ލޯކަލް ކައުންސިލް އިންތިޚާބަށް ކުރިމަތިިލާފައިވާ ފެނަކަ ކޯޕަރޭޝަންގެ މުވައްޒަފުންގެ ސަސްޕެންޝަން އުވާލައިފި އެވެ.
ލޯކަލް ކައުންސިލް އިންތިޚާބާއި އަންހެނުންގެ ތަރައްގީ އަށް މަސައްކަތްކުރާ ކޮމެޓީތަކުގެ އިންތިޚާބު މި މަހު ބާއްވަން ހަމަޖެއްސިޔަސް، ކޮވިޑް-19 އާ ގުޅިގެން އެ އިންތިޚާބު މުއްދަތެއް ނެތް ގޮތަށް މިހާރު ވަނީ ފަސްކޮށްފަ އެވެ.
ފެނަކަ ކޯޕަރޭޝަނުން މިއަދު ކުރި ޓްވީޓެއްގައި ބުނީ ކައުންސިލް އިންތިޚާބަށް ކުރިމަތިލުމުގެ ސަބަބުން އެ ކުންފުނީގެ އިންޓާނަލް ސަސްޕެންޝަން ތިބި މުވައްޒަފުންގެ ސަސްޕެންޝަން މިއަދުން ފެށިގެން އުވާލާފައިވާ ކަމަށެވެ.
ފެނަކަ ކޯޕަރޭޝަނުން އެގޮތަށް ނިންމިއިރު، ކައުންސިލް އިންތިޚާބަށް ކުރިމަތިލި ސިވިލް ސާވިސް މުވައްޒަފުން އަދިވެސް ތިބީ ސަސްޕެންޝަންގަ އެވެ. މުއްދަތެއް ނެތް ގޮތަށް އެ މުވައްޒަފުން ސަސްޕެންޝަންގައި ތިބެން ޖެހުމުން މުސާރަ އާއި އިނާޔަތްތައް ނުލިބޭތީ އެކަމުގެ ކަންބޮޑުވުން އިލެކްޝަންސް ކޮމިޝަނާއި ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމެޓީން ވެސް ވަނީ ފާޅުކޮށްފަ އެވެ.
ގާނޫނު އޮންނަ ގޮތުން ކައުންސިލް އިންތިޚާބަށް ކުރިމަތިލާ ސިވިލް ސާވިސް މުވައްޒަފުން އިންތިޚާބު ނިމެންދެން ތިބެން ޖެހޭނީ ސަސްޕެންޝަންގަ އެވެ. އެކަމަކު ކޮވިޑް-19 އާ ގުޅިގެން ކައުންސިލް އިންތިޚާބު ފަސްކުރަން ސަރުކާރުން ރައްޔިތުންގެ މަޖިލީހަށް މިހާރު ހުށަހަޅާފައިވާ ބިލް ފާސްވުމުން އެ މުވައްޒަފުންގެ ސަސްޕެންޝަން ނިމުމަކަށް އަންނާނެ އެވެ.