އަންހެނުންނަށް ކުރާ އަނިޔާތަކާ ގުޅޭ އިންކުއަރީއެއް ހެދުމަށް ގޮވާލައި ރައްޔިތުންގެ މަޖިލީހަށް ގަރާރެއް ހުށަހަޅައިފި އެވެ.
މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ މިދިޔަ ބުރާސްފަތި ދުވަހު ހުށަހެޅުއްވި ގަރާރުގައި ވިދާޅުވެފައިވަނީ ރާއްޖޭގެ އާބާދީގެ 49 ޕަސެންޓު އަންހެނުން ހިއްސާކުރާއިރު އެމީހުންނާ މެދު ކުރާ ތަފާތުކުރުންތަކަށް ނިމުމެއް ގެންނަން، ގައުމީ ތަރައްގީގައި އަންހެނުންގެ ފުރިހަމަ ބައިވެރިވުމާއި ފުރިހަމަ ހިއްސާ އޮތުމުން ތަރައްގީގެ ދުވެލި ހަލުވިވެގެންދާނެ ކަމަށެވެ.
ކަންކަން ނިންމާ ފެންވަރުގައި އަންހެނުންގެ ބައިވެރިވުން އިތުރުވުމަކީ އަންހެނުންނަށް ކުރިމަތިވާ މައްސަލަތަކަށް ހައްލު ހޯދުމަށް އެޅޭ މުހިއްމު ފިޔަވަޅެއްކަން ފާހަގަކޮށް ގަރާރުގައި ބުނީ އަންހެނުންގެ ބައިވެރިވުން އިތުރުކުރުމަށް ކުރި މަސައްކަތުގެ ތެރެއިން ލާމަރުކަޒީ ގާނޫނަށް ގެނައި އިސްލާހަކީ ގައުމީ ތަރައްގީގައި އަންހެނުންގެ ހިއްސާ އިތުރުކުރުމަށްޓަކައި އެޅުނު މުހިއްމު ފިޔަވަޅެއް ކަމަށެވެ.
ލާމަރުކަޒީ ގާނޫނަށް ގެނައި އިސްލާހުގައިވާ ގޮތުން ކައުންސިލްތަކަށް އިންތިޚާބުކުރާ މެމްބަރުންގެ ތެރެއިން 33 ޕަސެންޓް އަންހެނުންނަށް ހާއްސަކުރަންޖެހޭނެ ކަމަށެވެ. އެއާއެކު، އަންނަ މަހު ބާއްވާ ކައުންސިލް އިންތިޚާބުގައި ވާދަކުރާ އަންހެނުންގެ އަދަދު، އެހެން އަހަރުތަކާ ހިލާފަށް ވަނީ އިތުރުވެފަ އެވެ. ގާނޫނުގައި ބުނާގޮތުން 380 އަށް ވުރެ ގިނަ އަންހެން ކައުންސިލަރުން އިންތިޚާބު ކުރަން ޖެހެ އެވެ.
އަންހެނުން ބާރުވެރިކުރުވުމަށް ކުރާ މަސައްކަތުގައި އަދި އަންހެނުންނާ މެދު ކުރާ ތަފާތުކުރުންތައް ނައްތާލުމަށްޓަކައި ރާއްޖޭގައި އަމަލުކުރާ ގާނޫނުތަކާއި ގަވާއިދުތަކާއި ސިޔާސަތުތަކާއި ނިޒާމުގައި ހުރި ދަތިތައް ހައްލުކުރުމަށްޓަކައި އެތައް މަސައްކަތެއް ކޮށްފައިވީ ނަމަވެސް އަންހެނުން ބާރުވެރިކުރުވައި ހަމަހަމަ ފުރުސަތު ހޯދައިދިނުމަށްޓަކައި މީގެ އިތުރުން ވެސް ކަންކަން ކުރަންޖެހިފައިވާ ކަމަށް ގަރާރުގައިވެ އެވެ.
"މުޖުތަމައުގައި އަންހެނުންނާ މެދު ކުރާ ނޭދެވޭ ތަފާތުކުރުންތައް ނައްތާލުމަށް އެކަށީގެންވާ ފިޔަވަޅު އެޅުމަށާއި ދިވެހި މުޖުތަމައުގައި އަންހެނުންނަށް ހަމަހަމަ ފުރުސަތު މަގުފަހިކޮށްދިނުމަށާއި ގާނޫނުގެ ކުރިމަތީގައި ހަމަހަމަކަން ކަށަވަރުކޮށްދިނުމަށް އަދި މިފަދަ ކަންކަމާ ގުޅޭގޮތުން ރާއްޖޭގައި އަމަލުކުރާ ގާނޫނުތަކާއި ގަވާއިދުތަކާއި ސިޔާސަތުތަކާއި ނިޒާމުގައި ހުރި ދަތިތަކާއި ގޮންޖެހުންތަކަކީ ކޮބައިކަން ދެނެގަތުމަށް ރައްޔިތުންގެ މަޖިލީހުގެ ކަމާގުޅޭ ކޮމެޓީން ޕާލިމަންޓްރީ އިންކުއަރީއެއް ހަދައި އެކަމަށް ދާއިމީ ހައްލެއް ހޯދުމަށްޓަކައި އިސްލާހުކުރަންޖެހޭ ކަންކަން ބަޔާންކޮށް އެ ކޮމެޓީގެ ރިކޮމެންޑޭޝަންސްތައް ރައްޔިތުންގެ މަޖިލީހަށް ހުށަހެޅުމަށް ގޮވާލައި ރައްޔިތުންގެ މަޖިލީހުގެ ގަވާއިދުގެ 167 ވަނަ މާއްދާގެ ދަށުން މި ގަރާރުު ހުށަހަޅަމެވެ،" ގަރާރުގައިވެ އެވެ.