ކޮވިޑް-19 ފެތުރުން ކޮންޓްރޯލް ކުރުމަށް އަޅާފައިވާ ރައްކާތެރިކަމުގެ ފިޔަވަޅުތައް ތަންފީޒުކުރަން ރައްޔިތުން މިހާރަށް ވުރެ ފުރިހަމަ އެއްބާރުލުމެއް ދެއްވަން ރައީސް އިބްްރާހިމް މުހައްމަދު ސޯލިހު މިއަދު އެދިވަޑައިގެންފި އެވެ.
ކޮވިޑް-19 ފެތުރުމުގެ ހާލަތު އޮތް ގޮތާއި އެ ބަލި ފެތުރުން ކޮންޓްރޯލް ކުރަން ސަރުކާރުން ކުރަމުން އަންނަ މަސަައްކަތްތަކާ ބެހޭ ގޮތުން ގައުމާ މުޚާތަބު ކުރައްވައި މިއަދު ހަވީރު ރައީސް ދެއްވި ހިތާބުގައި ވިދާޅުވީ ދަތިތައް ކުރިމަަތި ވިޔަސް މި ފިޔަވަޅުތައް އަޅައިގެން ނޫނީ އެ ބަލި ކޮންޓްރޯލްކުރެވެން ނެތްކަން އެންމެން ވެސް ގަބޫލުކުރާނެ ކަމަށެވެ. ރައްޔިތުން އެއްބާރުލުން ދެއްވުން އެދިވަޑައިގަންނަވާ މައިގަނޑު ދެ ކަމެއް އެމަނިކުފާނު ވިދާޅުވި އެވެ.
ރައީސް އެދިވަޑައިގެންނެވި އެއް ކަމަކީ ކޮންމެހެން ނުކުންނަން ޖެހިގެން ނުކުންނަ ހާލަތުގައި ވެސް އިޖުތިމާއީ ގައިދުރުކަމަށް އިސްކަން ދިނުމެވެ. ދެވަނަ ކަމެއްގެ ގޮތުގައި އެމަނިކުފާނު ވިދޅުވީ ކޮވިޑަށް ޝައްކުކުރެވޭ އަލާމާތެއް ފެނިއްޖެ ނަމަ ކަމާ ބެހޭ ފަރާތްތަކަށް އެެކަން ލަސްނުކޮށް އެންގުމެވެ.
"މި ފިޔަވަޅުތަކުގެ ސަބަބުން ކިތަންމެ ގިނަ ދަތިތަކެއް ކުރިމަތި ވިޔަސް، މި ފިޔަވަޅުތައް އަޅައިގެން ނޫނީ މި ބަލި ކޮންޓްރޯލް ކުރެވެން ނެތްކަން އެންމެން ވެސް ގަބޫލުކުރާނެ. އެހެންވީމާ، މިކަމުގައި ތިޔަ ލޮބުވެތި ރައްޔިތުން މިހާތަނަށް ވެސް ދެއްވަމުން އައި އެއްބާރުލެއްވުން، އެއަށް ވުރެވެސް ފުރިހަމައަށް ދެއްވުމަށް އަޅުގަނޑު ގޮވާލަން،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި ކުރިއަށް އޮތް ދެ ހަފްތާ އަކީ މާލޭގައި މިހާރު އޮތް ކޮވިޑް-19 ފެތުރުމުގެ ހާލަތު އިތުރަށް ގޯސްވާނެ ކަމަށް ސިއްހީ މާހިރުން ލަފާކުރައްވާ ދެހަފްތާ އެވެ. އެހެންވެ މި ދެހަފްތާފައި އިތުރު ސަމާލުކަންް ދީ ފަރުވާތެރިކަމާ އެކު މަސައްކަތް ކުރަން ޖެހޭ ދެ ހަފްތާ ކަމަށް އެމަނިކުފާނު ވިދާޅުވި އެވެ. މި ދެހަފްތާ ތެރޭގައި ފަރުވާތެެރިކަމާ އެކު މަސައްކަތް ކުރެވިއްޖެ ނަމަ މިހާލަތުން އަރައިގަނެވިދާނެ ކަމުގެ އުއްމީދު ވަަރަށްް ބޮޑު ކަމަށް ވެސް އެމަނިކުފާނު ވިދާޅުވި އެވެ.
"މި ބައްޔަށް އިތުރު މީހުން މިވަގުތު ޕޮޒިޓިވް ވިޔަސް، މި ބަލި ފެތުރުން ހުއްޓުވުމަށް މި ކުރާ މަސައްކަތް، އިރާދަކުރެއްވީތީ ކޮންޓްރޯލުން ނެއްޓިގެނެއް ނުދޭ. އަޅުގަނޑުމެންގެ ސިއްހީ ހިދުމަތްތެރިންގެ އުންމީދެއް ވެސް ނުގެއްލޭ،" ރައީސް ވިދާޅުވި އެވެ.
ރައީސްގެ ޚިތާބު ނިންމަވައިލެއްވީ ބަލި ފެތުރުން ކޮންޓްރޯލް ކުރުމަށް ކުރާ މަސައްކަތުގައި ކާމިޔާބީ އަށް އެދިވަޑައިގެން އަދި ރައްޔިތުންނަށް ކެތްތެރިކަން މިންވަރު ކުރެއްވުން އެދި ދުއާ ކުރައްވަމުންނެވެ.