ފިޓްޖެހިގެން އައިޖީއެމްޗަށް ގެންދިޔަ ބަންގްލަދޭޝް މީހަކު ކޮވިޑް-19 އަށް ޕޮޒިޓިވްވެފައިވާ ކަމަށް ހެލްތު ޕްރޮޓަކްޝަން އެޖެންސީ (އެޗްޕީއޭ) އިން ރޭ ބުނެފި އެވެ.
އައިޖީއެމްއެޗްގައި ފަރުވާ ދެމުންދާ އެ މީހާގެ ހާލު ސީރިއަސް ކަމަށްވެ އެވެ. އެޗްޕީއޭން ބުނީ އޭނާގެ ހާލު ސީރިއަސްވީ ފިޓް ޖެހުމަށް ފަހުގައި ކަމަށެވެ. އިތުރު ތަފްސީލެއް ނުދެ އެވެ.
A Bangladeshi national transferred to IGMH after a tonic-clonic seizure is in critical condition.
— Health Protection Agency (@HPA_MV) May 4, 2020
The patient has also tested positive for #COVID19
ރާއްޖެ އިން މިހާތަނަށް ކޮވިޑް-19 އަށް ޕޮޒިޓިވްވި 527 މީހުންގެ ތެރޭގައި އެންމެ ގިނައީ ވެސް ބަންގްލަދޭޝްގެ މީހުންނެވެ. އެ ގައުމުގެ 268 މީހަކު ވަނީ އެ ބައްޔަށް ޕޮޒިޓިވްވެފަ އެވެ. ކޮވިޑް-19 އަށް މިހާތަަނަށް ޕޮޒިޓިވްވި ދިވެހިންގެ އަދަދަކީ 183 އެވެ.
ކުރިން އެޗްޕީއޭން ބުނިގޮތުގައި ކޮވިޑް-19 އަށް ހާއްސަކޮށްފައިވާ އައިޖީއެމްއެޗުގެ ޑީއެޗް-11 ފެސިލިޓީގައި ފަރުވާދެމުން އަންނަނީ ފަސް މީހަކަށެވެ. އެއީ އުމުރުން 88 އަހަރުގެ ދިވެހި ފިރިހެނެއްގެ އިތުރުން 49 އަހަރުގެ ފިރިހެނަކާއި 58 އަހަރުގެ އަންހެނަކާއި 80 އަހަރުގެ ފިރިހެނެއް އަދި 70 އަހަރުގެ ފިރިހެނެކެވެ. އޭގެ ތެރެއިން 88 އަހަރުގެ މީހާ އޮތީ ވެންޓިލޭޓަރުގަ އެވެ.
މީގެ ކުރިން ވަނީ ކޮވިޑް-19 އަށް ޕޮޒިޓިވް ދުވަސްވީ މީހަކު މަރުވެފަ އެވެ. އޭނާ އެ ބައްޔަށް ޕޮޒިޓިވްވިކަން އެނގުނީ މަރުވި ފަހުންނެވެ.
