ކޮވިޑް-19 ފެތުރޭތީ ކެފޭ/ރެސްޓޯރެންޓްތައް ބަންދުކުރުމަށް ފަހު އަލުން ހުޅުވުމުގެ ހުއްދަ ދޭން ނިންމިއިރު ދުންފަތުގެ އިސްތިއުމާލު ކުރުން މަނާކުރި ނަމަވެސް އެ އުސޫލު މިހާރު ބަދަލުކޮށް ހުއްދަ ދީފައިވާ ކަމަށް، ހެލްތް ޕްރޮޓެެކްޝަން އެޖެންސީ (އެޗްޕީއޭ) އިން މިއަދު ބުނެފި އެވެ.
ކާބޯތަކެތީގެ ހިދުމަތްދޭ ތަންތަނުން "ނިއު ނޯމަލް" ގައި އަމަލުކުރަން ޖެހޭ އުސޫލު އެޗްޕީއޭ އިން މިދިޔަ މަހުގެ 20 ގައި އާންމުކުރިއިރު އެ އުސޫލުގައި ބުނެފައިވަނީ ކާބޯތަކެތީގެ ހިދުމަތްދޭ ތަންތަނުގައި ޝީޝާ އާއި ވޭޕާއި އީ-ސިނގިރެޓު ވެސް ހިމެނޭ ގޮތަށް، ދުންފަތުގެ އިސްތިއުމާލުކުރުން "ނިއު ނޯމަލް"ގެ ދުވަސްވަރު މަނާ ކަމަށެވެ.
ނަމަވެސް އެ އުސޫލު އިސްލާހުކޮށް މިދިޔަ މަހުގެ 27 ގައި އާންމުކުރި އުސޫލުގައި ބުނެފައިވަނީ ކާބޯތަކެތީގެ ވިޔަފާރިކުރާ ތަންތަނުގައި ދުންފަތުގެ އިސްތިއުމާލު ކުރާއިރު، އެހެން މީހުންނަށް ދުން ނުފޯރާވަރުގެ ދުރުމިނެއްގައި ތިބެން ޖެހޭނެ ކަމަށެވެ. އެހެންވެ ދުންފަތުގެ އިސްތިއުމާލުކުރުމުގެ ހުއްދަ އެޗްޕީއޭ އިން ކުރިން ދީފައިވާ ތަންތަނުގައިި އެކަން ކުރުމަކީ މަނާކަމެއް ނޫނެވެ. ނަމަވެސް އަދިވެސް ޝީޝާ ބުއިން ވަނީ މަނާކޮށްފަ އެވެ.
އެކަމާ ގުޅޭގޮތުން "މިހާރު"ން ސުވާލު ކުރުމުން ކޮވިޑް-19 އާ ދެކޮޅު މަސައްކަތުގެ ތަރުޖަމާނު، އެޗްޕީއޭގެ ސީނިއާ މެޑިކަލް އޮފިސަރު ޑރ. ނަޒްލާ ރަފީގު ވިދާޅުވީ އުސޫލު ބަދަލުކުރީ ކަމާ ބެހޭ ފަރާތްތަކާ މަޝްވަރާކުރުމަށް ފަހުގައި ކަމަށެވެ.
"ވަރަށް ގިނަ ކަމާބެހޭ ފަރާތްތަކާ ވާހަކަ ދައްކައި މަޝްވަރާ ކުރުމަށް ފަހު ހުއްދަ ދޭން ނިންމީ،" ސިއްހަތައް ގެއްލުން ހުރި ކަމެއް ކުރަން ހުއްދަ ދިނީ ކީއްވެގެންތޯ ސުވާލު ކުރުމުން ނަޒްލާ ވިދާޅުވި އެވެ.
ނަޒްލާ ވިދާޅުވީ ދުންފަތުގެ އިސްތިއުމާލުކުރާ މީހުންނަށް ކޮވިޑް-19 ޖެހުމުން ކުރާ އަސަރު ބޮޑު ކަމަށާއި އެހެންވެ އެކަމުން ދުރުހެލިވުމަށް އިލްތިމާސް ކުރާ ކަމަށެވެ.
ކެފޭ/ރެސްޓޯރެންޓތަކުގައި ދުންފަތުގެ އިސްތިއުމާލުކުރުން މަނާކުރަން އެޗްޕީއޭ އިން ފުރަތަމަ ނިންމުމުން ގިނަ ބަޔަކު އެކަމަށް ތާއީދުކުރި އެވެ.
މާލެ ސަރަހައްދުގެ ކެފޭ އަދި ރެސްޓޯރެންޓްތައް ހުޅުވުމުގެ ހުއްދަ މި މަހު 1 އިން ފެށިގެން ދީފައިވާއިރު އެތަންތަނުގައި ދުންފަތުގެ އިސްތިއުމާލު ކުރުން ވަރަށް އާންމެވެ. ހާއްސަކޮށް ގިނަ ބަޔަކު އެއްވެ ތިބެ ދުންފަތުގެ އިސްތިއުމާލު ކޮށް އުޅެ އެވެ.
