ރޭ ރާއްޖޭގެ އެކި ސަރަހައްދުތަކަށް އާދަޔާހިލާފަށް ވައިގަދަވެ، ބައެއް ރަށްތަކަށް ބޮޑެތި ގެއްލުންތަކެއް ވެއްޖެ އެވެ.
ހުޅަނގު މޫސުމުގެ މި ވިއްސާރައިގައި ވައި ގަދަވާނެ ކަމަށް ލަފާކޮށް، މޫސުމާ ބެހޭ އިދާރާއިން ރޭ ވަނީ އުތުރާއި މެދު ރާއްޖެ ތެރޭގެ އަތޮޅުތަކަށް އޮރެންޖު އެލާޓް ވެސް ނެރެފަ އެވެ. ވިލާގަނޑުގައި އެންމެ ބޮޑަށް ވައިޖެހި، ގެއްލުން ލިބިފައިވަނީ ވެސް މި އަތޮޅުތަކުގެ ރަށްތަކަށެވެ.
ރޭ ދަންވަރު 1:30 ހާއިރު އައި ކޮޅިގަނޑުގައި ރ. ދުވާފަރު ސިއްހީ މަރުކަޒާއި މެޖިސްޓްރޭޓް ކޯޓަށް ވަނީ ބޮޑެތި ގެއްލުންތަކެއް ވެފަ އެވެ. އެ ރަށު ސިއްހީ މަރުކަޒުގެ ފުރާޅުން ބައެއް އެއްލާލި އިރު ކޯޓުގެ ކުޑަދޮރުތައް ވަނީ އެއްކޮށް ވެއްޓިފަ އެވެ. އަދި އެ ތަނުގެ ސީލިންގު ވެސް ވެއްޓި، އިމާރާތުގެ ތެރެއަށް ފެން ވަދެފައިވެ އެވެ.
"ވަރަށް ގަދައަށް އެ ވަގުތު ވައިޖެހުނީ. ރަށުގެ ގިނަ މީހުން ތިބީ ނުނިދާ. ސިއްހީ މަރުކަޒުގެ ފުރާޅު އެއްލާލުމުން، އެތަނުގައި ހުރި އެއްޗެހި އެހެން ތަންތަނަށް ބަދަލު ކުރުމުގައި ވެސް ދަންވަރުގެ އެ ވަގުތުގައި ގިނަ ބަޔަކު މަސައްކަތްކުރި،" ދުވާފަރު މީހަކު ބުންޏެވެ.
ދުވާފަރުގެ އިތުރުން އެ އަތޮޅު އުނގޫފާރުގެ ސްކޫލާއި ބައެއް ގެތަކުގެ ވެސް ފުރާޅު އެއްލާލައި، މަގުމަތީގައި ހުރި ގަސްތަކެއް ވަނީ ވެއްޓިފަ އެވެ. އަދި ނ. ކެނދިކުޅުދޫގެ މެޖިސްޓްރޭޓް ކޯޓަށް ވެސް ބޮޑެތި ގެއްލުންތަކެއް ވެފައި ވެ އެވެ.
އެނގިފައިވާ ގޮތުން ހދ. ކުޅުދުއްފުއްޓާއި އެ އަތޮޅުގެ އެހެން ރަށްތަކުގައި ވެސް އާއްމުންގެ ގެތަކަށް ވަނީ ގެއްލުންތައް ވެފަ އެވެ. އެގޮތުން ބައެއް ގެތަކުގެ ފުރާޅާއި ފާރު ވެއްޓިފައިވާއިރު، ގޯއްޗާއި މަގުމަތީގައި ހުރި ބައެއް ގަސްތައް، ގެތަކުގެ މައްޗަށް ވެއްޓި ގެއްލުން ވެފައިވެ އެވެ.
ރާއްޖޭގައި ވަރަށް މަދުން ނޫނީ ނުނެރޭ އޮރެންޖު އެލާޓް ނެރުނީ، ރޭ ދަންވަރު 2:00 އިން ހެނދުނު 6:00 އަށް މޫސުން ގޯސްވާނެ ކަމަށް ލަފާކޮށެވެ. އާއްމު ގޮތެއްގައި، 34-40 މޭލާ ދެމެދު އަދި ވިލާގަނޑުގައި ގަޑިއަކު 63 މޭލަށް ވައިގަދަވާނެ ކަމަށް އެލާޓުގައި ބުނެފައި ވެ އެވެ.
މެޓު އޮފީހުން ބުނި ގޮތުގައި ރޭ އެންމެ ގަދައަށް ވައިޖެހުނީ ބ. ދަރަވަންދުއަށެވެ. އެގޮތުން އެ ރަށަށް 47 މޭލަށް ވައި ޖެހުނު އިރު، ވިލާގަނޑުގައި 62 މޭލަށް ވައި ޖެހުނު ކަމަށް އެތަނުން ބުންޏެވެ. ރޭ އެންމެ ބޯކޮށް ވާރޭ ވެހުނީ ހުވަދު އަތޮޅަށެވެ. އެގޮތުން އެ އަތޮޅު ކާޑެއްދު އާއި ކޫއްޑޫއަށް 83-86.3 މިލިމީޓަރަށް ވާރޭވެހިފައި ވެ އެވެ.
"މިއީ ހަމަ ކޮންމެ އަހަރެއްގެ ވެސް ހުޅަނގު މޫސުމުގައި ކުރާ ވިއްސާރަ. ރާއްޖޭގެ އުތުރާއި ދެކުނުގައި ވެސް ދެ ސާކިއުލޭޝަނެއް އުޅޭތީ ދެ ސަރަހައްދަށް ވެސް މޫސުން ގޯސް ވާނެ،" މެޓުގެ އޮފިޝަލަކު ވިދާޅުވި އެވެ.
އޭނާ ވިދާޅުވި ގޮތުގައި މާދަމާ މެންދުރު ފަހުން ފެށިގެން ވައިމަޑުވާނެ އެވެ. ކުރިއަށް ދުވަސްތަކުގައި ރާއްޖޭގެ އެކި ހިސާބުތަކަށް ކެރީގެ އަސަރު ކުރި ނަމަވެސް މޫސުން މާ ގޯސް ނުވާނެ ކަމަށް އެތަނުން ބުންޏެވެ.
މިހާރު ތ. އަތޮޅުން ފެށިގެން އުތުރަށް ޔެލޯ އެލާޓް ނެރެފައިވާއިރު ދެން ހުރި އަތޮޅުތަކަށް، މެޓުން ވަނީ ވައިޓް އެލާޓް ނެރެފަ އެވެ.
