ސިއްހީ ކުއްލި ނުރައްކަލުގެ ހާލަތު އިއުލާންކޮށްފައި އޮތަސް، ގާނޫނު އަސާސީއަށް އިސްލާހެއް ގެންނަން ހުރަހެއް ނެތް ކަމަށް ބަންޑާރަ ނައިބު އިބްރާހިމް ރިފްއަތު މިއަދު ވިދާޅުވެއްޖެ އެވެ.
ކޮވިޑް-19 ކޮންޓްރޯލްކުރަން ފިޔަވަޅުތައް އެޅުމުގެ ގޮތުން ސިއްހީ ކުއްލި ނުރައްކަލުގެ ހާލަތު އިއުލާންކޮށްފައި ވަނިކޮށް ގާނޫނު އަސާސީ އަށް އިސްލާހު ގެނައުމާ މެދު ސުވާލު އުފެދުނީ ލޯކަލް ކައުންސިލް އިންތިޚާބު ފަސްކޮށް، މިހާރު ތިބި ކައުންސިލް މެމްބަރުންގެ ދައުރު ދެމިގެންދާ ގޮތަށް ސަރުކާރުން ގާނޫނުއަސާސީ އަށް އިސްލާހު ހުށަހެޅުމުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެކަމާ މެދު ސުވާލު އުފެއްދެމުންނެވެ.
އެކަމާ ގުޅިގެން މަޖިލީހުގެ މިއަދު ޖަލްސާގައި ނަޝީދު ވިދާޅުވީ ކުއްލި ނުރައްކަލުގެ ހާލަތު އިއުލާންކޮށްފައި ވަނިކޮށް ގާނޫނުއަސާސީ އިސްލާހު ނުކުރެވޭނެ ކަމަށް ގާނޫނުއަސާސީގައި ބުނެފައިވާ ކަމަށާއި އެހެންވެ، އެކަމާ މެދު ސުވާލު އުފެދޭ ކަމަށެވެ.
އެކަމަކު ގާނޫނުގައި އަސާސީގައި ބަޔާންކުރާ ކުއްލި ނުރައްކަލުގެ ހާލަތަކީ ރައީސް އިއުލާން ކުރައްވާ ހާލަތެކެވެ. އަދި ރާއްޖޭގައި މިވަގުތު އޮތީ އާންމު ސިއްހަތު ރައްކާތެރި ކުރުމުގެ ގާނޫނުގެ ދަށުން ހެލްތު މިނިސްޓަރު އިއުލާން ކުރެއްވި ސިއްހީ ކުއްލި ނުރައްކަލުގެ ހާލަތެކެވެ.
އެކަމާ ގުޅިގެން ބަންޑާރަ ނައިބު ރިފްއަތު ކުރެއްވި ޓްވީޓެއްގައި ވިދާޅުވީ ގާނޫނުއަސާސީގައި ބަޔާންކުރާ ކުއްލި ނުރައްކަލުގެ ހާލަތު ރައީސް އިއުލާން ކުރައްވާފައި ނުވާ ކަމަށާއި އެހެންވެ، ގާނޫނު އަސާސީ އިސްލާހުކުރަން ހުރަހެއް ނެތް ކަމަށެވެ. އަދި މިހާރު އޮތް ކައުންސިލްތަކުގެ ދައުރު އަންނަ ޖޫން މަހު ހަމަވާއިރު، އެ ކައުންސިލްތައް ދެމި އޮންނާނީ ގާނޫނު އަސާސީ އިސްލާހު ކޮށްގެން ކަމަށް ވެސް ރިފްއަތުގެ ޓްވީޓްގައިވެ އެވެ.
ގާނޫނު އަސާސީގެ ދަށުން ރައީސް އިއުލާން ކުރައްވާ ކުއްލި ނުރައްކަލުގެ ހާލަތަކީ ހަނގުރާމަވެރި ހާލަތެއް ނުވަތަ ބަލިމަޑުކަމެއްގެ ސަބަބުން ކުރިމަތިވެދާނެ ނުރައްކަލަކުން ސަލާމަތް ކުރުމަށްޓަކައި ރައީސް އިއުލާން ކުރައްވާ ހާލަތެކެވެ. އެ ހާލަތުގައި، ގާނޫނު އަސާސީން ލިބިދޭ ބައެއް އަސާސީ ހައްގުތަކާއި މިނިވަންކަން ހިިފެހެއްޓުމުގެ ބާރު ރައީސަށް ލިބިވަޑައިގަންނަވަ އެވެ. އަދި ވަކި މުއްދަތެއްގެ ތެރޭގައި އެކަން މަޖިލީހުން ފާސްކުރަން ވެސް ޖެހެ އެވެ.
އެކަމަކު ސިއްހީ ކުއްލި ނުރައްކަލުގެ ހާލަތުގެ ދަށުން އެއްވެސް އަސާސީ ހައްގެއް ހިފެހެއްޓުމުގެ ބާރެއް ނޯވެ އެވެ. އަދި އެކަން މަޖިލީހުން ފާސް ކުރާކަށް ވެސް ނުޖެހެ އެވެ. މިހާރު އިއުލާން ކޮށްފައިވާ ހާލަތު މިމަހު ނިމުމަކަށް އަންނާނެ އެވެ.
