މާލެއަށް ގާތްގަނޑަކަށް ދިމާވެފައި މިވަނީ ފަލަސްތީނަށް ޖެހިފައިވާ ހާލު ކަމަށް، ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން) ރޭ ވިދާޅުވެއްޖެ އެވެ.
ރާއްޖެޓީވީގެ "ފަލަ ސުރުހީ" ޕްރޮގްރާމުގައި ވާހަކަދައްކަވަމުން ހުސެއިން ވިދާޅުވީ ކޯސްޓް ބޮޑު ދަޅެއްގައި ނިދާފައި، ކޯސްޓް ކުޑަ ދަޅެއްގައި ފެން ވަރައިގެން އުޅެން ޖެހޭ ވަރަށް ވުރެ މާލޭ ރައްޔިތުންނަކީ މާ ޝަރަފުވެރި ބައެއް ކަމަށެވެ. އެ ރައްޔިތުންނަށް، ފްލެޓާއި ބިންކޮޅެއް ނުލިބޭތާ އެތައް އަހަރެއް ވެފައިވާ ކަމަށް ވެސް އޭނާ ވިދާޅުވި އެވެ.
ހުސެއިން ވިދާޅުވީ މުޅި މާލެ ހިއްކައި، ކޮންމެ ސަރުކާރަކުން ވެސް ހައްގުވެރިންނަށޭ ކިޔާފައި އެ ބިންކޮޅު ހިތުހުރި ގޮތަކަށް، އެމީހަކަށް ފައިދާހުރި ގޮތަކަށް ދުއްވާލަނީ ކަމަށެވެ. އެކަމަކކު މާލެ އަކީ މާލެ މީހުންގެ ރަށެއް ކަމަށް އޭނާ ވިދާޅުވި އެވެ.
"ކަނޑު ތޮއްޓާ ހަމައަށް ހިއްކައި ރާއްޖޭގެ އެކި ކަންކޮޅުތަކުން މީހުން ގެނެސް މިތަންތަނުގައި ވަޒަންވެރިކުރުވީ. މާލޭ މީހުން ތިބި ގޮތަށް ތިބީ. ހަމަ ގާތްގަނޑަކަށް މިތަނަށް ދިމާވެފައި މި އޮތީ ފަލަސްތީނަށް ދިމާވެފައިވާ ކަމެއް،" ހުސެއިން ވިދާޅުވި އެވެ.
ރައީސް އިބްރާހިމް މުހައްމަދު ސޯލިހުގެ ވެރިކަމުގެ ދައުރު ހަމަވާއިރު، މާލޭގެ ރައްޔިތުން، "ބިންވެރިކަމުން އުފަލުން ފޮޅޭވަރު ކޮށްލާނެ" ކަމުގެ ޔަގީންކަން، އެމްޑީޕީގެ ޕާލިމަންޓް ގްރޫޕު (ޕީޖީ) ގެ ޑެޕިއުޓީ ލީޑަރުކަން ކުރައްވާ މެމްބަރު ދެއްވި އެވެ.
އެކަމަކު ހުސެއިންގެ އެ ވާހަކައާ މެދު، އެމްޑީޕީގެ އެހެން މެމްބަރެއް ކަމަށްވާ ދާންދޫ ދާއިރާގެ ޔައުގޫބު އަބްދުﷲ ވަނީ ރައްދުދެއްވައިފަ އެވެ.
ޔައުގޫބު ކުރެއްވި ޓްވީޓެއްގައި، ހުސެއިންގެ ވާހަކަ ސިފަކުރެއްވީ ރަށްރަށުގެ މީހުން، އިޒުރޭލްގެ ޔަހޫދީންނާ އެއްވަރުކުރި ކަމެއްގެ ގޮތުގަ އެވެ.
"އިޒުރޭލްގެ ނުބައިނުލަފާ މީހުންނާ އެއް ހަމަޔަކުން މިރާއްޖޭގެ 'ރާއްޖެތެރޭ މީހުން' މިނެކިރާތީ އެކަމާ ލަދުވެތިވެ، ކަންބޮޑުވެ، ދެރަވޭ،" ޔައުގޫބު ލިއުއްވި އެވެ.
އޭނާ ވިދާޅުވި ގޮތުގައި މާލޭގައި ދިރިއުޅޭ ރައްޔިތުންނަށް ވެސް ބޯހިޔާވަހިކަން ލިބެން ޖެހޭނެ ކަމަށް ގަބޫލުކުރައްވާ ކަމަށެވެ.
"އެކަމަކު ތަފާތުކުރުން ނައްތާލަން ޖެހޭ،" ޔައުގޫބު ވިދާޅުވި އެވެ.
ހުސެއިން ވިދާޅުވީ މާލެއަށް އުފަން، މާލޭ ރައްޔިތުންނަށް މާލެ ސަރަހައްދުން ބިމާއި ފްލެޓް، މާލަހެއް ނުވެ، ރައީސް އިބްރާހިމް މުހައްމަދު ސޯލިހު ދެއްވާނެ ކަމަށެވެ.
"މި އަހަރުގެ ތެރޭގައި ގުޅީފަޅާ ދިމާލުން ހިއްކަން ޖެހޭ ބިމާއި ބްރިޖުގެ މަސައްކަތް ފެށޭނެ ކަމަށް ޔަގީން،" އޭނާ ވިދާޅުވި އެވެ.
އެ ބްރިޖުގެ މަސައްކަތް ނިމުމާ އެކު އެ ސަރަހައްދުން، މާލޭގެ ރައްޔިތުންނަށް ބިން ދިނުމުގެ މަޝްރޫއު މި ސަރުކާރުން ހިންގާނެކަމާ މެދު ޝައްކެއް ނެތް ކަމަށް ވެސް ހުސެއިން ވިދާޅުވި އެވެ.
އެމްޑީޕީގެ ކުރީގެ ސަރުކާރުން "ވެށިފަހި މާލެ" ނަމުގައި ޕްރޮގްރާމެއް ފަށައި، މާލެއިން ކުދިކުދި ބިންކޮޅު ދޫކުރި 200 އަށް ވުރެ ގިނަ މީހުންނަށް ހުޅުމާލެއިން 1،200 އަކަފޫޓުގެ ބިމެއް ދިނެވެ. އެކަމަކު 2012 ގައި އެމްޑީޕީގެ ވެރިކަން ބަދަލުވިއިރު 160 އެއްހާ މީހުންނަށް ބިން ނުދީ އޮތެވެ. އެމީހުންނަށް ވެސް ހުޅުމާލެއިން ބިން ދޭން ޖެހޭ ކަމަށް، އެމްޑީޕީގެ ބައެއް މެމްބަރުން ގެންދަވަނީ ވިދާޅުވަމުންނެވެ.