ކޮވިޑް-19 އަށް ޕޮޒިޓިވް ވެފައިވާ ބަޔަކު ހދ. ކުޅުދުއްފުއްޓާއި ގދ. ތިނަދޫން ފެނުމުން އެ ދެ ރަށަށް އަރައިފޭބުން އެޗްޕީއޭ އިން މިއަދު މަނާކޮށްފި އެވެ.
އެ އިދާރާގެ އާންމު އިއުލާނެއްގައި ބުނީ، ވަކި ގޮތެއް އަންގަންދެން ކުޅުދުއްފުއްޓާއި ތިނަދޫ އޮންނާނީ މޮނިޓަރިންގެ ހާލަތުގައި ކަމަށެވެ. އެ ދެ ރަށަށް ދެން އަރައިފޭބޭނީ އެޗްޕީއޭގެ ހުއްދަ ލިބިގެން ކަމަށް ވާއިރު، އެ ފިޔަވަޅު އެޅީ ކޮވިޑަށް ޕޮޒިޓިވްވި ބަޔަކު ފެނުމުން، ކޮންޓެކްޓް ޓްރޭސިން ހެދުމަށެވެ.
ގދ. އަތޮޅުގެ ކޮވިޑް ފޯކަލް ޕޮއިންޓު ޝަހުޒާ ހުސެއިން "މިހާރު" އަށް ވިދާޅުވީ، ތިނަދޫން ކޮވިޑަށް ޕޮޒިޓިވްވީ އުމުރުން 68 އަހަރުގެ ފިރިހެނަކު ކަމަށެވެ. ތިނަދު އަށް އުފަން އެ މީހާއަކީ "ދެރަހަ" ނަމަކަށް ކިޔާ މުދާ އުފުލާ ބޯޓެއްގައި މަސައްކަތްކުރާ މީހެއް ކަމަށާއި އެންމެ ފަހުން އޭނާ މާލެ އައުމަށް ފަހު ރަށަށް ދިޔައީ މިދިޔަ ހޯމަ ދުވަހު ކަމަށް ޝަހުޒާ ވިދާޅުވި އެވެ.
"އޭނާ މާލެ ފޭބި ކަމެއް އޭނާއެއް ނުބުނޭ. އެހެންވެ އަޅުގަނޑުމެންނަކަށް ވެސް ނޭނގޭ އެ ކަމެއް،" ޝަހުޒާ ވިދާޅުވި އެވެ.
އެ މީހާ، މާލެ އަށް ފައިބާފައިވާއިރު، އަނބުރާ ރަށަށް ގޮސް އެ ވާހަކަ ކަމާ ބެހޭ އިދާރަތަކަށް ނާންގާ ކަމަށް ވެ އެވެ.
އެ ފިރިހެން މީހާ ކޮވިޑަށް ޕޮޒިޓިވްވި ކަން އެނގުނީ، ޑޮކްޓަރަށް ދައްކައި ހެދި ޓެސްޓުންނެވެ.
"ކޮވިޑްގެ އެއްވެސް އަލާމާތެއް ހުރި މީހެއް ވެސް ނޫން. އެކަމަކު ވޭތުވެ ދިޔަ 14 ދުވަހުގެ ތެރޭގައި މާލެ ގޮސްފައި ވުމުން އުސޫލާ އެއްގޮތަށް ކޮވިޑަށް ޓެސްޓުކުރީ،" ޝަހުޒާ ވިދާޅުވި އެވެ.
އޭނާ ވިދާޅުވިގޮތުގައި، މިދިޔަ ފަސް ދުވަހުގައި ހުރިހާ ވަގުތެއްގައި އެ މީހާ މިސްކިތައް ނަމާދަށް ދިޔަ ކަމަށް އެނގިފައި ވެ އެވެ. އިއްޔެ ހުކުރު ނަމާދަށް ދިޔަ ކަމަށް ވެސް ޝަހުޒާ ވިދާޅުވި އެވެ.
"އެ ބޯޓު މި އަތޮޅުގެ އެހެން ރަށްރަށަށް ވެސް ދަތުރުކޮށްފައިވޭ. އެކަމަކު އޭނާ [ބޯޓުގައި] ދިޔަ ކަމެއް އަދި ނޭނގޭ. އެކަން ކަށަވަރު ކުރަން މި އުޅެނީ. މި ކޭސްއާ ގުޅޭ ކްލަސްޓާ ވަރަށް ބޮޑުވުން އެކަށީގެންވޭ،" ޝަހުޒާ ވިދާޅުުވި އެވެ.
ކުޅުދުއްފުށިން ވެސް ކޮވިޑަށް ޕޮޒިޓިވްވެފައި ވަނީ އެ ބަލީގެ އެއްވެސް އަލާމާތެއް ހުރި މީހެއް ނޫނެވެ.
"މިހާރު" އަށް އެނގިފައިވާ ގޮތުގައި ކުޅުދުއްފުށިން ޕޮޒިޓިވީ، އުމުރުން ހަތް އަހަރުގެ ފިރިހެން ކުއްޖެކެވެ.
ކުޅުދުއްފުށި ރީޖަނަލް ހޮސްޕިޓަލްގައި އެޑްމިޓް ކޮށްގެން ފަރުވާ ދެމުން އައި އެ ކުއްޖާ ކޮވިޑަށް ޕޮޒިޓިވްވި ކަން އެނގުނީ، އިތުރު ފަރުވާ އަށް މާލެ ގެނެސް، އައިޖީއެމްއެޗްގައި އެޑްމިޓް ކުރުމުގެ ކުރިން ހެދި ޓެސްޓުންނެވެ. އިއްޔެ މާލެ އައި އެ ކުއްޖާގެ ޓެސްޓުގެ ނަތީޖާ ލިބުނީ މިއަދެވެ.
އެ ކުއްޖާއާ ކޮންޓެކްޓްވި މީހުން ހޯދުމުގެ ކަންތައް ކުޅުދުއްފުށީ ރީޖަނަލް ހޮސްޕިޓަލުން މިހާރު ވަނީ ފަށައިފަ އެވެ.
ކޮވިޑް-19 އަށް ޕޮޒިޓިވްވާ މީހުންގެ އަދަދު އަންނަނީ އިތުރުވަމުންނެވެ. ރަށްރަށަށް ދަތުރުކުރުމުގައި ގެނައި ލުއިތަކާއި އެކު، މި ބަލި ވަނީ ގިނަ ރަށްރަށަށް ވެސް ފެތުރިފަ އެވެ. މާލޭގެ އިތުރުން 32 ރަށެއްގައި ކޮވިޑްގެ އެކްޓިވް ކޭސްތައް މިވަގުތު ހުރި އިރު، އޭގެ ތެރޭގައި 15 ރިސޯޓު ހިމެނެ އެވެ. މިހާތަނަށް 7،469 މީހުން ވަނީ ކޮވިޑް-19 އަށް ޕޮޒިޓިވްވެފަ އެވެ.