މާލޭގެ އެކި ސަރަަހައްދުތަކުގައި ސްމޯކިން ކިއޮސްކް ގާއިމުކުރުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އާ އެކު މާލޭ ސިޓީ ކައުންސިލުން މިއަދު މަޝްވަރާކޮށްފި އެވެ.
މާލޭ ސިޓީ ކައުންސިލުން ސޯޝަލް މީޑިއާގައި ކުރި ޕޯސްޓެއްގައި ބުނީ މާލޭގެ ޑެޕިއުޓީ މޭޔަރު މީކާއިލް މުހައްމަދާއި ސިޓީ ކައުންސިލުގެ ހެލްތު ކޮމެޓީގެ މެމްބަރުން ވަނީ މާލޭގެ އެކި ސަރަހައްދުތަކުގައި ސްމޯކިން ކިއޮސްކް ގާއިމުކުރުމާ ގުޅޭގޮތުން އެޗްޕީއޭއާ އެކު މަޝްވަރާކޮށްފައި ކަމަށެވެ.
ސިޓީ ކައުންސިލުން ބުނީ އެކަމަކީ އާންމު ތަންތަނުގައި ދުންފަތުގެ އިސްތިއުމާލުކުރާ މިންވަރު މަދުކުރުމަށާއި، މާލެއަކީ ސާފުތާހިރު ދުޅަހެޔޮ މާހައުލަކަށް ހެދުމަށް ކުރާ މަސައްކަތުގެ ދަށުން ކުރާ ކަމެއް ކަމަށެވެ.
ނަމަވެސް އެޗްޕީއޭއާ އެކު ބޭއްވި މަޝްވަރާގައި ނިންމީ ކޮން ގޮތަކަށް އެކަން ކުރުމަށް ކަމެއް ސާފެއް ނޫނެވެ.
އާންމު ތަންތަނުގައި މީހުންނަށް އުނދަގޫވާ ގޮތަށް ދުންފަތުގެ އިސްތިއުމާލުކުރާ މީހުން ހުއްޓުވުމުގެ މަސައްކަތް ކަމާގުޅޭ އިދާރާތަކާ ގުޅިގެން ފެށުމަށް ހުޅުމާލޭ އުތުރު ދާއިރާގެ މެމްބަރު ފާތުމަތު ޒަހިއްޔާ (ޒާޔާ) ވަނީ މިދިޔަ އޮގަސްޓް މަހު ކައުންސިލަށް ހުށަހަޅައިފަ އެެވެ.
އޭނާ ހުށަހެޅުއްވީ އާންމު ތަންތަނުގައި ރައްޔިތުންނަށް އުނދަގޫވާ ގޮތަށް ދުންފަތުގެ އިސްތިއުމާލުކުރާ މީހުންނާ މެދު ގާނޫނީ ހަމަތަކުގެ މަތިން ފިޔަވަޅު އެޅުމުގެ މަސައްކަތް ކުރިއަށް ގެންދިއުމަށް ފުލުހުންނަށް އެންގުމަށެވެ.
އެ މައްސަލަ ހުށަހަޅުއްވަމުން އޭނާ ވިދާޅުވީ މާލޭގައި އާންމުން އެއްވާ އެކި ތަންތަން، ހާއްސަކޮށް ޕާކުތަކަށް ކުޑަކުދިން ގޮވައިގެން ހިތްފަސޭހަކޮށްލުމަށް އެ ކުދިންގެ މައިންބަފައިން ގޮސް އުޅޭއިރު، ކައިރީގައި ތިބޭ މީހުންގެ ފަރާތުން ދުންފަތުގެ އިސްތިއުމާލުކުރުމުގެ އުނދަގޫ ކުރިމަތިވަމުންދާ ކަމުގެ ޝަކުވާ ލިބޭ ކަމަށެވެ.
އެކަމަކީ ގިނަ ބައެއްގެ ކަންބޮޑުވުން އޮތް އަދި ސިއްހީ ގޮތުން ކުޑަކުދިންނަށް ނޭދެވޭ އަސަރުކުރާނެ ކަމަކަށްވާތީ އެކަމުގައި ފިޔަވަޅު އެޅުމަށް އެދިވަޑައިގެންފައިވެ އެވެ.
ދުންފަތާ ދެކޮޅަށް ގިނަ މަސައްކަތްތަކެއް ކުރަމުން އަންނައިރު، ދުންފަތް ކޮންޓްރޯލްކުރުމާ ބެހޭ ގާނޫނަށް ގެނައި އިސްލާހުގެ ދަށުން ވޭޕް އެތެރެކުރުމާއި އެ ބޭނުންކުރުން ނޮވެމްބަރު 2024 އިން ފެށިގެން ވަނީ މަނާކޮށްފަ އެވެ. ރާއްޖޭގައި ދުންފަތް ގަނެ ވިއްކޭނެ އެންމެ ދަށް އުމުރަކީ 21 އަހަރު ކަމުގައި ވެސް ވަނީ ކަނޑައަޅައިފަ އެވެ.
އެ ގާނޫނާ ހިލާފަށް ވޭޕްކުރަން ބޭނުންކުރާ އާލާތްތަކާއި އެކަމަށް ތައްޔާރު ކޮށްފައިވާ އުފެއްދުންތައް ރާއްޖެ އެތެރެކޮށްފި ނަމަ 50،000ރ. އަދި އެތެރެކުރާ ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕަކަށް 10،000ރ.ގެ މަގުން ޖޫރިމަނާ ކުރާނެ އެވެ.