ގދ. ތިނަދޫން ކޮވިޑް-19 އަށް މީހަކު ޕޮޒިޓިވް ވެފައި ވާތީ އޭނާއާ ކޮންޓެކްޓް ޓްރޭސިން ހަދައި އެ ރަށު 41 މީހަކު ކަރަންޓީންކޮށްފި އެވެ.
ތިނަދޫ އާއި މާލެއާ ދެމެދު ދަތުރުކުރާ "ދެރަހަ" ބޯޓުގައި މަސައްކަތްކުރާ 68 އަހަރުގެ ތިނަދޫ ފިރިހެނަކު ކޮވިޑަށް އިއްޔެ ޕޮޒިޓިވްވުމުން، އެ ރަށަށް އަރައިފޭބުން މަނާކޮށް އެ ރަށް މޮނިޓަރިންގެ ހާލަތަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ވަނީ ގެނެސްފަ އެވެ.
ތިނަދޫގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލުގެ ސީނިއާ ކަސްޓަމާ ރިލޭޝަން އޮފިސަރު ސާލިމް އަލީ "މިހާރު" އަށް ވިދާޅުވީ ކަރަންޓީނުކޮށްފައިވަނީ ޕޮޒިޓިވްވި މީހާއާ ޑައިރެކްޓް ކޮންޓެކްޓްވެފައިވާ 41 މީހަކު ކަމަށެވެ. އެ މީހާ ދަތުރުކުރި ބޯޓު ތިނަދޫގެ އިތުރުން އެހެން ރަށްރަށަށް ވެސް ދިޔަ އެވެ. ކޮންޓެކްޓް ޓްރޭސިންގެ މަސައްކަތް އަދިވެސް ކުރިއަށް ދާ ކަމަށް ސާލިމް ވިދާޅުވި އެވެ.
ތިނަދޫ އަދިވެސް އޮތީ މޮނިޓަރިންގެ ހާލަތުގަ އެވެ. މިކަމާ ގުޅިގެން ރައްޔިތުންނަށް އުނދަގޫ ވިޔަސް ކެތްތެރިވުމަށް އޭނާ އެދިވަޑައިގަތެވެ.
"ސިއްހީ އެހީތެރިން ދެއްވާ އިރުޝާދުތަކަށް ފުރިހަމަ އެއްބާރުލުން ދެއްވަން އިލްތިމާސްކުރަން،" ސާލިމް ވިދާޅުވި އެވެ.
ޕޮޒިޓިވްވި މީހާ މާލެ އަށް އައިސް ބޯޓުން ފައިބައި މާލޭގައި އުޅުމަށް ފަހު ތިނަދު އަށް ދިޔައީ މިދިޔަ ހޯމަ ދުވަހު އެވެ. އެޗްޕީއޭ އިން ކަނޑައަޅާވައިވާ އުސޫލުގެ ދަށުން އޭނާ ހޯމް ކަރަންޓީންގައި މަޑުކުރަން ޖެހުނަސް އެ މީހާ ކަރަންޓީނެއް ނުވެ އެވެ. އަދި އާންމުންގެ ތެރެއަށް ނުކުމެ މިސްކިތަށް ގޮސް ވެސް އުޅެފައިވެ އެވެ. ތިނަދޫގެ އިތުރުން ހދ. ކުޅުދުއްފުށި ވެސް އިއްޔެ މޮނިޓަރިންގެ ހާލަތަށް ގެނަ އެވެ. ދެ ރަށުން ވެސް ކޮވިޑަށް ޕޮޒިޓިވްވެފައި ވަނީ އެ ބަލީގެ އެއްވެސް އަލާމާތެއް ނެތް ބައެކެވެ.
ކޮވިޑުން ރައްކާތެރިވުމަށް އެޅި ފިޔަވަޅުތައް ލުއި ދޭން ފެށުމުން މި ބަލި ފެތުރޭ ވަރު މިހާރު ވަނީ އިތުރުވެފަ އެވެ. ރާއްޖޭން މިހާތަނަށް 7،578 މީހަކު ކޮވިޑަށް ޕޮޒިޓިވްވެފައި ވާއިރު، 28 މީހަކު ވަނީ މަރުވެފަ އެވެ.