މާދަމާ މެންދުރު 12:00 އިން ފެށިގެން 72 ގަޑިއިރަށް ކުޅުދުއްފުށި ލޮކްޑައުން ކުރަން ނިންމައިފި އެވެ. މިއީ މާލެ، ހުޅުމާލެ، ވިލިމާލެ ފިޔަފައި އެހެން ރަށެއް ލޮކްޑައުންކުރާ ފުރަތަމަ ފަހަރެވެ. މާލެ ވަނީ މިދިޔަ ބުދަ ދުވަހުން ފެށިގެން އަންނަ މަހުގެ 1 އާ ހަމައަށް ލޮކްޑައުން ކޮށްފަ އެވެ.
ކުޅުދުއްފުށި ސިޓީ ކައުންސިލްގެ ރައީސް އަބްދުއްލަތީފް ހަސަން މިރޭ ވިދާޅުވީ، އެ ސިޓީ ލޮކްޑައުން ކުރަން ކުޅުދުއްފުށީގެ ކޮވިޑް ޓާސްކް ފޯހުން ނިންމީ، ހއ. އުލިގަމު މީހަކު ކޮވިޑް-19 އަށް އިއްޔެެ ޕޮޒިޓިވްވުމުން ކަމަށެވެ. މި މަހުގެ 15 ވަނަ ދުވަހު މާލެއިން އޭނާ ރަށަށް ދިޔައީ ހއ. އިހަވަންދޫ ބޯޓެއްގަ އެވެ. އެހެންވެ، އެ ބޯޓުން ދަތުރުކުރި މީހުން ތިބި ހަތް ރަށެއް މިހާރު ވަނީ މޮނިޓަރިންގެ ހާލަތަށް ގެނަސްފަ އެވެ.
އަބްދުއްލަތީފް ވިދާޅުވީ، ކުޅުދުއްފުށި ކުރިއަށް އޮތް ތިން ދުވަހު އެ ސިޓީ އަށް ފޭބޭނީ ވަރަށް މުހިންމު ބޭނުންތަކުގައި ކަމަށެވެ. ލޭ އަޅަންޖެހޭ ތެލަސީމިއާގެ މީހުންނާއި ޑަޔަލިސަސް ހަދަން ބޭނުން މީހުންނަށް، ލޮކްޑައުންގެ މުއްދަތުގައި ކުޅުދުއްފުއްޓައި އަރައި ފޭބޭނެ އެވެ. އަދިި ރަށްރަށަށް ކާޑު ފޯރުކުރުމުގެ މަސައްކަތް ވެސް ކުރިއަށް ގެންދާނެ ކަމަށާއި ނަމަވެސް ކުޅުދުއްފުއްޓަށް ދާ ދޯނިތަކުގައި ތިބޭ މީހުންނަށް، އެ ސިޓީ އަށް ނުފޭބޭނެ ކަމަށް ކައުންސިލްގެ ރައީސް ވިދާޅުވި އެވެ.
ކުޅުދުއްފުށީ ރީޖަނަލް ހޮސްޕިޓަލުގެ ގިނަ ހިދުމަތްތަކެއް ވެސް މި ވަގުތު ވަނީ މަޑުޖައްސާލާފައި ކަމަށް އަބްދުއްލަތީފް ވިދާޅުވި އެވެ.
މީގެ އިތުރުން ވިޔަފާރިތަކައި އެހެނިހެން ހިދުމަތްދޭ ތަންތަން ވެސް ލޮކްޑައުން މުއްދަތުގައި ހުންނާނީ ބަންދުކޮށްފައި ކަމަށް އޭނާ ވިދާޅުވި އެވެ.
ޒަރޫރީ ބޭނުމެއްގައި ގެއިން ބޭރަށް ދާން ޖެހޭ މީހުންނަށް ކައުންސިލުން ޚާއްސަ ފާހެއް ދޫކުރާނެ އެވެ. އަދި ފިހާރަތަކުން އޯޑަރުކުރާ ތަކެތި ޑެލިވަރީ ކުރުމުގެ ހުއްދަ ދޫކުރާނެ ކަަމަށް ކައުންސިލްގެ ރައީސް ވިދާޅުވި އެވެ. ވިދާޅުވި އެވެ. އެ ހުއްދަ ހޯދަން ކައުންސިލުން ކަނޑައަޅާ ނަންބަރަކަށް މެސެޖު ކުރުމުން ލިބޭނެ ކަމަށް އޭނާ ވިދާޅުވި އެވެ.
"އަޅުގަނޑުގެ އެދުމަކީ ހަމަ ހުރިހާ ރައްޔިތުން ވެސް ގެއިން ބޭރަށް ނުނިކުމެ، ގޭގައި މަޑުކޮށްލަން ލޮކްޑައުންކޮށްފައިވާ ވަގުތު،" އަބްދުލްލަތީފް ވިދާޅުވި އެވެ.
ފަރުވާއެއް ހޯދިފައި ނުވާ ކޮވިޑް-19 މާލެ ސަރަހައްދުން އެންމެ ފުރަތަމަ ފެނުނީ މިދިޔަ ބުދަ ދުވަހެވެ.