ކްރިމިނަލް ކޯޓުގެ ގާޒީ ހަސަން ނަޖީބް މުސާރަ އާއި އިނާޔަތްތައް ނުލިބޭ ގޮތަށް ތިން މަހަށް ސަސްޕެންޑް ކުރަން ނިންމައި، އޭނާގެ މައްސަލައެއް ބަލަން ފުލުހުންނަށް ހުށަހަޅަން ޖުޑީޝަލް ސާވިސް ކޮމިޝަން (ޖޭއެސްސީ) އިން މިއަދު ނިންމައިފި އެވެ.
ޖޭއެސްސީން ނެރުނު ބަޔާނެއްގައިވަނީ ގާޒީ ނަޖީބް ފަނޑިޔާރުންގެ ގާނޫނާއި ފަނޑިޔާރުންގެ ސުުލޫކީ މިންގަނޑާ ޚިލާފްވި ކަމަށް ސާބިތުވާ ކަމަށް ނިންމައި، ސުލޫކީ ފިޔަވަޅެއްގެ ގޮތުން މުސާރަ އާއި އިނާޔަތްތައް ނުލިބޭ ގޮތަށް އޭނާ ތިން މަހަށް ސަސްޕެންޑް ކުރަން ނިންމީ އޭނާ އެ ކޮމިޝަނަށް ހުށަހަޅުއްވާފައިވާ މާލީ ބަޔާނުގައިި ދޮގު މައުލޫމާތު ދީފައިވާ ކަން ސާބިތުވުމުން ކަމަށެވެ.
މީގެ އިތުރުން ފަނޑިޔާރެއްގެ ގޮތުގައި ހުރެގެން ދައުލަތުގެ އިދާރާއަކަށް ދޮގު މައުލޫމާތު ދީފައިވާ މައްސަލަ ތަހުގީގު ކުރަން ފުލުހުންނަށް ހުށަހެޅުމަށް ވެސް އެ ކޮމިޝަންގެ މިއަދުގެ ބައްދަލުވުމުގައި ނިންމާފައިވާ ކަމަށް އެ ބަޔާނުގައިވެ އެވެ.
ކުރިން މެޖިސްޓްރޭޓް ކަން ވެސް ކުރެއްވި ގާޒީ ނަޖީބަކީ ކްރިމިނަލް ކޯޓުގައި ބައެއް ސިޔާސީ ބޭފުޅުންގެ މައްސަލަތައް ވެސް ބެއްލެވި ފަނޑިޔާރެކެވެ. އެގޮތުން ކުރީގެ ރައީސް މައުމޫން އަބްދުލްގައްޔޫމް 2018 ވަނަ އަހަރު ހައްޔަރުކޮށް، އެމަނިކުފާނުގެ ފޯނު ދޭން ފުލުހުން އެންގުމުން އެކަމަށް އިންކާރު ކުރެއްވި ކަމަށް ބުނެ ކުރި ދައުވާގެ މައްސަލަ ބެއްލެވީ އޭނާ އެވެ. އަދި އެ މައްސަލާގައި ކުރީގެ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދަށް ކުރި ދައުވާގެ މައްސަލަ ވެސް އޭނާ ބެއްލެވި އެވެ.
ގާޒީ ނަޖީބް ސަސްޕެންޑް ކުރަން ޖޭއެސްސީން ނިންމިއިރު، މީގެކުރިން ވެސް ބައެއް ފަނޑިޔާރުންގެ މައްޗަށް ސުލޫކީ މައްސަލަތައް ސާބިތުވާ ކަމަށް ނިންމައި އެ ބޭފުޅުން މަގާމުން ވަކިކުރަން ޖޭއެސްސީން ރައްޔިތުންގެ މަޖިލީހަށް ވެސް ފޮނުވި އެވެ.