ސަރުކާރުގެ ބޯހިޔާވަހިކަމުގެ ޕްރޮގްރާމްގެ ދަށުން އައްޑޫގައި އިމާރާތް ކުރާ ފްލެޓްތަކުގެ ތެރެއިން ބައެއް ފްލެޓްތަކަށް ކުރިމަތިލުމުގެ ފުރުސަތު ހުޅުވާލައި، ފްލެޓްތަކަށް އެދޭ ފޯމް ދޫކުރަން މިއަދު ފަށައިފި އެވެ.
ހައުސިން މިނިސްޓްރީން ބުނީ ހިތަދު އާއި ހުޅުމީދޫގައި އިމާރާތްކުރާ ފްލެޓްތަކަށް އެދޭ ފޯމް، ފޭދު އާއި ހުޅުމީދޫގައި ހުންނަ ހައުސިން މިނިސްޓްރީގެ ލޭންޑް، ބިލްޑިން އެންޑް މުނިސިޕަލް ސާވިސް ޔުނިޓްތަކުން މިހާރު ލިބެން ހުންނާށެވެ. އަދި މިނިސްޓްރީގެ ވެބް ސައިޓުން ވެސް ފޯމް ޑައުންލޯޑް ކުރެވޭނެ އެވެ.
ފޯމް ހުށަހަޅަން ޖެހެނީ އަންނަ މަހުގެ 10ގަ އެވެ.
ހައުސިން މިނިސްޓްރީން ބުނިގޮތުގައި ހިތަދޫގައި އަޅާ 264 ފްލެޓްގެ ތެރެއިން 230 ހާއްސަކޮށްފައި ވަނީ އައްޑޫގެ ގުޅިފައިވާ މަރަދޫ، މަރަދޫފޭދޫ އަދި ފެދޫ ރައްޔިތުންނަށެވެ.
ހުޅުމީދޫގައި އަޅާ 48 ފްލެޓްގެ ތެރެއިން މި ފަހަރު ދޫކުރަން ނިންމާފައި ވަނީ 38 ފްލެޓެވެ.
ހިތަދު އާއި ހުޅުމީދޫގައި އަޅާ ފްލެޓްތަކުގެ މަސައްކަތުގެ ބޮޑު މައި މިހާރު ވަނީ ނިމުމަކާ ހަމައަށް ގޮސްފަ އެވެ. ހައުސިން މިނިސްޓްރީން ބުނީ ފްލެޓްތަކުގެ މަސައްކަތް އަންނަ އޮގަސްޓްގައި ނިންމާލައި، އެ ތަންތަނަށް ހޮވޭ މީހުންނާ ސެޕްޓެމްބަރު މަހުގެ ތެރޭގައި ތަޅުދަނޑި ހަވާލު ކުރެވޭނެ ކަމަށެވެ.
ފްލެޓްތަކަށް ޑައުންޕޭމަންޓްގެ ގޮތުގައި 25،000ރ. ދައްކަން ޖެހެ އެވެ. އަދި އެއްކޮށް އަގު ދައްކައި ހަލާސް ކުރަން 25 އަހަރުގެ ދުވަހުގެ މުއްދަތެއް ލިބޭނެ އެވެ. މަހަކު ދައްކަން ޖެހެނީ 3،000ރ. އެވެ.