ދ. އަތޮޅު ހޮސްޕިޓަލްގައި ރޭ މަރުވި އުމުރުން 60 އަހަރުގެ މީހާ އަކީ އެ އަތޮޅު ކަނޑިންމަ މޯލްޑިވްސްގެ މުވައްޒަފެއް ކަަމަށާއި އޭނާ ކޮވިޑް-19 އަށް ޕޮޒިޓިވް ވެފައި ވާތީ ރިސޯޓުން އިތުރު ސާމްޕަލްތައް ނަގަމުން އަންނަ ކަމަށް ހެލްތު އިމަޖެންސީ އޮޕަރޭޝަން ސެންޓަރުން މިރޭ ބުނެފި އެވެ.
އެޗްއީއޯސީން މިރޭ ބޭއްވި މީޑިއާ ބްރީފިންގައި އެ ސެންޓަރުގެ ތަރުޖަމާން ޑރ.ނަޒްލާ ރަފީގް ވިދާޅުވީ އިއްޔެ ހަވީރު ކުޑަހުވަދުއަށް ގެންދިޔަ މީހާގެ ސާމްޕަލް ނެގީ އޭނާގެ ގައިން ކޮވިޑްގެ އަލާމާތްތައް ފެނިފައިވާތީ ކަމަށެވެ. އޭނާގެ ސާމްޕަލް މާލެ ގެނެސް ޓެސްޓްްކޮށް ނަތީޖާ ލިބުނީ މިއަދު ކަމަށް އޭނާ ވިދާޅުވި އެވެ.
ނަޒްލާ ވިދާޅުވި ގޮތުގައި އެ ސާމްޕަލް ކޮވިޑަށް ޕޮޒިޓިވް ވެފައި ވާތީ ރިސޯޓުން އިތުރު ސާމްޕަލްތައް ނަގައިގެން ވަނީ މާލެ ގެނެސްފަ އެވެ. އެ މަސައްކަތް ކުރީ ދ. އަތޮޅު ހޮސްޕިޓަލާއި އެޗްއީއޯސީ ގުޅިގެންނެވެ.
"އޭގެ އިތުރުން މާދަމާ ހެނދުނު ވެސް ދ. އަތޮޅު ހޮސްޕިޓަލްގެ ޓީމެއް ކަނޑިންމަ ރިސޯޓަށް ދާނެ. އެދާ ދިއުމުގައި އެ ރަށުގައި ތިބި ބަލިމީހުން އެސެސްކުރުމާއި، އަލާމާތްތައް ހުރި މީހުން އެސެސްކުރުމާއި އަދި އިތުރު މީހުންގެ ސާމްޕަލްތައް ވެސް ނެގުމުގެ ކަންތައްތައް ހަމަ ކުރިއަށް ދާނެ،" ނަޒްލާ ވިދާޅުވި އެވެ.
ކަނޑިންމައިން އިއްޔެ ހަވީރު ކުޑަހުވަދުއަށް ގެންދިޔަ ފަހުން މަރުވީ، އެނގިފައިވާ ގޮތުގަައި، ދ. މާއެނބޫދޫ މީހެކެވެ. އޭނާ ކުޑަހުވަދުއަށް ގެންދިޔައީ ބަލިވެ އުޅޭތާ ދެތިން ދުވަސް ފަހުން ކަމަށާއި ކަނޑިންމަ ރިސޯޓްގައި ކޮވިޑްގެ އަލާމާތްތައް ހުރި މީހުން ތިބިކަަމަށް ރިޕޯޓެއް ލިބިގެން ދ. އަތޮޅު ހޮސްޕިޓަލުން އެ ރަށަށް ޓީމެއް ފޮނުވަން އުޅުނު ކަމަށާއި އެކަމަށް އެއްބާރުލުން ނުދިން ކަމަށް ވެސް ވަނީ އަޑުފެތުރިފަ އެވެ.
ކުޑަހުވަދޫން ކަނޑިންމައަށް ދާން އުޅުނު ޓީމަށް އެއްބާރުލުން ނުދިން ކަމަށް ދެކެވޭ ވާހަކައާ ބެހޭ ގޮތުން މިރޭގެ މީޑިއާ ބްރީފިން ގައި ނޫސްވެރިއަކު ކުރި ސުވާލަށް ނަޒްލާ ސާފު ޖަވާބެއް ނުދެއްވަ އެވެ. ހޮސްޕިޓަލްގެ ޓީމެއް އެރިޔަ ނުދިނުން ކަހަލަ އެއްވެސް ކަމެއް ދިމާވިތޯ ސުވާލު ކުރުމުން ނަޒްލާ ވިދާޅުވީ އަލާމާތްތައް ހުރި މީހުން އެރަށުގައި ކޮންމެވެސް ވަރަކަށް ތިބިކަމުގެ މައުލޫމާތު ލިބުމުން ހޮސްޕިޓަލުން ރިސޯޓާ މުއަމާލާތް ކުރި ކަމަށެވެ.
"އެހެން ނަމަވެސް އެވަގުތު އަލާމާތްތައް ހުރި މީހަކު ނެތް ކަމަށް އަޅުގަނޑުމެންނަށް މައުލޫމާތު ލިބިފައި ވަނީ،" ނަޒްލާ ވިދާޅުވި އެވެ.
އަލާމާތްތައް ހުރި މީހުން ނެތް ކަމަށް މައުލޫމާތު ދިނީ ރިސޯޓުން ކަމަކަށް ވެސް އޭނާ ސާފުކޮށް ވިދާޅެއް ނުވެ އެވެ. އެކަމަކު ވިދާޅުވީ "މައުލޫމާތު ލިބުނީ" ކަމަށެވެ. ބެލެވޭ ގޮތުގައި އެގޮތަށް މައުލޫމާތު ދިނީ ރިސޯޓުންނެވެ.
