މާލޭގައި ރޭ ހިނގި އަލިފާނުގެ ބޮޑު ހާދިސާގައި، ސްޓޭޓް ބޭންކް އޮފް އިންޑިއާ (އެސްބީއައި) އިން ނަގާފައިވާ ފްލޯތަކަށް ގެއްލުން ވެފައިވާ ކަމަށާއި އެކަމަކު، މާދަމާ ވެސް ކަސްޓަމަރުންނަށް ޚިދުމަތް ދޭން ފަށަން މަސައްކަތް ކުރާ ކަމަށް އެ ބޭންކުން މިއަދު ބުނެފި އެވެ.
އެސްބީއައިގެ ފަސް ފްލޯއެއް ހިންގަމުން އަންނަ ގަދަގޭ މުހައްމަދުފުޅު ބިލްޑިންގްގެ 10 ވަނަ ބުރީގައި ހަދާފައިވާ ޕެންޓް ހައުސްގައި ވަރަށް ބޮޑަށް ރޯވެ، އަނދާފައިވާއިރު، އެ އިމާރާތުގެ އެހެން ފްލޯތަކުގެ ތެރެއަށް ވެސް އަލިފާންގަނޑު ވަދެ ވަނީ ގެއްލުންތަކެއް ވެފަ އެވެ.
ބޮޑުތަކުރުފާނު މަގުން އާޓިފިޝާލް ބީޗް ކަރީގައި ހުންނަ 10 ބުރީގެ އެ އިމާރާތުގެ ޕެންޓު ހައުސް އާއި އެހެން ފްލޯތަކުގެ ތެރެއަށް އަލިފާންގަނޑު ވަނީ، ޖެހިގެން ހުރި ޓިއޮލޯ ކެފޭގައި ރޯވެގެންނެވެ. ގަދަގޭ މުހައްމަދުފުޅު ބިލްޑިންގަށް އަލިފާން ފޯރީ، އެ އިމާރާތުގެ ބޭރުގައި ޖަހާފައި ހުރި ކްލެޑިންގައި، ކެފޭގައި ރޯވި އަލިފާން ހިފުމުން ކަމަށް މަންޒަރު ދުށް މީހުން ބުނެ އެވެ.
އެސްބީއައި އިން ބުނީ މި އަލިފާނުގެ ހާދިސާގައި އެ ބޭންކުގެ އެކި ފްލޯތަކަށް އެކި ވަރުގެ ގެއްލުން ވެފައިވާ ކަމަށެވެ. ގަދަގޭ މުހައްމަދުފުޅު ބިލްޑިންގްގައި އެސްބީއައިގެ ކަސްޓަމަރުންނާ ގުޅޭ އޮފީސްތައް ހިންގަނީ އެންމެ ތިރީ ބުރި އާއި ދެވަނަ ބުރި އަދި ތިންވަނަ ބުރީގަ އެވެ.
އެސްބީއައި އިން ބުނީ އަލިފާނުގެ ހާދިސާގައި، އެ ބޭންކުގެ ބައިތަކަށް ލިބުނު ގެއްލުންތައް މިހާރު އަންނަނީ ބަލަމުން ކަމަށެވެ. އަދި ކަމާ ބެހޭ ފަރާތްތަކާ ގުޅިގެން މާދަމާ އެ އޮފީހުން ހިދުމަތް ދިނުމަށް މަސައްކަތް ކުރަމުން އަންނަ ކަމަށް އެސްބީއައި އިން ބުންޏެވެ.
މިކަމާ ގުޅިގެން ކަސްޓަމަރުންނަށް ދިމާވެދާނެ ދަތިތަކަށް އެ ބޭންކުން ވަނީ މާފަށް އެދިފަ އެވެ.
މި އަލިފާނުގެ ހާދިސާގައި ޓިއޮލޯ ކެފޭގައި ރޯވުމާ އެކު، ގަދަގޭ މުހައްމަދުފުޅު ބިލްޑިންގާއި ކައިރީގައި ހުރި އެހެން އިމާރާތްތަކުން މީހުން ހުސްކުރި އެވެ. ގަދަގޭ މުހައްމަދުފުޅު ބިލްޑިންގްގެ ޕެންޓް ހައުސް ފިޔަވައި ދެން މީހުން ދިރިއުޅޭ ތަނެއް ނުހުރެ އެވެ. ޕެންޓް ހައުސްގައި ދިރިއުޅެނީ އެ އިމާރާތުގެ ވެރިފަރާތުގެ އާއިލާގެ މީހުން ކަމަށް ވިޔަސް އެ މީހުން މިވަގުތު ރާއްޖޭގައި ނެތުމުން އެ ތަން ވެސް ހުރީ ތަޅުލައިފަ އެވެ. އެ އިމާރާތް ހުރީ އިންޝުއާ ވެސް ކޮށްފަ އެވެ.
މި ހާދިސާގައި ޓިއޮލޯ ކެފޭ ވަނީ އެއްކޮށް އަނދައި ހުލިވެފަ އެވެ.
