އިސްކަންދަރު ސްކޫލުގެ ދަރިވަރުންތަކެއް، އެ ސްކޫލުގެ ގޯތިތެރޭގައި މަޑުކޮށްލައިގެން.-- ފޮޓޯ: ހުސެއިން ވަހީދު/ މިހާރު
24 މާޗް 2020 - 01:14
2 comments
ކެމްބްރިޖް ޔުނިވާސިޓީން އަންނަ މެއި އަދި ޖޫން މަހު ބާއްވަން ތާވަލްކުރި އިމްތިހާންތައް ކެންސަލްކޮށްފި އެވެ.
އެ ޔުނިވާސިޓީން މިރޭ ނެރުނު ބަޔާނެއްގައި ބުނީ، ކޮވިޑް-19 އާ ގުޅިގެން ދުނިޔޭގެ ގިނަ ސްކޫލުތަކެއް ބަންދުކޮށްފައިވާ ކަމަށެވެ. އެހެންވެ އިމްތިހާން ބޭއްވޭނެ މާހައުލެއް ނެތުމުން، ކެމްބްރިޖް އައިޖީސީއެސްއީ އާއި ކެމްބްރިޖް އޯ ލެވެލް އާއި ކެމްބްރިޖް އިންޓަނޭޝަނަލް އޭއެސް އޭ ލެވެލް އަދި ކެމްބްރިޖް އޭއައިސީއީ ޑިޕްލޮމާގެ މެއި އަދި ޖޫން މަހުގެ އިމްތިހާން ނުބާއްވަން ނިންމީ ކަމަށް ބުންޏެވެ.
އޯ ލެވެލްގައި ރާއްޖޭގެ ދަރިވަރުން ހަދަނީ ކެމްބްރިޖުން ދޭ އިމްތިހާނެވެ. އޭ ލެވެލްގައި ހަދަނީ އެޑެކްސެލް އިމްތިހާނެވެ. އެހެންވެ ކެމްބްރިޖް ޔުނިވާސިޓީގެ މި ނިންމުމުގެ އަސަރު ރާއްޖެ އަށް މާ ބޮޑަކަށް ނުކުރާނެ އެވެ.
ރާއްޖޭގައި ކެމްބްރިޖްގެ އޯ ލެވެލް ހަދަނީ އޮކްޓޫބަރު އަދި ނޮވެމްބަރު މަހު އެވެ.
ނަމަވެސް އަމިއްލަ ބައެއް ސްކޫލްތަކުގައި މެއި އަދި ޖޫންގައި ކެމްބްރިޖް އިމްތިހާނު ހަދަ އެވެ. ރާއްޖޭގައި މި އަހަރު މެއި އަދި ޖޫން މަހު ކެމްބްރިޖް އޭލެވެލް އިމްތިހާން ހަދަނީ ބްރައިޓްވޭ ސްކޫލުގައި އެކަންޏެވެ. އެ ސްކޫލުން އިމްތިހާން ހަދަނީ އެންމެ ތިން ދަރިވަރުންނެވެ.
ކެމްބްރިޖް ޔުނިވާސިޓީން ބުނީ އެންމެ ބޮޑު ސަމާލުކަމެއް ދެނީ ދަރިވަރުންނާއި ޓީޗަރުންގެ ސަލާމަތާއި ރައްކާތެރިން ކަށަވަރުކޮށް ހަމަހަމަކަމާ އެކު ކިޔެވޭނެ މާހައުލެއް ފަހިކޮށްދިނުމަށް ކަމަށެވެ.
އިމްތިހާންތަކަށް ތައްޔާރުވުމަށް ދަރިވަރުން ބުރަ މަސައްކަތްތަކެއް ކޮށްފައިވާކަން ބަލައިގަންނަ ކަމަށާއި އެހެންވެ ލިބެން ހުރި މައުލޫމާތުތަކަށް ބަލައި ދަރިވަރުންގެ ފެންވަރު ވަޒަންކުރުމަށް މަސައްކަތްކުރާނެ ކަމަށް ބުންޏެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ާްއަލީ
24 March 2020
އޭލެވެލްގައި ހަދާ އެޑެކްސެލް އިމްތިހާނު މެއި ޖޫންމަހުގައި ބާއްވައިފިނަމަ ކުދިންނަށް ވަރަށް ދެރަގޮތެއްވެދާނެ. ކިޔަވައިނުދެވި ޓިއުޝަން ނުނެގި ތިބެފަ ޓެސްޓް ހަދަންޖެހިއްޖިއްޔާ ޓެސްޓަށް ވަރަށްބޮޑުއަސަރުކުރާނެ. އެޑިޔުކޭޝަނުން މި ޓެސްޓްވެސް ލަސްކުރެވޭތޯ މަސައްކަތްކޮށްދެއްވުން އެދެން. ކުދިންގެ މުޅިނުސްތަގުބަލާއި ގުޅިފައިވާ ކަމެއްމީ.
ހޯރާގޯރީ
24 March 2020
ރޯދަމަސް ނިމުމުގެ ކުރިން ސްކޫލްތަކާއި ސަރުކާރު އޮފީސްތަށް ހުޅުވުމަކީ ކުރަން ހެޔޮވާވަރުގެ ކަމެއްނޫން. މިހާރު ދުނިޔޭގެ ކަންކޮޅުތަކުގެ ހާލަތު ހުރިގޮތުން ސައުތު އޭސީއާގެ އާބާދީގެ އަށް މިވަނީ ވަރަށް އާދަޔާ ހިލާފު ފައްތަރެއްގާ. މާތްﷲ އަޅަމެންނަށް ހެޔޮގޮތް މިންވަރު ކުރައްވާށި. އާމީން.