްވާނީ އެއަށް ފަހުގައި ކަމަށް އޭނާ ވިދާޅުވި އެވެ.

"މިހާތަނަށް އަޅުގަނޑުމެންނަށް ރަށްރަށުން ލިބިފައިވާ މައުލޫމާތުގެ ތެރޭގައި، އެންމެ ރަނގަޅު އަދަދަކަށް އެބައުޅޭ ވެކްސިން ކޮމްޕްލީޓް ނުވާ ފަރާތްތައް. އެއީ ފުރަތަމަ ޑޯޒް ނުޖަހައި ދެވަނަ ޑޯޒް ނުޖަހައި ކުދިން ވެސް އެބަ އުޅޭ،" އަަމީން ވިދާޅުވި އެވެ.

މިނިސްޓަރު ވިދާޅުވީ ހިމަބިހި އިތުރަށް ފެތުރުނަ ނުދިނުމަށް ވަރަށް ބުރަކޮށް މަސައްކަތްކުރަމުން އަންނަ ކަަމަށާއި އެގޮތުން އެންމެ ބޮޑަށް ކުރިއަށް ގެންދާ ކަމަކީ މިހާތަނަށް ހިމަބިއްސަށް ޕޮޒިޓިވްވި މީހުން ދިރިއުޅޭ ސަރަހައްދުތަކުގެ މީހުންނަށް ވެކްސިން ދިނުމުގެ މަސައްކަތް ކަަމަށެވެ. އެގޮތުން މިހާތަނަށް 3،100 މީހަކަށް ވެކްސިން ދީފައިވާ ކަމަށް އޭނާ ވިދާޅުވި އެވެ.

ރާއްޖޭން ނައްތާލާފައިވާ ހިމަބިހި އަލުން ފެތުރެން ފެށުމުން އެ ބައްޔަށް ވެކްސިން ދިނުމަށް ހިންގާ ޕްރޮގްރާމް ތިން މަސްދުވަހަށް ކުރިއަށް ގެންދާނެ ކަމަށް އަމީން ކުރިން ވިދާޅުވި އެވެ. އެގޮތުން ރާއްޖެ އަށް ބޭނުންވާ ދެލައްކަ ޑޯޒް ލިބޭނެ އިންތިޒާމް ހަމަޖެހިފައިވާ ކަމަށް ވެސް ވިދާޅުވި އެވެ.

އަމީން މިއަދު ވިދާޅުވީ ދެލައްކަ ޑޯޒް ގެންނަން ކުރާ މަސައްކަތުގެ ތެރެއިން އިންޑިއާ އިން ހަދިޔާކުރި 30،000 ޑޯޒް މާދަމާ ރާއްޖެއަށް ގެންނާނެ ކަމަށެވެ.

"އިންޑިއާ ސަރުކާރާ ވާހަކަ ދައްކައި، ކުރެވުނު މަސަައްކަތުގެ ތެރެއިން މާދަމާ ރާއްޖެ އަށް ގެނެވޭނެ ކަމަށް މައުލޫމާތު ލިބިފައި ވަނީ 30،000 ޑޯޒް،" އަމީން ވިދާޅުވިި އެވެ.