އައިޖީއެމްއެޗުގެ އައިސީޔޫން ބަޔަކު ކޮވިޑް-19 އަށް ޕޮޒިޓިވްވުމާ ގުޅިގެން އެ ހޮސްޕިޓަލުގެ ޑޮކްޓަރުންނަށް ދެއްކުން އަނެއްކާ ވެސް ވަރަށް ބޮޑަށް ލިމިޓްކޮށްފި އެވެ.
ރާއްޖޭގެ ކޮވިޑް-19 ގެ ހާލަތު ރަނގަޅުވުމާ ގުޅިގެން، ސަރުކާރުގެ މައި ހޮސްޕިޓަލްގައި ޑޮކްޓަރުންނަށް ދެއްކުން މިދިޔަ ހަފުތާގެ ފަހުކޮޅުން ފެށިގެން ވަރަށް ބޮޑަށް ލުއިކޮށްފައި އޮތް ނަމަވެސް ކޮވިޑް-19 ގެ ދެވަނަ މަރުހަލާގެ ދުވަސްތަކާ އެއްގޮތަށް އަލުން ބަދަލުކުރީ އެ ހޮސްޕިޓަލުގެ އައިސީޔޫން ބަޔަކު އެ ބައްޔަށް ޕޮޒިޓިވްވުމުންނެވެ.
މިހާރު ޚިދުމަތް ދޭނެ އުސޫލުތައް:
- އޯޕީޑީގެ ޚިދުމަތް ދޭނީ ހުކުރު ދުވަސްތައް ފިޔަވައި ކޮންމެ ދުވަހެއްގެ ހެނދުނު 9 ން މެންދުރު 1 އަށް. އެކަމަކު، އޮންލައިން ކޮންސަލްޓޭޝަން މިހާރެކޭ އެއްގޮތަށް ކުރިއަށް ގެންދާނެ.
- އޯޕީޑީ އަށް އެޕޮއިންޓުމަންޓު ލިބޭނީ އެ މީހަކު ދައްކަންޖެހޭ ޑިޕާޓްމަންޓުގެ ޚާއްސަ ޑޮކްޓަރަށް އެކަނި.
- ވޯޑުތަކުގައި ތިބޭ މީހުންނަށް ޒިޔާރަތް ކުރުން މަނާވާނެ. "ވިޒިޓިން އަވާސް" މިހާރު ނޯންނާނެ.
- ވޯޑުތަކުގައި ތިބޭ މީހުން ކައިރީގައި މަޑުކުރެވޭނީ އެންމެ އެހީތެރިއަކަށް.
- ބަލިވެގެން ޑޮކްޓަރަށް ދައްކަން ނޫން ގޮތަކަށް ކުޑަކުދިން ހޮސްޕިޓަލަށް ނުގެންދެވޭނެ.
- ހޮސްޕިޓަލަށް ވަންނަ މީހުން ހުމާއި ރޯގާ ފަދަ ކޮވިޑް-19 ގެ އަލާމާތްތަކަށް ސްކްރީން ކުރާނެ.
- ދުރާލާ ރޭވިގެން ކުރިއަށް ގެންދާ ރޫޓިން އޮޕަރޭޝަންތައް މެދުކަނޑާލައިފި.
އައިޖީއެމްއެޗުގައި ކޮވިޑް-19 ފެތުރުނުކަން އެނގުނީ، އެ ހޮސްޕިޓަލްގެ އައިސީޔޫގައި ކެންސަރު ބައްޔަށް ފަރުވާދެމުން ދިޔަ އިންޑޮނޭޝިއާގެ ފިރިހެނަކު ކޮވިޑް-19 އަށް ޕޮޒިޓިވްވުމާ އެކު، އެހެން ބައެއް މީހުންގެ ޓެސްޓުތައް ހެދުމުންނެވެ. އުމުރުން 39 އަހަރުގެ އެ މީހާ އެ ބައްޔަށް ޕޮޒިޓިވްވިކަން އެނގުނީ މިދިޔަ ބުރާސްފަތި ދުވަހު އޭނާ މަރުވި ފަހުންނެވެ. ކެންސަރު ބަލީގައި ދެވަނަ ސާޖަރީއެއް ހަދަން އެ މީހާ ކޮވިޑް-19 އަށް ޓެސްޓު ކުރި ނަމަވެސް ނަތީޖާ ލިބުމުގެ ކުރިން އޭނާ މަރުވީ އެވެ.
އެ މީހާ ކޮވިޑް-19 އަށް ޕޮޒިޓިވްކަން އެނގުމާ އެކު ހެދި ޓެސްޓު ތަކުން އައިޖީއެމްއެޗުގެ އައިސީޔޫގައި މަސައްކަތްކުރާ ދެ ނަރުހަކާއި ބަލި ދެ މީހަކު އެ ބައްޔަށް ޕޮޒިޓިވްކަން ވަނީ އެނގިފަ އެވެ.