ޕީޕީއެމްގެ ނައިބު ރައީސް ކަމުން އަބްދުއްރަހީމް އަބްދުﷲ މިއަދު ވަކިކޮށްފި އެވެ.
ސަރުކާރު ހިންގާ މައި ޕާޓީ، ޕީޕީއެމްގެ ކައުންސިލުން ފޮނަދޫ ދާއިރާގެ މެމްބަރު އަބްދުއްރަހީމް ވަކިކުރުމާ ގުޅިގެން އޭނާގެ ނައިބު ރައީސްގެ މަގާމު ވެސް ވަނީ ގެއްލިފަ އެވެ. އަބްދުއްރަހީމަކީ ޕީޕީއެމްގެ ކައުންސިލަށް މައުމޫން އައްުޔަން ކުރެއްވި ތިން ބޭފުޅުންގެ ތެރެއިން އެއް ބޭފުޅާ އެވެ.
އަބްދުއްރަހީމްގެ އިތުރުން ކައުންސިލް މެމްބަރުކަމުން ޒާހިދު ރަމީޒް އަދި ޕީޕީއެމްގެ ޒުވާނުންގެ ގޮފީގެ ރައީސް އިބްރާހިމް ޔޫސުފް ވެސް ވަނީ މިއަދު ވަކިކޮށްފަ އެވެ.
އެ ތިން ބޭފުޅުން ޕީޕީއެމްގެ ކައުންސިލުން ވަކިކުރިކަން އެންގެވީ ޕާޓީގެ ރައީސް މައުމޫން އަބްދުލް ގައްޔޫމް އެ ބޭފުޅުންނަށް ވަކިވަކިން ފޮނުއްވި ސިޓީފުޅެއްގަ އެވެ.
އަބްދުއްރަހީމަކީ ޕީޕީއެމްގެ ގައުމީ ޖަލްސާގައި، ޕާޓީގެ ނައިބު ރައީސް ކަމަށް ކުރިމަތިލައްވައި، ހޮވިވަޑައިނުގަތް ބޭފުޅެކެވެ. އެހެންވެ އޭނާ ވެފައި ވަނީ ކައުންސިލަށް މައުމޫން އައްޔަން ކުރެއްވި ތިން ބޭފުޅުންގެ ތެރެއިން އެކަކަށެވެ. ގައުމީ ޖަލްސާގައި ނައިބު ރައީސް ކަމަށް ހޮވުނު ދެ ބޭފުޅުންގެ ތެރެއިން ދަގެނތި ދާއިރާގެ މެމްބަރު އިލްހާމް އަހުމަދު ޕީޕީއެމުން ވަކިވުމުން އޭނާގެ ބަދަލުގައި ނައިބު ރައީސަކަށް އަބްދުއްރަހީމް އައްޔަން ކުރެއްވީ އެވެ. އެއީ މައުމޫންގެ ނިންމެވުމެކެވެ.
ރައީސް އަބްދުﷲ ޔާމީންގެ ފެކްޝަންގައި ހިމެނޭ އަބްދުއްރަހީމާއި ޒާހިދު އަދި އިބްރާހިމް ޔޫސުފް ޕީޕީއެމްގެ ކައުންސިލުން ވަކިކުރިއިރު، އަންނަ ޖެނުއަރީގައި ބާއްވާ ލޯކަލް ކައުންސިލްތަކުގެ އިންތިހާބަށް ޕީޕީއެމުން ތައްޔާރުވުމުގެ ކަންތައްތައް އަބްދުއްރަހީމްގެ ބެލުމުގެ ދަށުން ކުރިއަށް ގެންދިއުމަށް ރައީސް ޔާމީންގެ ފެކްޝަނުން ވަނީ ނިންމައިފަ އެވެ.
ޕާޓީގެ ކައުންސިލުން އަބްދުއްރަހީމް ވަކިކުރި ސަބަބުތަކުގެ ތެރޭގައި، ޕީޕީއެމްގެ އަސާސީ ގަވައިދާ ހިލާފަށް އަދި ޕާޓީގެ ފިކުރާ ވެސް ހިލާފަށް މަސައްކަތް ކުރުން ހިމެނެ އެވެ. އެގޮތުން ޕީޕީއެމްގެ ނައިބު ރައީސްގެ ޒިންމާ އަކީ ޕާޓީގެ ރައީސަށް އެހީތެރިވެދިނުން ކަމަށް އަސާސީ ގަވައިދުގައި އޮތަސް، މައުމޫނަށް އެނގިވަޑައިގަތުމެއް ނެތި އެކިއެކި ޕެޓިޝަންތަކުގައި ކައުންސިލް މެމްބަރުން ލައްވައި އަބްދުއްރަހީމް ސޮއިކުރުވަމުން ގެންދަވާ ކަމަށް މައުމޫން ވިދާޅުވެ އެވެ. މީގެ އިތުރުން މައުމޫނާ ބެހޭ ގޮތުން ހަގީގަތާ ހިލާފު ވާހަކަތައް މީޑިއާގައި އަބްދުއްރަހީމް ދެއްކެވުމަކީ ވެސް ޕީޕީއެމްގެ ކައުންސިލުން އޭނާ ވަކިކުރި ސަބަބެއް ކަމަށްވެ އެވެ.
ޕީޕީއެމްގެ ޒުވާނުންގެ ގޮފީގެ ރައީސްކަމުން އިބްރާހިމް ޔޫސުފް ވަކިކުރި ސަބަބުތަކުގެ ތެރޭގައި، ޕާޓީގެ އަސާސީ ގަވައިދުގައި ބަޔާންކުރާ އުމުރަށް ވުރެ އޭނާގެ އުމުރު މަތިވުން ހިމެނެ އެވެ. ގަވައިދުގައިވާ ގޮތުން ނަމަ، ޕީޕީއެމްގެ ޒުވާނުންގެ ގޮފީގެ މެމްބަރުންގެ ގޮތުގައި ތިބޭނީ އުމުރުން 31 އަހަރު ނުފުރޭ މީހުންނެވެ. އެކަމަކު އިބްރާހިމް ޔޫސުފަށް މިހާރު ވަނީ 31 އަހަރު ފުރިފައި ކަމަށް ޕީޕީއެމުން ބުނެ އެވެ.
ޕީޕީއެމްގެ ކައުންސިލަށް މައުމޫން އައްޔަން ކުރެއްވި ތިން ބޭފުޅުންގެ ތެރެއިން ޒާހިދު އެ މަގާމުން ވަކިކުރި އެއް ސަބަބަކީ ވެސް މައުމޫން ފެކްޝަނުން ބުނާ ގޮތުގައި ޕާޓީގެ އަސާސީ ގަވައިދާއި ފިކުރާ ހިލާފަށް މަސައްކަތް ކުރުމެވެ. އެގޮތުން ސޯޝަލް މީޑިއާގައި ޒާހިދު ވަރަށް ބޭއަދަބީކޮށް އަދި ދަށުދަރަޖައިގެ ބަސްތައް ބޭނުން ކުރަމުން ދިއުމަކީ ވެސް އޭނާއާ މެދު ފިޔަވަޅު އެޅި ސަބަބެކެވެ. އެ ޝަކުވާ ކެނޑިނޭޅި މައުމޫނަށް ލިބިވަޑައިގަންނަވަމުން ގެންދާ ކަމަށް އެމަނިކުފާނުގެ ފެކްޝަންގެ އިސްބޭފުޅުން ވިދާޅުވެ އެވެ.
ޕީޕީއެމްގެ ކައުންސިލުން އަބްދުއްރަހީމާއި ޒާހިދު އަދި އިބްރާހިމް ޔޫސުފް ވަކިކުރިިއިރު، ރައީސް ޔާމީނާއި މައުމޫނާ ދެބޭފުޅުންގެ ސިޔާސީ ހިޔާލު ތަފާތުވުންތައް އިތުރުވެ، ބަހުގެ ހަމަލަތައް އަދި އެކި ކަންކަމުގައި ވަރުގަދަ ފިޔަވަޅުތަކެއް ދެ ފެކްޝަނުން ވެސް ވަނީ އަޅަން ފަށައިފަ އެވެ.