ކޮވިޑް-19 ގެ ބަލި މީހުންނަށް ފަރުވާ ދިނުމަށް އިތުރު 11 ވެންޓިލޭޓަރު ގެނެސް، ނާޑު ކުންފުންޏާ ހަވާލުކުރި 20 ވެންޓިލޭޓަރު މިއަދު ހަމަކޮށްފި އެވެ.
އެ ކުންފުނީގެ އޮފިޝަލަކު ވިދާޅުވީ ވެންޓިލޭޓަރާއި އެސޯސިއޭޓެޑް އެކްސެސަރީޒް ގެނައީ ގަތަރު އެއާވޭސްގެ ބޯޓަކުން ކަމަށެވެ. އެ ހުރިހާ އެއްޗެއް އެއްޗެއް ވެސް ގެނެސްފައިވަނީ ޖަރުމަނުވިލާތުން ސީދާ އެ ތަކެތި އުފައްދާ މެނުފެކްޗަރުގެ އަތުން ކަމަށާއި އެ އެއްޗެހި އިންސްޓޯލްކޮށް ޓްރެއިނިން ދިނުމަށް ތައްޔާރުވަމުން އަންނަ ކަމަށް އޭނާ ވިދާޅުވި އެވެ.
ނާޑް ޕްރައިވެޓް ލިމިޓެޑާ 24 ވެންޓިލޭޓަރު ހޯދަން ހަވާލުކުރީ ދެ އެއްބަސްވުމަކުންނެވެ. މާޗް 8 ގައި ފުރަތަމަ އެއްބަސްވީ 14 ދުވަހުގެ ތެރޭގައި ހަތަރު ވެންޓިލޭޓަރު ގެންނާށެވެ. އެ ތަކެތި ހަވާލުކުރުމުން، 20 ވެންޓިލޭޓަރު ގެންނަން ހަވާލުކުރީ މާޗް 19، ގަ އެވެ. ފަހުން މި ގެނައީ އެ އެއްބަސްވުމުގެ ދަށުން ގެންނަންޖެހޭ ވެންޓިލޭޓަރުތަކެވެ.
ހަތް މިލިއަން ރުފިޔާގެ އެއްބަސްވުމުގައި ސޮއިކުރީ ދެ ހަފުތާ ތެރޭގައި ވެންޓިލޭޓަރުތައް ގެންނާށެވެ. ނަމަވެސް ދުނިޔޭގެ މާކެޓުގައި ވެންޓިލޭޓަރު ހޯދަން ހުރި ދަތިތަކާއި އެ ތަކެތި ރާއްޖެ އާ ހަމައަށް ގެނައުމުގައި ހުރި ދަތިތަކާ ހެދި އެ މުއްދަތުގައި ވެންޓިލޭޓަރު ނުގެނެވުމުން މުއްދަތު އިތުރުކުރި އެވެ.
ނާޑަކީ ޖަޕާނާއި ސައުތު ކޮރެއާ އާއި ޗައިނާގެ އިތުރުން ޔޫރަޕުގެ މެޑިކަލް އިކުއިޕްމަންޓް އެންޑް ކޮންޒިއުމަބަލްސް އުފައްދާ ޑަބްލިއުއެޗްއޯ އަދި މުޅި ދުނިޔޭގެ އިތުބާރު ހޯދާފައިވާ ގިނަ ކުންފުނިތަކެއްގެ ރާއްޖޭގެ ސޯލް ޑިސްޓްރިބިއުޓަރެވެ.
މި މަހުގެ 10 ވަނަ ދުވަހު ނާޑުން ވަނީ 9 އައިސީޔޫ ވެންޓިލޭޓަރު ވެސް ގެނެސްފަ އެވެ. ވެންޓިލޭޓަރު ގެންނަން ސަރުކާރުން އެ ކުންފުންޏަށް އެއްވެސް ފައިސާއެއް އެޑްވާންސަށް ދީފައެއް ނުވެ އެވެ.
އެޑްވާންސަށް ފައިސާ ދޫކުރީ ވެންޓިލޭޓަރު ގެންނަން ހަވާލުކުރި ތިން ކުންފުނީގެ ތެރެއިން ދުބާއީގެ އެގްޒެކިއުޓާސް ޖެނެރަލް ޓްރޭޑިން އަށް އެކަންޏެވެ. އެ ކުންފުންޏާ އެކު އެއްބަސްވީ 34 މިލިއަން ރުފިޔާ އަށް 75 ވެންޓިލޭޓަރު ހޯދާށެވެ. އެޑްވާންސް ފައިސާގެ ގޮތުގައި، އެއްބަސްވުމުގެ އަގުގެ 90 ޕަސެންޓަށްވާ 30 މިލިއަން ރުފިޔާ ވަނީ ދީފަ އެވެ. އެކަމަކު އެ ފައިސާ ދޫކުރީ މާލިއްޔަތު ގަވާއިދާ ޚިލާފަށެވެ.