ކޮވިޑް-19 އަށް ޕޮޒިޓިވް ވި ބައެއްގެ ސެކަންޑަރީ ކޮންޓެކްޓުންނަށް ވުމުން ދެ މިނިސްޓަރަކު ވެސް އައިސޮލޭޓް ވެވަޑައިގެންފި އެވެ.
ނޭޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) ން މިއަދު މެންދުރު ބޭއްވި މީޑިއާ ބްރީފިންގައި ޓޫރިޒަމް މިނިސްޓަރު އަލީ ވަހީދު ވިދާޅުވީ، ކޮވިޑް-19 އަށް ޕޮޒިޓިވް ވެފައިވާ މީހުންނާ އެކި ގޮތްގޮތުން ކޮންޓެކްޓް ވެގެން ފަހަރަކު ބަޔަކު މަޑުކުރަން ޖެހޭ ހާލަތް މެދުވެރިވަމުންދާ ކަމަށާއި ބައެއް މިނިސްޓަރުން ވެސް މިވަގުތު އައިސޮލޭޝަންގައި އެބަތިބި ކަމަށެވެ. އެކަމަކު އެއީ ކޮންކޮން ބޭފުޅުންނެއް ކަމެއް އަލީ ވަހީދު ވިދާޅެއް ނުވެ އެވެ.
މާލެ އިން ކޮވިޑް-19 އަށް ޕޮޒިޓިވްވި މީހެއްގެ ސެކަންޑަރީ ކޮންޓެކްޓަކަށް ވުމުން، ހޯމް އައިސޮލޭޝަންގައި ހުންނެވި ކަމަށް ޔޫތު މިނިސްޓަރު އަހުމަދު މަހްލޫފް ކުރިން ވަނީ ވިދާޅުވެފަ އެވެ. އެނގިފައިވާ ގޮތުގައި އިކޮނޮމިކް މިނިސްޓަރު ފައްޔާޒް އިސްމާއީލް ވެސް ޕްރައިމަރީ ކޮންޓެކްޓެކްޓަކަށް ވުމުން މިހާރު ހުންނެވީ އައިސޮލޭޝަންގަ އެވެ. މަހްލޫފް އައިސޮލޭޝަނަށް ވަޑައިގެންނެވީ މާލެ އިން ފެނުނު ކޭސްތަކުގެ ތެރޭގައި އިހުސާން ފިހާރައިގެ މުވައްޒަފުން ހިމެނުނު އިރު، އެ ފިހާރައިގެ ޑެލިވަރީގައި، ވޮލަންޓިއަރެއްގެ ގޮތުގައި ބައިވެރިވެވަޑައިގެންފައި ވާތީ އެވެ.
އަލީ ވަހީދު ވިދާޅުވީ ކޮވިޑް-19 ފެތުރުން ކޮންޓްރޯލް ކުރުމަށ ކުރާ އެކިއެކި މަސައްކަތްތަކުގެ އިސް ސަފުގައި އެންމެން ވެސް އުޅެނީ ކޮންމެ ވަގުތެއްގައި ވެސް ކަރަންޓީނަށް ދާން ޖެހިދާނެ ކަމުގެ ބިރުވެރިކަމާ އެކު ކަމަށެވެ.
އޭނާ ވިދާޅުވި ގޮތުގައި ކ. ތުލުސްދޫ އަމިއްލަ ތަނެއްގައި މަސައްކަތް ކުރާ ބަންގްލަދޭޝްގެ ދެ މީހަކު ކޮވިޑް-19 އަށް ރޭ ޕޮޒިޓިވްވުމުން، ފެނަކަ ކޯޕަރޭޝަންގެ އިންޖިނިއަރަކު ވެސް ކަރަންޓީނަށް ދާން ޖެހުނެވެ. އެހެންވެ، މިހާރު މަސައްކަތް ކުރަމުން އަންނަނީ ފަހަރަކު މީހަކު "ޑްރޮޕްޑައުން ވަމުން އަނެކަކު ނުކުންނަމުން" ކަމަށް އޭނާ ވިދާޅުވި އެވެ.
"މިވަގުތު އެބަ ތިއްބެވި ބައެއް ވަޒީރުން ވެސް އަައިސޮލޭޝަންގައި އިނގޭތޯ ހަމަ ފަސްޓް ޑައިރެކްޓް ކޮންޓެކްޓާ ގުޅިގެން،" އޭނާ ވިދާޅުވި އެވެ.
މިފަދަ ގޮތަކަށް ހާލަތު އޮތުމުން މިހާރު މަސައްކަތްތައް ރާވާފައި ވަނީ އެންމެންގެ މަސައްކަތް ނުހުއްޓޭ ގޮތަކަށް ބަހާލައިގެން ކުރާ ގޮތަކަށް ކަމަށް އަލީ ވިދާޅުވި އެވެ.
"އެހެންވީމާ އަޅުގަނޑުމެން މިދަނީ ފަހަރަކު މީހަކު ޑްރޮޕްޑައުން ވަމުން، އަނެކަކު ނުކުންނަމުން މި ހާލަތުގައި،" އަލީ ވިދާޅުވި އެވެ..