ކޮވިޑް-19 ފެތުރޭތީ އަޅާ ރައްކާތެރިކަމުގެ ފިޔަވަޅެއްގެ ގޮތުން ބަންދުކޮށްފައިވާ ގެސްޓް ހައުސްތައް ހުޅުވާނެ ތާރީހެއް ކަނޑައެޅޭނީ އަންނަ އޮގަސްޓްމަހުގެ 15 ވަނަ ދުވަހު ރާއްޖޭގެ ހާލަތު އަލުން ރިވައިސް ކުރުމަށް ފަހުގައި ކަމަށް ހެލްތު މިނިސްޓަރު އަބްދުﷲ އަމީން މިރޭ ވިދާޅުވެއްޖެ އެވެ.
ތިން ރަށެއްގެ ކޮވިޑް މެނޭޖްމެންޓް ފެސިލިޓީ ހުޅުވަން މިރޭ ވާޗުއަލްކޮށް ބޭއްވި ރަސްމިއްޔާތެއްގައި އަމީން ވިދާޅުވީ ސަރުކާރުގެ ވިސްނުން ހުރީ ގެސްޓްހައުސްތައް އޮގަސްޓްމަހު ނުހުޅުވާ ގޮތަަށް ކަމަށާއި ހުޅުވޭނެ ކަމަށް ލަފާ ކުރެވެނީ ސެޕްޓެމްބަރު މަހުގެ ކުރީކޮޅުގައި ކަމަށެވެ. އޭނާ ވިދާޅުވީ އަތޮޅުތެރޭގައި ސިއްހީ ފަރުވާގެ އިންތިޒާމްތައް ހަމަޖެހުނަސް މިހާލަތުގައި އިތުރަށް ސަމާލުކަން ދޭން ޖެހޭ ކަންތައްތައް އެބަހުރި ކަމަށެވެ.
"އޮގަސްޓްމަހުގައި ރާއްްޖޭގެ އެކި ކަންކޮޅުތަކުގެ ގެސްޓްހައުސްތަައް އަދި ނުހުޅުވާ ގޮތަށް އަޅުގަނޑުމެންގެ ވިސްނުން މިހިރީ. އޮގަސްޓްމަހުގެ 15 ގައި އަޅުގަނޑުމެން އިރާދަކުރެއްވިއްޔާ އަލުން ރިވިއުކޮށްފައި، ގެސްޓްހަުއުސްތައް ހުޅުވޭނީ ކޮން ހިސާބެއްގައިކަން އަޅުގަނޑުމެން އިއުލާނުކުރާނަން،" އަމީން ވިދާޅުވި އެވެ.
އަމީން ވިދާޅުވިގޮތުގައި އިތުރަށް ސަމާލުވާން ޖެހުނީ ޑޮކްޓަރުންނާއި ނަރުހުންނާއި އެހެން ސިއްހީ ހިދުމަތްތެރިން ވެސް ބައްޔަށް ޕޮޒިޓިވް ވަމުންދާތީ އެވެ. އެހެންވެ ސިއްހީ ފަރުވާ ދިނުމުގައި ވެސް މިހާރަށް ވުރެ ބޮޑަށް ސަމާލުވާން އޭނާ އެދިވަޑައިގެންނެވި އެވެ. ސިއްހީ ހިދުމަތްތެެެރިން ކޮވިޑަށް ޕޮޒިޓިވްވެ ފަރުވާ ދިނުމުގެ މަސައްކަތް ނުކުރެވޭ ގޮތް ވުމަކީ އޭނާ ވިދާޅުވި ގޮތުގައި ގޮންޖެހުމަކަށް ވާނެ އެވެ. އެކަންތައްތަކާ ގުޅިގެން އަަޅަން ޖެހޭ ފިޔަވަޅުތައް ސަރުކާރުން އަޅަމުން އަންނަ ކަމަށް ވެސް ވިދާޅުވި އެވެ.
"އެނގިވަޑައިގަންނަވާނެ، ފާއިތުވި ދުވަސްތަކުގައި ސަރުކާރުން، ކޮވިޑާ ގުޅިގެން ކުރަން ޖެހޭ އެއްވެސް ކަމެއް ފަހަތަށް ޖައްސައިފައެއް ނުވާނެ. އެހެންވީމާ ކުރިއަަށް އޮތް ތަނުގައި ވެސްް އެގޮތުގައި އަޅުގަނޑުމެން މަސައްކަތް ކުރާނަން،" އަމީން ވިދާޅުވި އެވެ.
ކޮވިޑް ކޮންޓްރޯލްކުރަން އެޅި ގިނަ ފިޔަަވަޅުތަކެއް މިހާރު އުވާލާފައި ވިޔަސް އަދިވެސް ގިނަ ފިޔަވަޅުތަކެއް ސަރުކާރުން އަންނަނީ ދަމަހައްޓަމުންނެވެ. އަމީން ވިދާޅުވީ އެކަމަކު ސަރުކާރުން މަސައްކަތް ކުރާނީ ވިޔަފާރި އާއި އާއްމު ދިރިއުޅުމަށް ވެސް ފަސޭހަވާނެ ގޮތަކަށް ކަންތައްތައް ތަރުތީބު ކުރަން ކަމަށެވެ.
ވާޗުއަލްކޮށް މިރޭ ބޭއްވި ރަސްމިއްޔާތުގައި ހުޅުވީ ހއ. އިހަވަންދޫ، އައްޑޫ ހިތަދޫ އަދި ފުވައްމުލަކުގައި ގާއިމްކޮށްފައިވާ ކޮވިޑްމެނޭޖްމަންޓް ފެސިލިޓީތަކެވެ. އެ ރަސްމިއްޔާތުގައި ފޮރިން މިނިސްޓަރު އަބްދުﷲ ޝާހިދު، ޑިރެކްޓާ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު، ޓެގް ގެ ލީޑަރު ޑރ. އަލީ ލަތީފް އަދި ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު ބައިވެރިވެވަޑައިގެންނެވި އެވެ.