ކޮވިޑް-19 އަށް ޕޮޒިޓިވްވާ މީހުންގެ ތެރެއިން ހައި ރިސްކު މީހުން ބައިތިއްބަން ފަރުކޮޅުފުށި އަލުން މަރާމާތުކޮށްފި އެވެ.
ޗައިނާގައި މިދިޔަ އަހަރުގެ ޑިސެމްބަރު މަހު ކޮރޯނާވައިރަސް ފެތުރެން ފެށުމުން، އެ ވައިރަހަށް ޝައްކުކުރެވޭ މީހުން އައިސޮލޭޓް ކުރަން ނުވަތަ ކަރަންޓީނުކުރަން އެންމެ ފުރަތަމަ ހަމަޖެއްސި އެއް ތަނަކީ ހުޅުމާލޭގެ ދެވަނަ ފިޔަވައްސާ ޖެހިގެން އޮންނަ ފަރުކޮޅުފުއްޓެވެ. ނަމަވެސް މަދިރީގެ އުނދަގުލާއި އެހެން ވެސް ޝަކުވާތަކާ ގުޅިގެން މަރާމާތަށް ބަންދުކުރީ އެވެ.
އޭރު ފަރުކޮޅުފުށި ފެސިލިޓީގައި ތިބި މީހުން ބަދަލުކުރީ އއ. ވެލިދު އަށެވެ. އެއީ ވެސް ކޮރޯނާވައިރަސް އަށް ޝައްކުވާ މީހުންނާއި އެ ވައިރަހަށް ޕޮޒިޓިވްވާ މީހުންނަށް ޚާއްސަ ކޮށްގެން ސަރުކާރުން މަރާމާތު ކުރި ތަނެކެވެ.
ފަރުކޮޅުފުށީގައި ކުރިން ބޭތިއްބީ، ކޮވިޑް-19 ޖެހިފައިވާ މީހުންގެ އިތުރުން އެ ބަލި ޖެހުމުގެ ފުރުސަތު ބޮޑު ގައުމުތަކުން އަންނަ މީހުންގެ ތެރެއިން ބަލީގެ އަލާމާތްތައް ހުންނަ މީހުން އެކަންޏެވެ.
މަރާމާތަށް ފަހު، ފަރުކޮޅުފުށި އައިސޮލޭޝަން ސެންޓަރު ވަނީ މިއަދު ނޫސްވެރިންނަށް ދައްކާލައިފަ އެވެ. ފަރުކޮޅުފުށި އެންމެ ފުރަތަމަ ބޭނުންކުރަން ފެށިއިރު ހުރީ 30 އެނދެވެ. ނަމަވެސް މިހާރު 50 އެނދަށް އިތުރުކޮށް، އައިސީޔޫ ދެ އެނދާއި ވެންޓިލޭޓަރުގައި ފަރުވާ ދެވޭނެ އިންތިޒާމު ވަނީ ހަމަޖައްސައިފަ އެވެ. އެ އެނދުތައް ބަހައްޓާފައި ވަނީ ހަތަރު ވޯޑަކަށް ބަހާލައިގެންނެވެ.
އިތުރު ފަރުވާދޭ މީހުން ބަދަލު ކުރާނީ ޓްރީޓޮޕް ހޮސްޕިޓަލް ނުވަތަ ދަރުމަވަންތަ ހޮސްޕިޓަލަށެވެ.
ފަރުކޮޅުފުށި މަރާމާތު ކުރުމުގައި އަމަލީ ގޮތުން އުޅުނީ ސިފައިންނެވެ. އެ މަސައްކަތުގައި ވިއްސަކަށް ސިފައިން ބައިވެރިވިއިރު މަރާމާތުކޮށް ނިންމާފައިވަނީ އެންމެ ހަތަރު ދުވަހުންނެވެ.
ތަނުގެ އިންފްރަސްޓްރަކްޗާ އަށް ވެސް ބަދަލުތަކެއް ގެނެސްފަ އެވެ. ބައެއް ވޯޑުތަކުގައި ދޮރުތައް މީގެ ކުރިން ހުރީ ހާމައަށް ފެންނާށެވެ. ނަމަވެސް މިހާރު ފިިލާ ޖަހައި އެ ތަންތަން ރަނގަޅަށް ބައްދައި އޭސީކޮށް ޓީވީ ބަހައްޓާފައި ވެ އެވެ.
ކޮންމެ ވޯޑެއްގައި ވެސް، އަންހެން އަދި ފިރިހެނުންނަށް ހާއްސަ ފާހަނާއެއް ހުރެ އެވެ.
ކޮވިޑް-19ގެ މައުލޫމާތު ދިނުމަށް ސަރުކާރުން ކަނޑައަޅާފައިވާ ތަރުޖަމާނު، މުހައްމަދު މަބްރޫކް އަޒީޒް، ފަރުކޮޅުފުށީގައި ހުންނަވައިގެން ނޫސްވެރިން ގާތު ވިދާޅުވީ މީގެ ކުރިން ފަރުކޮޅުފުއްޓާ ގުޅިގެން ލިބުނު އެންމެ ބޮޑު ޝަކުވާ އަކަށް ވީ މަދިރީގެ އުނދަގުލެވެ. އެކަމަކު، މިހާރު އެތަނުގެ ޕޫލްގެ ފެންގަނޑު ވެސް ހިންދައި، ކްލޮރިން އަޅައި ސާފުކުރަމުން އަންނަ ކަމަށް ވިދާޅުވި އެވެ. އަދި އެތަނަށް ބަލި މީހުން ގެންދަން ބޭނުން ކުރާނީ ޖެޓީކަމަށް ވިދާޅުވި އެވެ.
ކޮވިޑް-19 ޕޮޒިޓިވްވެގެން ރާއްޖޭގައި މިހާރު ފަރުވާ ދެމުން ހަމައެކަނި ހަތަރު ދިވެއްސަކަށެވެ. ރާއްޖެ އިން ކޮވިޑް-19 އަށް ޕޮޒިޓިވްވެފައިވާ 19 މީހަކު ފެނިފައިވާއިރު، 15 މީހުންނަކީ ބިދޭސީން/ޓޫރިސްޓުންނެވެ.
ކޮވިޑް-19 އަށް ޕޮޒިޓިވް ވެފައިވާ ހަތަރު ދިވެހިން ވެސް ތިބީ ވެލިދޫގަ އެވެ. ފަރުކޮޅުފުށި މަރާމާތުކުރުމަށް އެތަނުގައި ހުރި މެޝިންތައް ވަނީ ވެލިދު އަށް ގެންގޮސްފަ އެވެ. ނަމަވެސް އެ އެއްޗެހި އަނބުރާ ގެނެސް އެތަނުގައި ތިބި މީހުން ބަދަލުކުރާނެ ކަމަށް މަބްރޫކް ވިދާޅުވި އެވެ.
ފަރުކޮޅުފުށި ފެސިލިޓީ އަށް ވަންނަން އަދި ނުކުންނަން ވަކި ރޫޓެއް ހަމަޖައްސާފައި ވެ އެވެ. އެތަނުން އެތެރެއަށް ވަދެވޭނީ ސޭފްޓީ ސޫޓާއި އަންގި ލައްވައިގެންނެވެ. ނުކުމެގެން ދާއިރު، އަންގި އާއި މާސްކް އެއްޗެހި އުކާލައި ފެން ވެރޭނެ އިންތިޒާމުތައް ހަމަޖައްސާފައި ވެ އެވެ.